«ادبیات سئونلر گروهو»نون «ایشیق» سایتینا گؤندردیگی خبر اساسیندا، تاسفله تانینمیش آذربایجان یازیچی و اتیمولوژیستی، حقوقشناس«اسماعیل هادی» فروردین آیینین ۸-جی گونو وفات ائتمیش و بوگون تبریزین وادیرحمت مزارلیغیندا تورپاغا تاپشیریلمیشدیر.
بیر چوخ یازیلارینی «کند اوشاغی» امضاعسی ایله یایان اسماعیل هادی ۱۳۳۶-جی ایل ورزقان ماحالیندا دونیایا گؤز آچمیش؛ آذربایجانین ادبی و مدنی اجتماعیاتیندا تانینمیش و یارادیجی بیر شخصیت کیمی حؤرمت قازانمیشدیر.
اسماعیل هادی آذربایجان ادبیاتینین مختلف ژانرلاریندا (داستان، شعر، سناریو، اتیمولوژی) یازیب یارادان بیر ادبیاتچی اولموشدور؛ آنجاق داها آرتیق لغتشناس و اتیمولوژیست کیمی ادبی جمعیتیمیزده اؤزونه مخصوص یئر قازانمیشدیر. اونون چاپ اولموش اثرلریندن: «دومانلی گونلر»(مولف ۱۳۶۴)، «لاچین»(فتحی ۱۳۷۱)، «ترکی هنر است»(احرار ۱۳۷۴)، «قارقا»(اختر ۱۳۹۵)، «گون گلر باتار گئدر…»(اختر ۱۳۹۶)، «ککلیک»(نباتی ۱۳۹۷)، «سون بیشیک»(نباتی ۱۳۹۹)، «یورولماز: اویکو اوچلویو»(آذرتوران ۱۴۰۱)، «لغتنامه جامع اتیمولوژیک ترکی – فارسی دیل دنیز»(اختر ۱۴۰۱) و «ریشهیاب: اولین فرهنگ اتیمولوژیک فارسی»(آذرتوران ۱۴۰۱) کیتابلارینی آد چکمک اولار.
«ایشیق سایتی» و «ادبیات سئونلر گروهو» امکداشلاری آدیندان بو ایتگینی آذربایجان ادبی جمعیتینه، یازیچینین محترم عائله عضولری و دوست- تانیشلارینا و سئونلرینه باش ساغلیغی وئریریک. خاطیرهسی عزیز.
۹/۱/۱۴۰۵
