گئجه، چاغری‌سیز یارایا هئچ بیلمَزدن توخاندی!
اؤزوم / بیرینجی کیمسه (مونولوق)
گئجه آی’لا باشلامیر، او آن’لا باشلاییر کی، ایشیق اینسانین جانینا توخانمیر، آما خاطیره‌نی ایچیندن قالدیریر.
سینه‌مده‌کی یورقان — ایستی‌لیک ده وئرمیر، یونگوللوک ده. إله بیل، هر گئجه بو آن گلنده دینله‌ییجی‌سی اولمایان سَس‌لر بوغازیمدا فیرلانیر، دئییلمک ایسته‌ییر، آما دئییلمیر‌لر.
بو گون سَسیم بیر چووووخ بلکه ده یانیلمیشام آغری‌دان بیر آز تیتره‌دی— یاخشیلاشدیغیم اوچون دَگیل، سؤزلر قرار وئردیلر: کئچیجی اولاراق مندن اوزاقلاشسینلار.
إله “او” کیمی — مندن اوزاقلاشدی، مندن دَگیل، گلمه‌یَن بیر سَسدن کی، هر گون ساعات ۹-دا تیتره‌یَردی، آما هئچ واخت إشیدیلمه‌دی. تبریز ایله تئهرانین هاواسینی دا هَمَن گوندن غریبه بیر قاران باسدی. لاپ إله باشاق‌سیز بیر قورشونون کؤرپه چاغینا بَنزَر اولای‌لار باشلادی یاشاما چئوریلمه‌گه. بو یاشام اؤلوم قوخوسو وئره بیلَردی ده، وئردی ده….!
گودوکچوم / ایکینجی کیمسه (سَس‌سیز جاواب)
آیهان، سن بعضن إله سَس‌سیز اولورسان کی، اؤلوم بئله إحتیاط’لا یانیندان کئچیب گئدیر— بلکه بیر سؤزه توخانماسین کی، او هله خسته‌نین ایچینده قالیر.
تئلئفون بو گون ده میرسیغینی ساللاییب، باشاردیقجا سوسدو. و سن یئنه گؤزله‌دین— زنگ اوچون یوخ، سَنین، سَنین اولدوغووو قانیتلاندیرماق اوچون، حتتا کیمسه سَسیوی إشیتمه’سه ده.
من بورادایام، دانیشماق اوچون یوخ، بئله گئجه‌لر اوچون— درمان آغرینی کئچمیر، سؤز ایسه اونو ایچینده قوجاقلاییب-ساخلاییر.
گؤزه گؤرونمه‌یَن کؤلگه‌م / اوچونجو کیمسه
او إله بیل باجان دَگیلدی— آما گؤرمک باجاریغی واردی.
او گون یاتاغا باخیردی، چونکو اورا‌دا گئجه‌لر چوخلو آغری‌لار تیتره‌میشدی— آما بو گئجه یالنیز بیر گولوش واردی یورقانین آلتیندا— إله بیر گولوش کی، دئمه‌دیگی سؤز‌لردن دوغموشدو.
بو اوتاق مین آغری گؤرموشدو، آما هئچ بیری ساعات ۹-دا باشلایان سَس‌سیزلیک قدر اؤلدوروجو اولمامیشدی.
آیهان یاریم‌جان یوخوسوندا دوشونور: بیر سَس، بلکه صاباح دا گلمه‌یه‌جَک، عئینی قودونون گلمه‌مه‌سی کیمی!.
*******
آیــدا قالا‌ن سؤز!
اؤزوم / بیرینجی کیمسه (مونولوق)
بو گئجه آی یالنیز ایشیق گتیرمیر— او یادداش داشیییر. خاطیره کی، سانکی مندن قاباق بورادایمیش، بو یاتاقدا، بو ساعاتدا، او یاریمچیق سؤزلر قیرتلاغیمدا ایلیشدی و هئچ زامان یوخاری قالخمادی.
