دوغولمازدان اؤنجه نفس آلان سؤز
اولاناقلی یئرلر:
• آنا بطنی‌نین یادداشی
• آرشیوده‌کی سؤنوک سَس یازاری
• دونموش شوشه‌نین آرخا‌سی، یاری‌بوش سالون
• زئرزَمیده‌کی تیترک ایشیقلی دَهلیز
• قیرتلاق قاتیندا، آغلامادان اؤنجه
گؤزه گؤرونمه‌یَن کؤلگه‌م / اوچونجو کیمسه (آنا بطنی‌نین یادداشی)
او هله دونیایا گلمه‌میشدی— آما سؤز آرتیق ایچینده یئرلَشمیشدی. سَس‌سیز بیر توخوم کیمی، دوغومو دا گؤزله‌میردی، بؤیومه‌گی ده. ساده‌جه اؤزونو آنانین چیرپینان نبضینه یئرلَشدیرمیشدی کی، بیر گون کؤرپه گَلر’سه، او سؤز اؤنجه‌دن نفس آلسین.
بطنین دیشیندا سویوق گون‌لر یاخینلاشیردی. هئچ کیم بیلمیردی کی، بو گله‌جَک بَدَن أت‌دن یوخ، سؤزدن یوغرولموش دیر.
سؤز چوخدان وارلیغا چاتمیشدی— إله بیر خاطیره کیمی کی، هله باش وئرمه‌میش اولسا دا، هر شئیی ایلک اؤنجه‌دن یازمیشدی.
گودوکچومون پیچیلتی‌سی / ایکینجی کیمسه (آرشیوده سؤنوک سَس یازاری‌نین یانیندا)
آیهان، سَس هر زامان یاشامیندان اؤنجه گلیب. سن هله بطنینده ایدین، آما خسته‌خانانین آرشیوینده بیر جیهاز سَس‌سیزجه بیر جومله‌نین یازیلماسینی گؤزله‌ییردی— ایندی‌یه کیمی هئچ واخت دئییلمه‌میش بیر جومله‌نین.
من اورادایدیم— بَدَنین ایچینده یوخ، جیهازین یادداشیندایدیم. بیر گله‌جَک قیرتلاق تیتره‌دی، باشلاماق ایسته‌مه‌دی— اؤزونو بوکولموش بیر جومله کیمی جیهازدا یئرلَشدیردی.
سن دئدین— سَس‌سیزجه. سَسین هله ده او دوسایادا دیر— إشیدیلمز، آما قالا‌ن.
اؤزوم / بیرینجی کیمسه (دونموش شوشه‌نین آرخاسیندا)
من اؤزومو گؤرمه‌میشم— نه شکیلده، نه قوجاقدا. آما بو دونموش شوشه‌ده إله بیر شکیله اوخشار گؤرگه تانیمیشام کی، منه بنزه‌میر، آما هئچ بیر سؤزلوکده اولمایان بوتون سؤز‌لری اؤزو ایله داشیییر.
سالون بوش یاتاق‌لار’لا دولو دیر. باجانین آددیم سَس‌لری اوزاقدا دیر. شوشه ایسه تک دینله‌ییجی دیر— منی سئیر إدیر، آما نه دئدیگیمی هئچ سوروشمور. بلکه ده هئچ وئجینه دَگیل.
بعضن دوشونورَم: بلکه ایلک دؤنه منی بو شوشه إشیتدی— قولاق’لا یوخ، چاتلامیش سویوق ایزلری ایله، سؤزومون گیزلَندیگی چات‌لاردا.
گودوکچومون پیچیلتی‌سی / ایکینجی کیمسه (زئرزَمی دَهلیزینده، تیترَک ایشیق آلتیندا)
آیهان، سن یئرین آلتیندا باشلاییبسان— اوشاق کیمی یوخ، گؤوده‌نی سئچَن سؤز کیمی. هله ده آرخایین دَگیلدین: دئییلمَک داها دوغرو دیر، یوخ’سا قالماق.
