“دلشاد” ماهنیسی
ع.ن. چاپار

… بیر اوشاق وارایدی,
کوچه میزده اولاردی او.
گؤز قنشه‌رینده گزردی همیشه.
بیر شویو وارایدی ,
پیشیکلره چالاردی اونو؛
توللایاردی ایتلره شویونو.
سئرچه لری قووالاردی هایدی دئیه –
توت آغاجیندان …
هر سحر مکتب چاغلاری،
کوچه‌میزدن سوووشاندا اوشاقلار ،
بوینونو چینینه قویاردی،
شویونو کوره‌یینه چالاردی؛
فیکیره جوماردی بیر قوجا ته‌هر …
سوندا زیبیل قابلاریندان
نایلون گزه ردی،
آلومینیوم آختاراردی !..
و ، بیرینجی صینیف اوشاقلاری تک-
اوخویاردی توتک چالا – چالا:
– ” آباد باشی ای ایران
آزاد باشی ای ایران
از ما فرزندان خود
دلشاد باشی ای ایران.” …
****
ایللردی سوووشور
من قوجالمیشام .
بلکه ده، او اوشاق ایندی
یئنی – یئتمه بیر گنج کیمی
“دلشاد” ماهنیسینی اوخویور اوره‌کدن
بیلمیرم هارادا ؟.
بلکه ده
یئنه ده ایت‌لری قووالاییر
پیشیک‌لره شوی چالیر
سئرچه‌لری هایدی -دئیه
باغیرا- باغیرا
توتلوقلاردان قووالاییر …
****
… بیر گون بئله ،
یئنه راستلاشدیم ،
او گونگو او اوشاقلا من؛
تاکسی سوروجوسویدو,
… بیر وانئت ده
-کؤهنه پالتار ،
دمیر قاپ – قالاچ ،
ائو اسبابی – دئیه
باغیرا – باغیرا ،
گون اورتا چاغلاری
قاپیمیزدان گئچیردی او.
قاپی – قاپی زیبیل‌لری ییغیردی؛
سوپورگه اللرینده
کوچه‌نین نیظافتینده ایدی هله …
نه بیلیم – بلکم ،
زیبیللردن نایلون گزیر ،
آلومینیوم آختاریردی.
الینده کی شوی یوخوایدی داها …
ایندی ،
بیر سیقارئت بارماقلارینین اورتاسیندایدی .
کؤلگه‌لیکده دیوارا سیغینیب ،
بیلمیرم هارایا قاپیلمیشدی گؤزلری.
قولاقلاریمی دیکله‌میشدیم .
بلکه ” دلشاد “ماهنیسینی اوخویاجاقدی
قارا توستونو اودا – اودا .
یوخ ،
گؤزلری ایله یول سالمیشدی,
باخیردی ،
باخیردی ،
من ده قارالیردیم او باخدیقلاریندا …
گؤزلریندن ،
او گونگو ماهنینین ترجمانینی ،
دوشونوردوم ،
دویا – دویا:
” آباد باشی ای ایران ،
آزاد باشی ای ایران ،
ازما فرزندان خود ،
دلشاد باشی ای ایران “.