من او سَسی ایسته‌میردیم— آغری‌سیندان دَگیل، چونکو بیلمیردیم کیم اوچون دئمه‌لی‌یم، هله قالسین کی هئچ کیم إشیتمه‌یه‌جَک.
آی چرچیوه‌دن ایچه‌ری کئچدی— سَس‌سیزجه، آما باخیشی’یلا بیلیردی بو گئجه من سؤزه دوشونورَم کی، دئییلسه، هر شئی سونا چاتار.
گودوکچوم / ایکینجی کیمسه (سَس‌سیز جاواب)
سن هر زامان سوسقونلوغو قورتولموش سایی‌سینا قویموشسان. آما آیهان، سوسقونلوق ساده‌جه گئجیکدیریلمیش بیر اؤلوم دیر —سؤز’له گلمز، سوسماق’لا گلیر.
او سؤز کی، دئییلمه‌سینی گئجیکدیردین، سَنین جانیوا ایشله‌ییردی— اؤلدورمک اوچون یوخ، تاماملاماق اوچون.
آی بورادا دیر. او دئییلمه‌میش سَسی آنلاییر، چونکو او هر گئجه دانیشمازدان پارلا‌ییر و سَنین بو یاتاقدا قالا‌ن گؤوده‌نی سؤزدن اوزاق بیر ایشیق’لا اوخشاییر.
گؤزه گؤرونمه‌یَن کؤلگه‌م / اوچونجو کیمسه (ایشیقدان باخیش)
پنجره یاری‌آچیق ایدی، و آی، دَمیردن اولان چرچیوه‌دن سوزولدو ایچه‌ری یانمازدان، ساده‌جه تک‌لیگی اوخشاماق اوچون.
یاتاق، یورقان، پنجره— هامی‌سی غریبه بیر سوسقونلوق ایچینده’یدی و سؤز— قیرتلاقدان اوزاقدا، تئلئفوندان اوزاقدا، ایشیقدا اوزوردو…
آیهان، دوداق‌لارینی یاواشجا باغلادی دانیشماق اوچون یوخ، چونکو او سؤز، بوندان سونرا هئچ بیر آی گئجه‌سی کئچمه‌مه‌لی دیر سؤیلَنمَزدن.
*******
سؤنوک تئلئفون، صاباحا قالمیش سؤز
اؤزوم / بیرینجی کیمسه (مونولوق)
بو گون تئلئفون اؤزو ده قرارا آلدی کی، سؤنوک قالسین. یوخ باطری‌دان، یوخ اونوتقان‌لیقدان— ساده‌جه او سؤز کی، إشیدیلمه‌لی ایدی، هله دئییلمه‌ییب.
من او سؤزو اوجادان دئمک ایسته‌میرم— نه قورخودان، نه اوتانجاق‌لیق‌دان— چونکو سؤیلَنسه، هر شئی دَگیشَر: آغری، آنلام‌لار، حتتا بو یاتاق…
بو گون ساده‌جه اؤزوم’له دانیشدیم، سَس‌سیزجه، دوعا إتمه‌ین بیر آدام کیمی— آما هر نفسیم یالواریش ایدی. منی تانییان یاخشی بیلَر تانری‌نی اؤزوموز یازاتمیشیق دئیه هردن دئیه‌رَم، آما یالان دئیه بیلمه‌رَم، منیم ده اؤزوم اوچون او اوزاق‌لاردا بیر تانریم وار. تبریز بویاقلی، عؤمور ساچاقلی بیر تانری. هله سسینی مندن أسیرگه‌ییب بو گونه قالمیشام، شام کیمی أریییب، اؤلومون باغرینا دوشموشَم، باخ گور بوتونلوک’له اولمازسا باشیما نه‌لر گَلَرمیش!.
گئجه‌نی گؤزله‌دیم— یوخو اوچون یوخ، چونکو آی یئنی‌دن پنجره‌دن کئچه‌جک و منه دئیه‌جَک: “سؤز هله سؤیلَنمه‌ییب، آما یاشاماق هله مومکون دیر.