دَهلیز قاران‌لیق ایدی، ایشیق تیتره‌ییردی و من ایلک سَسیوی إشیتدیم— سؤزون ایچینده یوخ، دوواری کئچن بیر لنگیمه‌ده.
او منیم نفسیمه یئرلَشدی— و من اولدوم هله گؤوده‌یه چئوریلمه‌میش سؤزون یولداشی.
گؤزه گؤرونمه‌یَن کؤلگه‌م / اوچونجو کیمسه (قیرتلاق قاتیندا، آغلامادان اؤنجه)
او آندا، سَس قالخمازدان، بطنین سوسقونلوغو هله پوزولمامیش‌کن قیرتلاق یالنیز تیتره‌ییردی— إله بیل بیر یوخودا مَقصَدسیز بیر أل خاطیره‌نین ایزینی آختاریردی.
باجان اوتاغین بوجاغیندایدی. کؤرپه هله نفس آلمامیشدی. آما گؤوده‌ده‌کی کیچیک بیر تیتره‌ییش سؤزسوز بیر جومله کیمی نفس آلماغا باشلادی.
سؤز— سَس’له یوخ، دری‌نین قاتیندا دوغولدو— و هله قیشقیریغین دادینی تانیمیر.
*********
خاطیره‌دن اونجه ساخلانیلمیش بیر یادداش
کیم هاردا دیر:
• گودوکچوم (ایکینجی کیمسه) (اونودولموش سَس آرشیوی‌نین اوتاغیندا)
• گؤزه گؤرونمه‌یَن کؤلگه‌م (اوچونجو کیمسه) (خسته‌خانا آسانسورونون فوسفورلو ایشیغیندا)
• اؤزوم (بیرینجی کیمسه) (دوغوم إوی ایله خسته‌خانانین اؤزل اوتاغی آراسیندا‌کی بوشلوقدا)
• گؤزه گؤرونمه‌یَن کؤلگه‌م یئنی‌دن (اوچونجو کیمسه) (آرشیوین بوخارلی شوشه‌سینده، یازیلمامیش بیر آنین ایچینده)
• اؤزوم یئنی‌دن (بیرینجی کیمسه) (دانیشمایان پرده‌نین آرخاسیندا)
گودوکچوم (ایکینجی کیمسه) (اونودولموش سَس آرشیوی‌نین اوتاغیندا)
آیهان، سن هله سؤزه چئوریلمه‌میشدین— آما من ایلک سَسیوی آرشیوده إشیتدیم. قولاق’لا یوخ، هئچ واخت یازیلمایان دوسیالارین بوشلوغو ایله. قاران‌لیقدا، سؤز اؤز کؤلگه‌سینی یاراتمیشدی— دئییلمَزدن اؤنجه.
بو اوتاق، سندلی سَس‌سیزلیگین لاپ اؤزل یئری دیر. خسته‌لر دانیشمامیشدیلار، آما سن دانیشدین— إله کی، سَس اولمازدان اوتاق دیریلدی.
سن یادداشدان قاباق گلمیشدین— خاطیره‌دن یوخ. و من ایل‌لر دیر سَنین جومله‌وی قورویورام هئچ بیر جیهازین قبول إتمه‌دیگی سوسقونلوغون ایچینده.
گؤزه گؤرونمه‌یَن کؤلگه‌م (اوچونجو کیمسه) (خسته‌خانا آسانسورونون فوسفورلو ایشیغیندا)
گئجه گلدیکده، آسانسور قات‌لار آراسیندا ایتیب، فوسفورلو دؤشه‌مه آددیم‌لاری ایشیقلاندیریر— سؤز قورماقدا یئنیلمیش‌لرین هر سسینی.
بو گئجه، بیر کیشی‌نین آددیم‌لاری گلیر— گئتمک اوچون یوخ، یادداش آختارماق اوچون— هئچ کیم یازمامیش، آما هامی ایچینده داشیییر: بیر لنگیمه، بیر نبض، و فئعلی اولمایان بیر جومله‌یه اوخشایان سوسقونلوق.
