سؤزلرین باغرینا هئچ دوشونمَزدن، ائوه کئچیب، دووارلار‌لا دردلَشیرم. بیرآن اؤزومو ایتیریب، آسیلی قالیرام. اؤزومه گلیب، گوزگو قارشیسیندا دورورام. پاسلانمیش چرچیوه‌‌‌‌‌نین قیرمیزی لکه‌لری، گوزگونو اؤرتور. گوزگونون شوشه‌سی چاتلاییر. اۏ پاس‌لارین دیبینده، اۏ چات‌لارین آلتینداکی چاشقین بیر آدام، سانکی نسه آختار‌یر. اۏ چات‌لارین دیبینده هر یئری دومان بورویور. اؤزومو اوشومه‌گه باشلا‌ییرام. کولک پنجره‌دن اۏتاغا گلیر. کولک پنجره‌‌‌نی سیلکله‌ییر. پنجره‌‌‌‌‌نین آرخاسیندا کولکده آغلایان بیر اوشاغین سسینی، سانکی چوخداندیر ائشیدیرم. قولاق‌‌لاریم باشلا‌ییر چاشماغا، آردیندان اؤزومده بوزولورم. قولاق‌‌لاریم دوغرو ائشیدیر. سانکی بیر کؤرپه‌‌‌نی ائشیکده اؤز باشینا بوراخیبلار. کؤرپه‌‌‌‌‌نین سَسی هر آن داها یوکسه‌لیر. بیر سَس قولا‌‌‌غیمدا پیچیلداماغا باشلا‌ییر. باشیمی ال‌‌لریمین آراسیندا توتورام. باشیمی سیخیرام. بوتون بَدَ‌‌نیم تیتره‌‌مه‌گه باشلا‌ییر. دووارا سؤیکه‌‌‌نیرم. باشیمی ترپه‌دیب یئره اۏتورورام. نه واخت کولک ساکیت‌لشسه، آغلاماق سَسی ده دایا‌‌‌نیر. دورقونلا‌شیرام. یاتماق ایسته‌‌ییرم. دوشونمک ایسته‌میرم. بیری سورکلی منه باخیر. آددیملاریمی سا‌ییر. نفسیمی ده عینی. شاختا‌‌‌‌نین سیزی جا‌‌نیما هوپوب، ایستر-ایسته‌مَز تیتره‌‌ییرم. پرده‌لر چکیلی حئکایه‌‌سینی یازماغا باشلا‌ییر. گئجه‌‌دیر، یوخسا گوندوز؛ اۏنو دا بیلمیرَم. اوزون سورج‌دیر قارانلیقدا یاشا‌ییرام. سئویل قارانلیغی سئومیردی. یاغیش یاغیر. یاغیش سینان شوشه‌دن، پنجره تیکیشیندن اۏتاغا گیریر. کولک الیمین جیزیق‌لاریندان کئچیب، الیمین یاراسیندا یووا قورور. نییه قارانلیق قارانلیقدان بو قده‌ر فرقلی‌‌دیر؟ قبرین دیبینده‌کی قارانلیق بو اوتاغین قارانلیغیندان نییه فرقلی‌‌دیر؟ بو اوتاغین قارانلیغی، جنازه‌‌سینی الیم‌له قبیره قویدوغوم قبیرین قارانلیغیندان فرقلی‌‌دیر، اۏ قارانلیغی گؤرَن کیمی، قورخوب، جنازه‌‌سینی یوخاری‌دان قبیره آتدیم. نه قورخمالی ایدی بو قارانلیق!
سئویمین کیرپیک‌لری‌نین آرخاسیندا‌کی قارانلیق، مزارین آلتینداکی قارانلیقدان فرقلی ایدی. قالخیب گئدیب یئمک ماسا‌سی‌نین آرخاسیندا اۏتورورام. باشیمی ماسا‌‌‌‌نین اوستونه قویورام. سوووزورام. ماسا‌‌‌‌نین اوستونده‌کی سو ایستیکا‌‌‌‌نینا دوموب باخیرام. سو ایستیکا‌‌‌‌نیندان باخدیقدا سئویمین چکدیگی رسم ایسلا‌‌‌نیر. باشیمی قالد‌یر‌یرام. سویودوجونون قاپی‌سیندا ایلیشیب قالان رسم اثرینه باخیرام. من، سئویل و سئویم رسمده اگلشمیشیک. رسمده ال‌‌لریمیز بیر-بیرینه توخونوب کیمی گؤرونور. دئدیگی کیمی جَنّت اۏلان یاشیل بیر یئرده. قالخیب سویودوجویا ساری گئدیرم، سونرا بیردن-بیره باشیم گیجه‌لیر. رسم یان-یؤوره‌مده فیرلانان کیمی منی توولا‌ییر. رسمین یان-یؤوره‌سینده فیرلا‌‌‌نیرام. ماشین قاردرئیل‌لره دگیر. سئویم یوخلا‌ییب. سئویل قیشقیریر، باشیم ماشینین اؤن شوشه‌سینه دگیر. الیم ایستیکانا توخا‌‌‌نیر. ایستیکان یئره دۆشور. ماشین دره‌‌‌‌‌نین دیبینه قا‌ییر. آغاج‌لارا دگیر. آیاق‌‌لاریم قیریلان شوشه‌لرین اوستونه گئدیر. آیاق‌‌لاریمین آلتی قانا‌ییر. گئری قا‌ییدیب سئویمه باخیرام. کیرپیک‌لری‌نین آرخاسیندا‌کی قارانلیق، ماشین سوردوگوم گئجه‌دن داها آرتیق قار‌ادیر. قولاغیندان قان سوزه‌رک، ساری سیرقالارینی قیزارد‌یر. مطبخده یئره دۆشورَم، دره‌‌‌‌‌نین دیبینی آغیر بیر سَس‌سیزلیک بورویور. مطبخین یئری قیرمیز‌ییا چئوریلیر. کئشکه کیمسه منی تاپیب بئیینیمه سیلاح دایاسین. یوخسا بوروسونو آغزیمین ایچینه قویوب قیشقیراردی: سوس و یئرینده قال، یوخسا تَتی‌گی چکه‌رَم. کئشکه امر ائدیب فرمان وئرن اۏلسایدی. دوردورماغا بیر فرمان کیمی.