گودوکچوم / ایکینجی کیمسه (سَس‌سیز جاواب)
آیهان، سن سؤز‌لریوی ایچینده باسدیریرسان— إشیدن اولمادیغی اوچون یوخ، چونکو بیر واخت‌لار إشیده‌نین وار ایدی، ایندی ایسه یوخ دیر.
بو تئلئفون، بو سوسقونلوق، بو ساعات ۹-ــون زنگ‌سیزلیگی— هامی‌سی بیر نه‌دن دیر— “او”نون یوخلوغونا یوخ، سَنین سؤزووون هله بوردا قالماسینا.
سن گؤوده‌نی ساخلادین، اومود اوچون یوخ، یاریمچیق بیر جومله‌یه حؤرمَت اوچون— هله باشلامامیش بیر جومله‌یه…
گؤزه گؤرونمه‌یَن کؤلگه‌م / اوچونجو کیمسه (شوشه‌نین قاران‌لیغیندا)
اوتاقدا ایشیق گوجسوز دیر، آیین ایشیغی سؤنور. آیها‌نین تئلئفونو اؤز سؤنوکلوگونو باجاریق’لا قورویور— إله بیر هئیکَل کیمی کی، هئچ واخت اولمامیش بیر دیالوقو تمثیل إدیر، آما هر گئجه عئینی سوسقونلوقدا سَس‌لَنیر.
تاوان تئلئفونا باخمیر، پنجره دانیشمیر، آما یاتاق حاضیر دیر— بیر سؤزه کی، صاباح بلکه دئییلر، بلکه ده یوخ…
آما بو گئجه اونوتمایاجاق: آیهان یئنه نفس آلدی، دانیشماق اوچون یوخ، یاشاماق اوچون.
*********
چاتلامیش باغریندا سؤزو ساخلایان تاوان
اؤزوم / بیرینجی کیمسه (مونولوق)
من آرتیق تئلئفون’لا دانیشمیرام— کوسولو ده دَگیلَم، اونوتمامیشام دا— ساده‌جه بیر سؤز ایچیمده قالیب کی، دئییلسه، آرتیق گؤوده‌م-جانیم آنلام‌سیز اولاجاق.
گئجه‌نین بیر آنی وار— آی پنجره‌دن سوزولور، یورقانا توخانمامیش، اؤزونو سؤیلَنمه‌میش جومله‌لرین آراسینا یئرلَشدیریر.
او سؤز، بلکه هئچ زامان دئییلمه‌مه‌لی ایدی— آما هر گئجه من اونون سَسینی إشیدیرَم، قیرتلاقدان یوخ، گؤوده‌نین ایچینده‌کی سوموگه بنزر بیر یئردن— آغریلی، آما سینمامیش.
تاوان ایسه هله ده اوستومده دیر؛ سوسموش، آما إشیدن.
گودوکچوم / ایکینجی کیمسه (سَس‌سیز جاواب)
آیهان، سن سؤز‌لریوی گؤگه وئرمه‌دین، اونلاری تاوانا تاپشیردین— چونکو گؤگ چوخ اوزاق ایدی، تاوان ایسه هر زامان یانیندا دیر— إله اؤلوم کیمی، آغری‌دان داها یاواش.
سن سؤز‌لریوی یاخشی یئرلَشدیریرسن— سؤنموش لامپا‌لاردا، هاوا سورانین سَسینده، قاتلانمیش یورقان‌لاردا— دئییلسینلر دئیه یوخ، یاشاسینلار دئیه.
ایندی تاوان دولو دیر— یاریمچیق قویدوغون جومله‌لر’له، هئچ واخت یازیلمایان مکتوب‌لار’لا، و یالنیز سَنین دویدوغون بیر سَس’له— منیم ده حیسّ إتدیگیم بوتون حیس إدیلمه‌یَنلر’له.