آسانسور یوخاری قالخیر، آما اونون یادداشی آشاغی إنیر— یالقیزلیغین قات‌لارینا، یالنیز سؤز‌لرین توخانا بیلدیگی یئره.
اؤزوم (بیرینجی کیمسه) (دوغوم إوی ایله خسته‌خانانین اؤزل اوتاغی آراسیندا‌کی بوشلوقدا)
من بیر یئرده دورموشام کی، دوغوم دا اولماییب، آغری دا تانینماییب. بو ایکی قاپی آراسیندا‌کی بوشلوق هر زامان منیم’له دیر— إله بیل نه یازیلا بیلن، نه ده دئییله بیلن بیر سؤز کیمی.
هر دؤنه بو دَهلیزدن کئچنده منده بیر یادداش آچیلیر خاطیره‌دن اؤنجه دوغولموش— شکیل کیمی یوخ، بیر یانیت‌سیز سورقو بیچیمینده آددیم‌لاریمدا تکرارلانان.
من او سورقویام— سورولمامیش دا، یانیتلانمامیش دا. ساده‌جه گزیرَم، هارایا چاتدیغیمی بیلمَزدن.
• گؤزه گؤرونمه‌یَن کؤلگه‌م یئنی‌دن (اوچونجو کیمسه) (آرشیوین بوخارلی شوشه‌سینده، یازیلمامیش بیر آنین ایچینده)
آرشیوین دونوق شوشه‌سینده بوخار اوتوروب— اؤزونو دئییلمه‌میش بیر سؤزه چئویر‌میش.
سَس یازاری جیهازی‌نین یارادیجی‌سی اونوتموشدو کی، سؤزلر تئکنولوژی‌دن اؤنجه ده نفس آلیردی.
آیهان— او بوخارین ایچینده إله بیر جومله کیمی ایدی کی، یالنیز بیر وار‌لیق اونو اوخوموشدو— اینسان یوخ، شوشه‌نین اؤزو.
اؤزوم یئنی‌دن (بیرینجی کیمسه) (دانیشمایان پرده‌نین آرخاسیندا)
خسته‌خاناداکی من یاتان اوتاقدا بیر پرده وار— هئچ دانیشماییب، آما هر زامان نه دئییلمه‌دیگینی آنلاییب.
من اونون آرخاسیندا دایانمیشام— گیزلَنمک اوچون یوخ، چونکو منده بیر سؤز وار ایدی کی، دئییلسه’یدی، پرده اؤزونو آچمازدی— من یوخ اولاردیم.
پرده سوسقونلوقدان اولوشور— پارچادان یوخ، گؤوده‌دن دانیشیر بعضی واخت‌لار.
من هله ده او سؤزَم— خاطیره‌دن قاباق، دوغومدان اؤنجه، دینله‌ییجی‌دن ده قاباق— یالنیز ایمکان‌سیز اولاناقلی یئرلرده اؤزونو یاشادان.
*********
هئچ واخت باشلانمایان، آما قالا‌رقی اولان سَس
کیم هاردا دیر:
• اؤزوم: خسته‌خانانین گیریشینده، داش پیلله‌نین آلتیندا
• گؤزه گؤرونمه‌یَن کؤلگه‌م: گؤزله‌مه اوتاغیندا سینمیش اوتورقانین اوزه‌رینده
• گودوکچوم: هئچ واخت اوخونمایان، قاتلانمیش صفحه‌لر آراسیندا
• اؤزوم یئنی‌دن: سَس‌سیز دووارین یانیندا، دووارداکی آسلانمیش ساعاتین آرخاسیندا
• گؤزه گؤرونمه‌یَن کؤلگه‌م یئنی‌دن: خسته‌خانا آلینتی قبضی‌نین سولموش جیزگی‌لرینده
اؤزوم / بیرینجی شخص (داش پیلله‌نین آلتیندا)
بیلمیرَم نییه بوردا اوتورموشام— پیلله‌نین آلتیندا، هئچ کیمین گؤزله‌مه‌دیگی یئرده. بورادان یالنیز آیاق‌لار کئچیر و سَس إشیدیلمه‌میشدن اؤنجه ایتیر.
