خورتدانلیغیما باخمایین. بو گونلر اوتاغیمین کونجوندن ائشیگه چیخماسام دا، گؤیلوز ایسته‌ین کیمی سانال دونیادا گزیب، دولاشیرام. ثانیه چکمیر گوگل‌دن ایسته دیغیم ماتریاللاری تاپیب، اوخویورام. بیلمیرم گوگل-ین آتا- آناسی وار یا یوخ، اما هر دؤنه ایسته‌دیغیم ماتریالی الده ائتدییمده، « آلاه آتا- آناوا رحمت ائله‌سین گوگل» دئییرم. نم ندن همیشه دیلمه « گوگل بی» دئمک گلیر. اما دیلیمی دیشله‌ییرم. « بلکه گوگل بیر خانیم دی»!
آخی بیزیم بو گوگل-ین حافیظه‌سی لاپ ائله قادین حافیظه‌سینه بنزه‌ییر. هر دؤنه بیر ماتریال احتیاجیم اولاندا – آلـلاه سلامت ائله‌سین- بی بی قیزیم یادیما دوشور. بیلمیرسیز نئجه حافیظه‌سی وار. یئتر کی سؤزدن «س» دیلیزه گلسین. «س» یین یئددی آرخاسینین آدینی، سوی آدینی، یئددی آرخاسینین آرخالارینین دا نه زامان دوغولوب، یاشاییب، نه یئییب، نه ایچیب، نه غلط دارتماقلاری، نه زامان اؤلوب، دیریلمه‌‌لرینی بئله ثانیه چکمز ایپه- ساپا دوزوب، گؤزونوزون اؤنونده جانلی- جانلی تصویرلر یارالدار. دئییرم بلکه من ده ائله آتا بی‌لیک دوشونجه‌لرینین تاثیری آلتیندا، گوگل-ین آتا- آناسینا رحمت اوخویاندا «گوگل بی» دئمه‌ییم گلیر.
بیلیمرسیز نئجه کئفی وار بیر سؤزو یازیب، اونا گؤره یوزلرجه مقاله، ماتریال تاپیب اوخویاسان. منه ائله گلیر، چوخ اوزاق دئییل او گون کی،کاغیذ کارخانالاری تعطیل اولسون، اورمانلارین آغاجلاری اینسانلارین الیندن راحات بیر نفس چکسینلر. بئله کی گئدیر، بوندان بئله، کاغیذلاریمیز دا الکترونیکی کاغیذا چئویرله‌جک. کارخانالارین ایشچی‌لری ایش‌سیز قالسالار دا، آغاجلار توی توتوب، اورمانلار شنلیک ائده‌جکلر. بیر زامانلار چاخماق داشی‌ایلا ماغارالاردا دوشونجه‌سینی رسم ائدن اینسان، بیر زامان دری اوستونده، و سونرا کاغیذ، ایندیسه، الکترونیکی یازیلار یازیر… اینسان دئدیغین زامانلا آیاقلاشان بیر وارلیق‌دی. بلکه‌ده هردن توولا کئچیب، زامانی آرخاسیندا بوراخیر.
یاشیما- باشیما باخمایین. خورتدان اینسان اولدوغوما گؤره اینسانلیق قابلیت‌لری من ده اوستون‌دی. زامانلا بیرگه آیاقلاشا بیلیرم. – هم ده نئجه!- سحرلر یوخودان قالخان کیمی گؤزلریمی اوووشدورا- اوووشدورا، پیرتلاشیق خورتدان ساچ- باشیم‌لا، بیرینجی ایشیم، کامپیوتر باشیندا ایلشمک‌دی. بیر نئچه سایت-ین یازیلارینی گؤزدن کئچیرده‌رم. خبرلری اوخویارام. یازیچی خورتدان اولماق ائله ده راحات دئییل، گرک کی گؤزده- قولاق دا اولسان، آلاه ائله مه‌میش بیریسی اؤلر، بیریسی دیریلر، بیریسی مسنددن دوشر، بیریسی مسنده قالخار، نزولات آسمانی آزالار، اورمو دا قفیلدن بیر دنیز قورویار، اصفهان دا بیر چای، نه اولسون کی هامون لا کارون بیزیم جغرافیادان اوزاق دی! گؤردون بیرده‌ن بیره اورمو گؤلو کیمی قوراقلیق هاواسی بیرینین باشینا ووروب، قورودو داااا… – ( دیرناق آراسی دئییم کی قوراقلیق هاواسی دا عاشیق اولماق کیمی بیر شئی دی. عشق‌ین نزولاتی کسیلینجه، اینسان کؤکدن قوروماغا باشلایار) آنجاق دئمه‌لییم کی «خشکسالی« یه بیر سؤز دئمک اولماز، ائله گرک الیوی اَنگیوه دیرسک‌له‌ییب، خبرلرین اوخویوب، ایزله‌یه‌سن. مگر طبیعته سؤز دئمک اولار! … دئمیرم بی بی قیزیمی گؤروب، «خ» دئییم؛ خشکسالی‌نین یئددی آرخاسینین تاریخینی منه آچیقلاسین!
اینانین خورتدانلیغین آغیر ایشلریندن بیریسی خبرلره گؤز- قولاق اولماق‌دی. هر گون خشکسالی خبرلرین اوخودوغوم‌دا، نم ندن قفیلدن چای گؤیلومه دوشر هله اوندا یادیما گلر کی، ال- اوزومو ده یومامیشام. آمما ایمیل‌لریمی یوخلامادان یئریمدن قالخمارام. خورتدانلیغیما «دؤزومون اولسون» دئییرم.«باخ گؤر نزولات آسمانی نم نه قدر یوبانیر. سنین چای ایچمه‌یین بئش- اون دقیقه یوبانسا قان- قیامت اولماز کی!!!» نه ده اولسا، ایستر- ایسته‌مز بو گونلر بیر چوخوموز سانال دونیانین آداملاری اولموشوق!
۹۲.۹.۲۵