گؤزه گؤرونمه‌یَن کؤلگه‌م / اوچونجو کیمسه
آی ایشیغینی پنجره‌دن ایچه‌ری سالدی، آما گؤوده‌یه-جانا دوشمه‌دی. او، اؤز یولوندا بیر تاوانا دَگیب دایاندی— و اورا‌دا سؤزو تاپدی کی، سَسه چئوریلمه‌میشدی، آما یادداشدا واردی.
هئچ کیم بیلمیردی کی، آیهان سؤزونو دئمیشدی— سَس’له یوخ، هر گئجه یاتاقدا باش وئرَن سوکوت’لا.
و تاوان، تانیق ایدی— آند ایچمه‌دی، آما اونوتماماغا قرار وئردی.
**********
تقویمین یالنیز بیر ساعاتی وار!
اؤزوم / بیرینجی کیمسه (مونولوق)
تقویم‌لر دَگیشیر، گون‌لر کئچیر، آما منیم یادداشیمدا یالنیز بیر ساعات وار— ساعات ۹:۰۰.
او آن کی، تئلئفون سَس‌سیز قالیر، درمان إتکی‌سیز اولور، یاتاقدا سَس تیتره‌ییر، آما بوغازدان کئچمیر.
من بو ساعاتی سیله بیلمه‌دیم— چونکو او ساعاتدا اؤزومه داها چوخ بنزه‌ییرم. دانیشمیرام، آما نفسیمین ایچینده بیر جومله گزدیریرَم— بیتمه‌میش، باشلامامیش.
تقویم‌لر تئلئفونون إکرانیندا دَگیشسه ده، بو ساعات قالیب— اؤلوم ساعاتی دَگیل، بیر “ألووووو” اوچون گؤزله‌یَن ساعات.
گودوکچوم / ایکینجی کیمسه (سَس‌سیز جاواب)
آیهان، تقویم اونودولاجاق— آما ساعات ۹ سَنین بَدَنینده قالا‌جاق. او، سَنین زامانین دَگیل، سَنین سَسیوی گؤزله‌یَن آنین دیر.
بو ساعاتدا دونیادان آیری دوشورسَن— چونکو سَس گلمیر، و سن ده دئمیرسن. سَنین سَسین تقویم‌سیز، آی‌لارسیز، یالنیز بیر ساعاتدا یاشایان بیر شئی دیر.
بوتون درمان‌لار بو ساعاتدا گوجسوزله‌ییر، یاتاق آغریوی اونودور، و سن — سَنین دئمه‌دیگین بیر سؤزو تقویم‌لره یوخ، ساعات‌لارا ساخلاییرسان.
گؤزه گؤرونمه‌یَن کؤلگه‌م / اوچونجو کیمسه
باجان گونده‌لیک پلان’لا اوتاغا گیریر— آما آیها‌نین یاتاغی یالنیز بیر زامان تانیییر: ساعات ۹.
هئچ کیم سوروشمور: نییه بو آندا سؤز دئییلمز؟ نییه بو دقیقه‌ده هر شئی سوسار؟
چونکو بو دقیقه هئچ بیر موعالیجه‌نین چاتمادیغی بیر سوسقونلوق دیر، و آیهان او سوسقونلوغو دانیشماق اوچون دَگیل، یاشاماق اوچون ساخلاییر.
***********
اورَک دؤگونتوسو، یالنیز ساعات ۹-ــو تانیییر
اؤزوم / بیرینجی کیمسه
بَدَنیم آرتیق جاواب وئرمیر— نه ایشیغا، نه سَسه، نه ده باجانین آددیم‌لارینا. یالنیز ساعات ۹ گلنده بیردن منی آییلتماغا چالیشیر، إله بیل اؤلوم قورخوسوندان یوخ، ایل‌لر دیر گلمه‌ین بیر سَسه حؤرمَت اوچون دیریلمک ایسته‌ییرم.