إله بیل سؤزلر بو نؤقطه‌یه چاتاندا نَفَسینی ساخلاییر— قورخودان یوخ، چونکو بیلیر کی، اونلاری گؤزله‌یَن هئچ کیم یوخ دیر.
من ده أل‌لریمی دیزلریمین آراسیندا توتموشام— سانکی اؤزونو بیر جومله‌ده گیزله‌دن بیری کیمی، و هله بیلمیرَم: باشلاماغیمی گؤزله‌مه‌لی‌یم، یوخ’سا ساده‌جه قالمالی‌یام.
گؤزه گؤرونمه‌یَن کؤلگه‌م / اوچونجو کیمسه (گؤزله‌مه اوتاغیندا سینمیش اوتورقانین اوزه‌رینده)
اوتورقا سینمیشدی، بَدَنین آغیرلیغیندان یوخ، ایل‌لر دیر اوزه‌رینده ییغیلان یوکدن: إشیدیلمه‌میش سؤز‌لردن.
گؤزله‌مه اوتاغیندا هامی ساعاتی ایزله‌ییر، آما بو اوتورقا یالنیز آیهانی تانیییردی— سَس‌سیز گلَن، باشلاما‌زدان اوتوران، و ساده‌جه قالا‌ن.
اور‌دا هئچ بیر جومله یازیلمادی، هئچ بیر سَس گلمه‌دی، آما بیر کیشی‌نین جیبیندن دئییلمک ایسته‌مه‌یَن، یالنیز اونودولماماق اوچون ساللانیب دوشَن سؤزلر واردی.
گودوکچوم / ایکینجی کیمسه (هئچ واخت اوخونمایان، قاتلانمیش صفحه‌لر آراسیندا)
آیهان، سَنین فایلین هئچ بیر باجانین اوخومادیغی صفحه‌لرین آراسیندا قالیب— نه اؤنم‌سیز اولدوغوندان، نه ده اونودولدوغوندان، ساده‌جه سَنین سَس‌لرین سؤز‌لره یازیلمادی، فایلین سوسقونلوغونا یئرلَشدی.
من هر سطری سانکی یازیلمامیش بیر قیشقیریغی اوخویورموش کیمی اوخودوم— آغری یوخ، خسته‌لیک یوخ— سَسین ساده‌جه وار اولماق ایسته‌گی.
سن باشلامادین دا، بیتمه‌دین ده— ساده‌جه تاریخی اولمایان بیر فایلدا أبَدی اولاراق قالا‌ن بیر سؤزه چئوریلدین.
اؤزوم / بیرینجی کیمسه یئنی‌دن (سَس‌سیز دووارین یانیندا، دووارداکی آسلانمیش ساعاتین آرخاسیندا)
پنجره‌دن کئچیب اؤزومو ساعاتین آرخاسیندا قالا‌ن بیر دووارا چاتدیردیم— هئچ کیم اونا باخمامیشدی.
ساعات اؤنده ایدی— سَس’له، ریتم’له. آما دووار نَفَس‌سیز، سَس‌سیز ایدی— منه داها چوخ بنزه‌ییردی.
اونا سؤیکَندیم— دینجَلمَک اوچون یوخ، بیر‌لیک اوچون— سؤزو منیم کیمی نه دئمه‌یَن، نه یازمایان، ساده‌جه زامانا و سوسقونلوغا یئرلَشدیرَن بیر وار‌لیق’لا.
گؤزه گؤرونمه‌یَن کؤلگه‌م یئنی‌دن: خسته‌خانا آلینتی قبضی‌نین سولموش جیزگی‌لرینده
قبض فورماسیندا مورَکَّبی یاییلمیش بیر جومله واردی— “آیهان” آدی سولموشدو. بیر جومله سیلینمیشدی، یانلیش‌لیقدان یوخ، إشیدیلمه‌مکدن.
ایشچی یازدی: “خسته آز دانیشیر.” آما اوستونده داها سولقون بیر سطیر واردی— قیرتلاقدان چیخمامیش، قَلَمین تیتره‌مه‌سینده دوغولموش بیر سؤز.
