آنا منی اویاتما
من هله ده یاتمیشام،
شیرین یوخولاریم‌لا
هئی باشیمی قاتمیشام.
اَل – اوز یوماق دردیندن
دورانمیرام یوخودان،
آنا بیلمیرم نه دن
یامان قورخورام سودان!
خئیری اولسون بالیغین
گئجه – گوندوز اویناییر،
نه یوخودان دوراندا
گئدیب ال – اوزون یویور.
نه هر غذادان سونرا
یویاجاقدیر دیشلرین،
او اوینایا – اوینایا
گؤرور تامام ایشلرین.
آنجاق بو ایشلر اوچون
منی سئومه‌‌ییر آنام،
من ده تنبل‌لیگیمدن
بیر بالیق اولاجاغام.