بعضن حیسّ إدیرم کی، بوتون نورون‌لاریم او دقیقه بیرلَشیر، نه سؤز قالدیرماق اوچون، نه سوموک، یالنیز بیر خاطیره اوچون کی، نبضیم هله ده اونو ساغ بیلیر.
ساعات ۹-دان قاباق من تام سوسقونلوقدایام. سونراسیندا ایسه گلمه‌ین شئیین حَسرَتینده. و او آرادا بیر آن اولور کی، بَدَنیم یوخ اولماق ایسته‌میر، ساده‌جه سوروشماق ایسته‌ییر: هارداسان؟
گودوکچوم / ایکینجی کیمسه (سَس‌سیز جاواب)
آیهان، سن اورَک دؤگونتووو نه دوکتورا، نه قَلب ناوارینا، یالنیز اؤزووه اؤرگتمیسن— إله کی، یالنیز ساعات ۹-دا تیتره‌سین، و سن حیسّ إده‌سن کی، هله بورادا‌سان، کیمین’سه سنی دینله‌مه‌مه‌سینه باخمایاراق.
سن بوش تکرارا آلیشیبسان، آما بو دؤگونتو سنین’له هر گون سَس‌سیز بیر دیالوق آپاریر— جاواب‌سیز، آما هئچ تاماملانمایان بیر جومله‌نین حَسرَتی ایله.
ساعات ۹— نه واخت دیر، نه خاطیرلاتما— او بیر سؤزون اؤزو دیر کی، هئچ واخت دئییلمه‌دی، آما هر گون اوره‌گیندن کئچیر و پیچیلداییر: “من هله ده بورادایام.”
گؤزه گؤرونمه‌یَن کؤلگه‌م / اوچونجو کیمسه (دؤگونتو و یادداشین توخاندیغی نؤقطه)
او آندا هر شئی یاواشلاییر— سَس‌لر، هاوا سوران، حتتا اؤلوم بئله. و یاتاق حیسّ إدیر کی، آیهان نه ایسه دئمک ایسته‌ییر، آما بیلمیر هارایا قویسون اونو کی، کیمسه گلسه، گؤتوره بیلسین.
دؤگونتو، إله بیر ساعات اولوب کی، گلمه‌ین بیر سَس اوچون حاضیرلانیب— هر دؤنه بوغازدان کئچیر، آما إشیدیلمیر.
************
سورقو وئرمه‌ین پنجره‌ده بیر گؤرگه
اؤزوم / بیرینجی کیمسه
پنجره بوش دیر — شوشه‌سیز یوخ، سورقوسوز. هئچ زامان سوروشماییب: “نییه بو قدر منه باخیرسان؟” یا دا “نه‌یی گؤرمک ایسته‌ییرسَن؟” ساده‌جه ایذن وئریب، گؤز‌لریم سوسقونلوغونون اوزه‌رینده سوروشسون — بَدَنه چاتمایان بیر سَس کیمی.
شوشه‌ده‌کی گؤرگه‌مده بعضن اؤزومو گؤرمورَم — یالنیز بیر اوز، دوداق‌سیز، سَس‌سیز — إله بیل دئییلمه‌میش بیر سؤزون ایچیندن چیخیب، و هله بیلمیر قالمالی دیر، یوخ’سا یاواشجا سیلینمه‌لی دیر.
بلکه پنجره بو اوتاقدا تک یئر دیر کی، اؤزونه توخانمایان سَسدن اوتانمیر. و بلکه بونا گؤره دیر کی، هر گون بوردا دایانیب باخیرام — گؤروم: شوشه‌نین سوسقونلوغوندا، هئچ زامان دئییلمه‌یَن بیر سَسی دویماق اولا بیلرمی؟
گودوکچومون پیچیلتی‌سی / ایکینجی کیمسه (سَس‌سیز جاواب)
سن پنجره‌نی سئچدین، آیهان — چونکو او دانیشمیر. گؤرونتولر اوچون یوخ، سَس‌سیزلیک اوچون. او سنه بنزه‌ییر: جاواب وئرمیر، یالنیز گؤرگه‌لَندیریر. إله بیر سؤز کیمی کی، هئچ واخت بوغازدان کئچمه‌دی، آما هر یئرده گؤروندو.