فورمالار دا یادداشا مالیک دیر— آما یالنیز باشلامایان‌لار اوچون، یالنیز سَس‌سیزلیکده قالا‌ن‌لار اوچون.
**********
دوواردان کئچن، آما هئچ کیمین توتمادیغی جومله
کیم هاردا دیر:
• گؤزه گؤرونمه‌یَن کؤلگه‌م / اوچونجو کیمسه (هئمودیالیز بؤلمه‌سی‌نین دووارینا سؤیکَنمیش)
• اؤزوم / بیرینجی کیمسه (یووارلاق پیلله‌کَنین ایکی مرتبه آراسیندا‌کی بوشلوغوندا)
• گودوکچو / ایکینجی کیمسه (موعایینه اوتاغی‌نین یاری‌آچیق قاپی‌سی‌نین آرخاسیندا، صاحاب‌سیز اؤرتوگون یانیندا)
• گؤزه گؤرونمه‌یَن کؤلگه‌م / اوچونجو کیمسه یئنی‌دن (خسته‌خانانین کؤهنه دوواری‌نین اینجه چاتیندا)
• اؤزوم / بیرینجی کیمسه یئنی‌دن (اؤزونو گؤرمه‌دیگی بیر پنجره‌نین قارشی‌سیندا)
گؤزه گؤرونمه‌یَن کؤلگه‌م / اوچونجو کیمسه (هئمودیالیز بؤلمه‌سی‌نین دووارینا سؤیکَنمیش)
ساغ طرفده‌کی خسته‌نین جومله‌سی قئیدییّاتین ایچینه دوشموشدو— نه یازیلمیش، نه قئید إدیلمیش، ساده‌جه قالیردی، إله بیل سؤنموش جیهازدا بیر شوشه نفس کیمی.
دووار هئچ نه ایسته‌مَزدن بو جومله‌نی اؤزونه چَکدی— سانکی اؤز وار‌لیغیندان خبرسیز بیر یالقیز سوسقونلوق بوتون سؤز‌لری سَس‌سیزجه ساخلاماغی باجاریردی.
اؤزوم / بیرینجی کیمسه (یووارلاق پیلله‌کَنین ایکی مرتبه آراسیندا‌کی بوشلوغوندا)
بو پیلله‌یه آزاراق دوروم‌لاردا گلیرَم— یورقونلوقدان یوخ، پیلله‌لرین بوجاغیندا قالمیش جومله‌لردن قورخدوغوم اوچون. مندن اؤنجه‌کی و سونراکی آددیم‌لار هامی‌سی نه ایسه دئییب— آما من ایکی پیلله‌نین آراسیندا سؤزسوز قالمیشام.
دانیشسام، سَس یوخاری‌دا یاییلاجاق، آما آنلامی آشاغی‌یا چاتمایاجاق. و من یالنیز ایسته‌ییرم کی، جومله‌م ساده‌جه قالسین— دئییلمه‌سین، ساده‌جه دوواردان کئچسین و إله بیر یئرده گیزلنسین کی، هئچ کیم اونو توتماسین، آما او یاشاماغا داوام إتسین.
گودوکچوم / ایکینجی کیمسه (موعایینه اوتاغی‌نین یاری‌آچیق قاپی‌سی‌نین آرخاسیندا، صاحاب‌سیز اؤرتوگون یانیندا)
آیهان، بو گون او دئمک ایسته‌دیگین شئیه بیر آددیم یاخینلاشدین— آما قاپینی تام آچمادین. ساده‌جه اونون آرخاسیندا دایانیب آرتیق سَس اییی داشیمایان بیر اؤرتوگون یانیندا دوردون.
بو اوتاق هر زامان بیر جومله‌نی گؤزلَمیشدی— بَدَنین ایچیندن کئچن و ایکی نفسین آراسیندا‌کی بوشلوقدا قالا‌ن.
