بعضن تانیدیق‌لاریمیز اولور، اوزاقدان اوزاغا. بعضن باغلانیریق دا، آنجاق بو اوزاق‌لیق‌لاردا گرچک اؤزوموزو سرگیله‌یه بیلمیریک، اصلینده اینسان‌لارین گرچک اوزونو، گؤز-گؤزه‌لیکده آنلاماق اولور. ایل‌لر بویو یاشادیغیمیز انامیزی، بآجیمیزی، قارداشیمیزی، اتامیزی، بالامیزی و حتتا یاشام یولداشیمیزی بئله، ارامیزدا درین بیر اوز-اوزه‌لیک اوز وئرمزسه، تانییا بیلمیریک، تانیساق دا، چئشیدلی چتینلی، آجیلی، شیرینلی گون‌لر گلیب چاتمایینجا، اونلاری سیناماق اولمور، سیناماق اولمازسا دا، سایکولوق‌لارین کلیشه‌لرینه سیغینیب، دگیشکن اولای‌لارا، کسگین قرار وئرمک، کائیناتین حاققیندا بئله حاق‌سیزلیق اولور، هاندا قالسین قارشیمیزداکی اینسان اولا.
اینسان دئدیگیمیز یالنیز بیر گؤوده‌دن اولوشماییر کی اونو ات ایله سوموک سانیب، واختی ایله آشپازلارین اؤنرگه‌لری ایله اونو یارقیلاییب، دادسیزدیر دئیه، چؤپ کیمی قیراغا قویاق. اینساندا روح وار و اونون روحونو سایمازلیقدان گلیرسک، هَمَن گؤوده‌نی تورپاغا تاپشیرماق دا اولا بیلَر.
سایکولوق‌لارین روتین سؤزلرینی کلیشه‌لره سیغیندیریب، نیسبی اولای‌لارا باغلاییب، کسگین قرارا گلمک، اولا بیلَر کی قارشیمیزداکی اینسانی، عؤمورلوک اولاراق، بیر دؤنه دگیل، گونده مین دؤنه اؤلدورَک. اینسان بیرینی گؤزله‌ییب، اونا چاتماق یولوندا، بوتون چَتین‌لیک‌لره دؤزورسه، دئمک او آدامی تانیییر و اوره‌گی اونون اوچون چیرپینیب، اونو دریندن سئویر. اونا بو دؤزمک اولا بیلَر کی یاریم ساعات تئلئفون آرخاسیندا اولسون، ساعات‌لارجا خیابان قیراغیندا و یا آیلارجا ائوی‌نین بیر کؤشه‌سینده اولسون و اوندان داها اوستونو بو دؤزمک بیر عؤمورلوک ذئهنینده یووا قوروب، ابدی یاشاسین. بئله بیر اینسان‌لار هَمَن او سایکولوق‌لارین کلیشه‌لرینه سیغینمایان‌لاردیرلار. اونلار ائله دگیل کی بیر یئمک کیمی سئویب، گؤیلونوزو چکدیگی آنا کیمی، اونلار ایله اولوب، چیرگیییب، اوره‌گینیزی ووران آندان بری، اونلاری بو دَهشتلی دونیادا اؤز باش‌لارینا بوراخاسینیز. اونلاردا دا احساس وار، شخصیت وار، غرور وار. سیزی اودوزماسینلار دئیه، سیزی اوووج‌لاریندا ساخلاماق اوچون ساواشدیق‌لاری او دئمک دگیل کی اونلار چوخ آشاغی و دوشوک اینسان‌لاردیر، ترسینه اونلارین بو یولدا ساواشدیق‌لاری سیزه قارشی اولان سئوگی و دگردن‌دیر. بعضن اونلار دا یانلیش ائده بیلیرلر و بو اونلارین پیس‌لیک‌لریندن قایناقلانماییر، نه‌دن کی اونلار یالنیز سیزی الدن وئرمه‌سینلر دئیه او یانلیشا اوز قویورلار و اونو سیزین الدن وئرمه‌مک یولدان ساواش یؤنته‌می گؤزونده گؤرورلر.
بعضن سایکولوق‌لارین کلیشه‌لرینه اینانیب، بئله اینسان‌لاری اؤز الیمیزله اؤلدورسک، بیر گون اؤزوموزه گلیب باشا دوشه‌ریک کی، بو بؤیوکلوکده یاشامدا، اونلاردان چوخ و اونلاردان تمیز، سیزی سئویب، دگر وئریب، سیزه ماراقلانان یوخ ایمیش و سیز بئله بیر اینسانی بیر دؤنه دگیل، گونده اونو قبیره گؤموله‌نه‌جن مین دؤنه اؤلدوروبسونوز.