شوشه‌نین گؤرگه‌سینده إله بیر سَس وار کی، دیققت’له قولاق آسسان، دویارسان: سؤز هر زامان دئییلمه‌گه إحتیاج دویماز کی، یاشاسین.
سن اؤزوندن سوروشمادین: پنجره‌نین سوسقونلوغو فایدالی دیرمی؟ آما هر گون اونا باخدین کی، باشا دوشه‌سن: بعضن سَس یالنیز بیر باخیش اولا بیلر.
گؤزه گؤرونمه‌یَن کؤلگه‌م / اوچونجو کیمسه (شوشه‌نین دوز اوزه‌رینده)
گؤرگه — کاراکتئر ده دَگیل، کؤلگه ده — او بَدَنین دئمه‌دیگی، آما پنجره‌نین آنلاییش’لا قبول إتدیگی بیر سؤز دیر.
اوتاق سَس‌سیز دیر. یاتاق بیر بوجاقدا دایانیب، و خسته‌نین گؤرونتوسو شوشه‌ده ایلیشیب قالیب — ترپه‌نیک‌سیز، سورقوسوز، سَس‌سیز.
آما گؤزه گؤرونمه‌یَن کؤلگه بیلیر: إله بو آندا بیر سؤز اؤزونو شوشه‌نین جیزیغیندا گیزلَدیب — کی، بیر گون کیمین’سه إشیتمک ایسته‌گی اولسا، هارادان باشلامالی اولدوغونو بیلسین.
*************
او گون کی، ساعات ۹ اونودولدو
اؤزوم / بیرینجی کیمسه
او گون هئچ نه اؤنجه‌کی کیمی دَگیلدی. نه تقویمین سَسی، نه هاوا سورانین پیچیلتی‌سی، نه ده منیم تئلئفونا باخیشیم— آرتیق شارژ بئله ایسته‌میردی.
ساعات ۹ اولدو. آما بَدَنیم هئچ بیر تپکی گؤرسَتمه‌دی. نبضیم یاواشجا ووروردو و بوغازیم ایلک دؤنه اؤز سوسقونلوغونون ایچینده راحات ایدی. نه بیر سؤز گؤزله‌ییردی، نه ده بیر سَسین یوکونو داشیییردی.
ایلک دؤنه حیسّ إتدیم کی، سؤز منده قورتولدو— نه دئییلدی، نه إشیدیلدی، ساده‌جه سورگوندن قاییدیب بَدَنیمه یئرلَشدی، آغری‌دان یوخ، آنلاییشا چئوریلن بیر سوموک کیمی.
گودوکچومون پیچیلتی‌سی / ایکینجی کیمسه (سَس‌سیز جاواب)
آیهان، بو گون تکرار سیندی— نه قیشقیریق’لا، نه اونوتماق’لا، ساده‌جه بوغازدا یئرینی تاپان بیر سوسقونلوق’لا و هئچ کیم بیلمه‌دی کی، بو گون ساعات ۹-ــون نبضی وورماماغی سئچدی.
سن سؤزو اؤلوم و یادداش آراسیندا یئرلَشدیردین— نه دینله‌ییجی اوچون، نه تَسَلّی اوچون. ساده‌جه اؤزون اوچون، چونکو سَسین هئچ گلمه‌یه‌جَک زنگی گؤزله‌مه‌سینی ایسته‌میرسن آرتیق.