سن بیر شئیی اؤتورمک ایسته‌دین— آغیزدان یوخ، داماردان— آما دووار اونو ساخلادی. اؤزون اوچون یوخ، بلکه بیر گون موعایینه‌یه گلَن دوکتور عئینی قاپی‌نین آرخاسیندا سَس‌سیزجه آنلایاجاق دئیه.
گؤزه گؤرونمه‌یَن کؤلگه‌م / اوچونجو کیمسه یئنی‌دن (خسته‌خانانین کؤهنه دوواری‌نین اینجه چاتیندا)
هئچ بیر جومله کؤهنه دووارین اینجه چات‌لاری قدر داواملی اولمامیش دیر.
آیهان اونون یانیندان کئچدی— نه تله‌سیک، نه دوشونجه‌لی، ساده‌جه بَدَنینده بوکولموش بیر جومله ایله.
چات اونو اوددو— إله بیل درد دیر، نه موعالیجه‌سی وار، نه آدی.
اؤزوم / بیرینجی کیمسه یئنی‌دن (اؤزونو گؤرمه‌دیگی بیر پنجره‌نین قارشی‌سیندا)
بو گئجه اؤزومو گؤرمورَم. پنجره منه دؤنوب، آما گؤرگه وئرمیر. بلکه ده ایچیمده‌کی جومله بوتون گؤرونتومو اؤرتموش، إله بیر ایشیق یوخ دیر کی، اونو عکس إتدیرسین.
من دئییلمه‌میشم، آما کئچمیشم— بَدَندَ‌ن، دوواردان، پنجره‌دن. و هله ده بیلمیرَم: اونو کیم توتدو، یوخ’سا ساده‌جه چات‌لارین ایچینده قالدی— سانکی قولاغا یوخ، قالماق اوچون یارانمیش بیر سؤز کیمی.
*************
آرتیق سَس دَگیلدی، باشقا بیر شئیه چئوریلمیشدی
کیم هاردا دیر:
• گودوکچوم / ایکینجی کیمسه (خسته‌خانانین بوجاغینداکی إلئکتریک اوتاغیندا)
• گؤزه گؤرونمه‌یَن کؤلگه‌م / اوچونجو کیمسه (ایشدن دوشموش کؤهنه زنگ‌لرین سَس‌گوجلَندیریجی‌سی‌نین آراسیندا)
• اؤزوم / بیرینجی کیمسه (بئشینجی قاتین توزلو إیوا‌نیندا، یاریمچیق قهوه فینجانی‌نین یانیندا)
• گؤزه گؤرونمه‌یَن کؤلگه‌م / اوچونجو کیمسه یئنی‌دن (یورقانین توکلو قاتیندا، نبض ایله یادداش آراسیندا)
• اؤزوم / بیرینجی کیمسه یئنی‌دن (گئری دؤنمه-یئنی‌لَنمه اوتاغی‌نین سؤنوک ایشقاری‌نین آلتیندا)
گودوکچوم / ایکینجی کیمسه (خسته‌خانانین بوجاغینداکی إلئکتریک اوتاغیندا)
سن آرتیق سَس دَگیلسن، آیهان— سن یورقون تئل‌لرده‌کی گوجسوز وولتلوغا چئوریلیبسَن کی، ایل‌لر دیر هئچ بیر ایشیغی یاندیرمیر. سن داها آیهان آدلی بیری‌سیندن تکجه بیر ایزین-آدین قالیب، یوخسا اولدوقجا أمدن دوشوبسَن.
من بو قاران‌لیق اوتاقدا نوبَتچی‌لیک اوچون یوخ، سَنین دئییشیمینی اوخوماق اوچون دورموشام— سؤیله‌مکدن قالماغا کئچیدینی. سن آرتیق دئمیرسن، سن بیر سؤزون ایچینده‌کی گوجسوز إنئرژی‌سن کی، یالنیز هر شئی سؤننده حیسّ اولونور.
کیمسه آچار دوگمه‌سینی چکسه، بلکه سَنین سَسین قاییدار— آما حرف‌لر کیمی یوخ، دووار بویونجا یونگول بیر تیتره‌ییش کیمی، بورادا یالنیز گودوکچو سنین’له قالا‌ر.