بو یاشامدا هئچ اینسان یاریم قالماز، بلکه یاریم بوراخیلار، یاری یولدا بوراخیلار، بئله اولدوقدا یارالی بوراخیلار و یارالی بوراخیلان اینسانین طالئعی، اؤلدورولَن اینساندان نئچه قات آجی اولار. یارالی بوراخیلان اینسانین حالی دا اؤزلوگونده ماراقلی اولار. سئوگیسی‌نین اوغروندا داریخان بیر اینسانین حالی، هئچ خوش اولا بیلمَز، اؤزوندن کئچیب، دلیجه‌سینه وورقون اولان بیریسی‌نین حالی اوندان دا داها پیس اولار. بو آرا یارالی بوراخیلان بیر اینسانین حالی، بونلاردان دا یوز قات داها آجیناجاقلی اولار. نه‌دن کی او اینسان بیری‌سینه گؤره داریخیردی دا، اونا وورقون ایدی ده، سونرا گلیب یارالی بوراخیلاندا، اؤلومدن داها آجیناجاقلی دوروم‌لاردا دَهشتجه‌سینه هر ثانیه‌سینده اؤلمگی تجروه ائده‌جک. او اینسان بو آجی یارالاری‌نین اورتاسیندا یاشام بویو جان وئره‌جک. اصلینده اونون روحو، اوره‌گینده جان وئره‌جک و بئله دوشونه‌جک کی بوغولور، دوز دار اغآجیندان آسیلان کیمی، آنجاق دار اغآجیندان آسیلان اینسان، بیر دؤنه اؤلوب بیتیر، اما یارالی بوراخیلمیش اینسان، یاشام بویو آسیلماقدا اولاجاق. بو اینسان‌لار ایلک اؤنجه عاغیل‌لاری ایله بو یولا چیخیرلار، سونرا اورک‌لری ایله اولدوغو یول‌لارینا اینانیرلار. بئله دگیل کی عاغیل ایله تیجارته چیخیب، اوره‌گی گؤرمَزدن گله‌لر، یا دا لاپ ترسینه اورک ایله وورولوب، عاغیل‌سیزجا داوام ائده‌لر. اونلارین بو یولدا غرورلارینی آیاق آلتینا آلیب، یالوارمالاری اونلارین دوشوکلوک‌لریندن دگیل، اونلار گرچکدن سئویرلر و او سئوگی تیجارته سیغیلیب، عاغیل ایله اؤلچو-بیچم اولا بیلمَز. او سئوگینی و سئون اینسانی سایکولوق‌لارین تیجارتده اولان ساری یازی‌لاری ایله اؤلچو-بیچیم ائتمک اولماز. او اینسان سیزسیز یاشادیغی بوتون ثانیه‌لرینده، ساعاتی دا، اوره‌گی ده، دونیاسی دا گؤینه‌ییر. او هر آنیندا سیزی یاشاییر، یان-یووره‌سی اینسان‌لارلا دولو اولسا بئله. او زامان بئله بیر اینسانین پایی، یارالی بوراخیلماق دگیل. سایکولوق‌لارین کلیشه‌لری، اونلاری داها بیلگین گؤرسه‌دیب و اونلاری بو یولدا داها زنگین ائتمه قونولار اوزره یازیلیر و اؤزلری بئله یاشام‌لاریندا دئییب، یازدیق‌لارینا اینانج‌لاری اولماییب و بونلاری بیلمک اوچون بارماق سایی‌لارینا گؤز یومساق، چوخ‌لاری‌نین یاشامینا باش ووروب، بئله بیر پارادوکس‌لاری ایزله‌مک اولار، حال بو کی گرچک‌لر هئچ ایکی اینساندا عئینی دگیل و بو کلیشه‌لره سؤیکنمک، ییخیب، ییخیلماغین ایلک آددیمی ساییلا بیلیر.
بیری‌سینی اؤلدورمک اوچون، ایلک اؤنجه اونا محبت ائدین، اونون‌لا اورتاق خاطیره‌لر یارادین، ساعات‌لارجا اونون قولاغینا سس و سسینه قولاق اولون. چئشیدلی بهانه‌لرله اونو شاشیردیب، اونا شن‌لیک باغیشلایین. اونا دؤزون، صبیر داشی و سیرداشی اولون. سیز بو ایش‌لرله اونا یاشام باغیشلاییرسینیز و تام او زامان کی یاشامیندا سیزدن باشقا هئچ کیمی یوخ دیر و یاشامی‌نین آنلامی تکجه سیزین آدینیزدان اولوشور، اونو بوراخین، لاپ یاشامی‌نین ان چتین گون‌لرینده. سیزه هر زاماندان داها چوخ احتیآجی اولان چاغدا، یارالاییب، اونو یالقیز بوراخین. سونرا اونا یاشامی اوزره خوشبخت‌لیک آرزیلایین. شوبهه‌سیز او اؤله‌جک، هر گون یئنی‌دن اؤله‌جک و یاشام وارکن او داها یاشامین خوش اوزونو گؤره بیلمه‌یه‌جک.