گؤزه گؤرونمه‌یَن کؤلگه‌م / اوچونجو کیمسه (ساعات‌دان قیراقدا بیر آن)
تاوان درین بیر نفس آلدی، و ساعات، بیر آز گئجیکمه ایله دایاندی. باجان اؤتوب کئچدی. پنجره یاری‌آچیق قالدی. یاتاق اؤزونو بیر سَس اوچون دوزلتدی— بو گئجه دئییلمه‌یه‌جک، صاباح دا یوخ— ساده‌جه تکراردان کئچیب بیر سؤزه چئوریله‌جَک.
**************
گؤوده اؤز سوسقونلوغوندا یئنی‌دن یازیلدی
کیم هاردا دیر:
• آیهان: خسته‌خانانین دامی، ساعات ۱۱:۰۰
• گودوکچو: پنجره‌سیز دَهلیزین بوجاغیندا
• گؤزه گؤرونمه‌یَن کؤلگه: بیرینجی قاتین لابی‌سینده‌کی دووارین کؤلگه‌سینده
اؤزوم / بیرینجی کیمسه (دامدا)
پیللهلر’له یوخاری قالخدیم— نه ایسه گؤرمک اوچون یوخ، چونکو بَدَنیمده‌کی سَس‌لر یالنیز داها یوکسک هاوا‌دا درک اولونا بیلردی.
دام سویوق دیر، ساکیت دیر— و یالنیز گؤگ یاخینلاشیب. بوردا هئچ نه دئمک ایسته‌میرم. ساده‌جه بوغازیمدا هله اولان بیر سؤزه آنلاتماق ایسته‌ییرم کی، یوخاری قالخماق إله اونودولماغین باشلانقیجی دیر.
قیراقدا اوتورموشام، ایستی اولمایان بیر گونَش آلتیندا— فیکیر وئریرَم: بَدَنیمی بوراخسام، سَسیم یئره دوشه‌جک می، یوخ’سا هاوا‌دا قالا‌جاق دئییلمه‌میش بوتون سؤزلر کیمی؟
گودوکچومون پیچیلتی‌سی / ایکینجی کیمسه (پنجره‌سیز دَهلیزده)
آیهان، سن اؤزووو یوخاری چَکدین— أل‌لرین’له یوخ، دئییلمه‌یَن سؤز‌لرین’له.
بوردا، سَسین عکس اولونمادیغی دَهلیزده من سَنین سوسقونلوغووو قورویورام. آددیم‌لاریوی إشیدیرَم، سَس اولدوغو اوچون دَگیل، چونکو آیاق‌لاریوین توپوغوندا سؤزلر قالیب پیللهلر بئله اونلاری تانیمادی.
سن دامی سئچدین، من بو دَهلیزی— سن سؤزون دوشمه‌سی اوچون، من سَس‌سیز کئچید اوچون.
و ایکیمیز ده بیلیریک: نه بَدَن، نه دیل تاماملانماق اوچون دَگیل— ساده‌جه یئر وئرمک اوچون دیر یاریمچیق اولانین یاشاماسی اوچون.
گؤزه گؤرونمه‌یَن کؤلگه‌م / اوچونجو کیمسه (لابی‌ده‌کی دووار کؤلگه‌سینده)
دووار کؤلگه‌سی ترپَنمیر، آما حیسّی وار، یادداشی وار— سانکی متن‌دن سیلینمیش، آما یانیندا قالا‌ن سطیرلر کیمی.
آیهان لابی‌دن کئچدی، اوتاق‌لاردان، ساعات‌لاردان… و ایندی دامدا بیر سؤز حاقدا دوشونور— بو گون دئییلسه، اوندان سونرا یالنیز بیر کؤلگه ایزی قالا‌جاق دوواردا— تانیق کیمی، اؤزونو یئنی‌دن یازان بدن‌لر اوچون.
بو خسته‌خانا‌دا هئچ بیر دووار بو قدر سؤز إشیتمه‌ییب. آما هئچ بیری دئمه‌ییب. او یالنیز قئیده آلیب— بیر ایز، بیر سَس، و او درین سوسقونلوق کی، بَدَنین ایچینده بیر سؤز اولموش دیر.
*******