گؤزه گؤرونمه‌یَن کؤلگه‌م / اوچونجو کیمسه (ایشدن دوشموش کؤهنه زنگ‌لرین سَس‌گوجلَندیریجی‌سی‌نین آراسیندا)
بیر زامان‌لار کؤهنه بیر زنگ سَسی یاییلدی— قیریلقان ایدی، و آرتیق سَس دَگیل ایدی. إله بیل توز آلتیندا قالا‌ن بیر دَمیر عکسینی ساخلادی، واختی’یلا بیر سؤزو اؤزو ایله گؤتوردو و هئچ واخت اونوتمادی.
ایندی سَس‌گوجلَندیریجی‌لر ایشله‌میر، هئچ کیم مئساژ وئرمیر، آما دَمیر یووالاریندا بیر تیتره‌ییش قالیر— کیمسه اونو دینله‌مه‌ییب، آما هله ده وار. آیها‌نین سَسی ده بئله اولدو— آرتیق “سَس” دَگیلدی، آما وار ایدی، إشیدیلمَز ده اولسایدی، آنجاق کؤکسوز دَگیل ایدی.
اؤزوم / بیرینجی کیمسه (بئشینجی قاتین توزلو إیوا‌نیندا، یاریمچیق قهوه فینجانی‌نین یانیندا)
فینجانی گؤتوردوگومده قَهوه چوخدان سویوموشدو، آما بوخار، سؤزه چئوریلمیش کیمی، بیر آن‌لیق قیراقدا دایاندی و اؤزونو جاواب کیمی فورمالاشدیردی— نه کیمسه‌یه، نه سَسه، یالنیز منه.
من آرتیق دانیشمیرام— دینله‌ییجی اولمادیغی اوچون یوخ، چونکو سَسیم آرتیق بوخاردا یاشاییر. یالنیز ساکیت نفس آلدیقدا گؤرونور. هله دانیشا بیلسَم ده کیمه دانیشیم آخی…!
بوردان، لاپ یوخاری‌لاردان خسته‌خانانین بوتونو یاتمیش کیمی گؤزونور— آما من اونودولموش بیر فینجانین ایچینده قالمیشام، ایچمک اوچون یوخ، دئییلمه‌یَن سؤزو دینله‌مک اوچون.
اوچونجو کیمسه – یورقانین توک‌لری آراسیندا، نبض ایله یادداشین آراسیندا
یورقان آرتیق بَدَنی ایسیتمز— او ایندی یادداش‌دیر. آرتیق چیخیش یولو اولمایان سَس‌لر اوچون گیز‌لی بیر یئر.
آیهان اؤزونه یومولدوقدا، آغ‌جیگریندن هئچ بیر سؤز چیخمادی، آما یورقان اونو توتدو— بیر ایشیق پارچاسی کیمی، نفسسیز بیر سوال کیمی و نبض ایله یادداش آراسیندا أبَدی اولاراق دولاندی.
هئچ بیر باجان یورقانی آنلامایاجاق— آما من، یومشاق توخوما قات‌لاری آراسیندا بیلیرم کی، سؤز هله ده قالیر، ساده‌جه آرتیق سَس دَگیل.
گؤزه گؤرونمه‌یَن کؤلگه‌م / اوچونجو کیمسه یئنی‌دن (یورقانین توکلو قاتیندا، نبض ایله یادداش آراسیندا)
ایشقار سؤنوب دیر— من اونون آلتیندا اوزانمیشام، إله بیریسی کیمی کی، ایشقار اوچون یوخ، کؤلگه‌ده قالماق اوچون گلیب.
اوتاق نفسسیز دَگیل، آما سؤز بورادا دولانمیر— چونکو هئچ کیم گؤزلَمیر.
من ایچیمده اولمایان بیر سس کیمی حیس إدیرم. بوغازدان کئچیب گؤوده‌یه چاتان بیر آغیرلیق کیمی، کی هله سؤز اولماق اوچون مین بیر دونیا یول گئتمه‌لی دیر.
***********