بئله دوشونورم کی هر بیر حرکت و یا ائتدیگیم هر ایش، یا دا وئرد‌یگیم قرارلار، دورومو اۏلدوغوندان دا داها پیس ائدیر. سانکی هر زامان بونو ائتمیشم. بونا گؤره بیر هفته سونرا خسته‌خانادان ائوه گلنده، ائوی ترک ائتدی. یَقین کی، آتا‌سی‌نین ائوی تبریزه گئتدی. نه‌دن کی بو هوندور شه‌هرده، کیمسه‌میز یوخ ایدی. بیر سؤز دئمه‌دی. منه باغیرمادی و منه ائله عذاب وئرن بو‌دیر. ساده‌جه منه باخدی. سانکی من گوناهکار ایدیم و نه بیلیم اۏلا بیلردی کی گوناهکار سا‌ییلام. سئویمین اوتاغی‌نین قارشیسیندا دورورام. اوتاغین قاپی‌‌سینی آچاندا، اوتاغیندا آسیلان دمیر زنگی‌نین سَسی اۏتاقدا ائشیدیلیر. جیرینگ جیرینگ. زنگین سَسی بئینیمده سسله‌نیر. سَسی قولاق‌‌لاریمدا اۏ قده‌ر یوکسک اۏلور کی، قولاق‌‌لاریمی ال‌‌لریم‌‌له توتماق مجبورلوغوندا قالیرام. اۏ قده‌ر کی، باشیم آغری‌ییر.
اۏتاق لاپ قارانلیقدا بوغولور. آیا‌‌غیم یئرده‌کی قولچا‌‌غین اۆزه‌رینه کئچیر. اوتاغیندا ماهنی سسی جالا‌‌نیر. هئی ماهنی تکرارلا‌‌‌نیر. ایکی دفعه، یا دا اۆچ دفعه. منی قه‌هر باسیر. اوتاغین لامپا‌سینی یاند‌یر‌یرام. اوتاغین گوزگو‌‌سونون یا‌‌‌‌نیندا، منیم‌‌له سئویل-سئویمین بؤیودولموش شکلی‌نین اگلشدیگینی ایزله‌‌ییرم. تام سئویمین بیر یاشلی‌‌لیغی. آتا سؤزجوگونون ایلک دفعه دئدیگی گون و بیز، یا‌‌نی سئویم‌‌له من، بو گونو قوتلا‌ییب قئید ائتدیگیمیزی خاطیرلا‌ییرام. بیر فوتوشکیل ایله بو گونو، بو ثا‌‌نیه‌‌‌نی چکیب ساخلاماق ایسته‌‌ییردیک. هئچ بیلمه‌‌ییردیک کی نئچه واختدان سونرا، فوتوشکیل گوزگونون یا‌‌‌‌نیندا یئرلَشیب، سئویمی ایتیره‌جه‌‌ییک. و بو شکیل هئچ بیر زامان بیزیم اوچون سئویم اۏلمایاجاق. یئنی‌دن کؤرپه‌‌‌‌‌نین آغلادیغینی ائشیدیرم. پنجره‌‌‌‌‌نین یاخینلیغینا گئدیرم. بیر چینار آغاجی‌نین بوداق‌لارینا باخاراق. یالنیز ساغا فیرلانان، سولا دؤنن، فیرلانان و یاغیشا باتمیش آسفالتین اوستونه دۆشن بیر یارپاغا باخماق؛ بورایا سپه‌لَنمیش باشقا ساری یارپاق‌لارین یا‌‌‌‌نیندا، لاپ ائله اۏر‌ادا. کیچیک بیر قیز ائوین تام قارشیسیندا، خیابانداکی چینار آغاجی‌نین آلتیندا دوروب، اۏ بالاجا قیز گؤره‌سن سئویم دگیل‌می؟! گؤدَکچه‌‌سی‌نین بویاغی، قیرمیزی رنگده‌دیر. تام سئویمین گؤدَکچه‌‌سی‌نین بویاغیندا. قا‌ییدیب سورعت‌‌له ائنیرم. پیلله‌کن‌لردن جوت-جوت یوخاری ائنیرم. کوچه‌یه چاتیب اۏنون اولمادیغینی حیس ائدیرم. کیمسه آغاجین آلتیندا دگیل. کوچه‌ده کیمسه یوخ‌دیر. دیرکده‌کی ایشیق‌لار، ایشیلدا‌ییب، ایشیق ساچیرلار. نفس‌لریم اوزومون قارشیسیندا بیر آن‌لیق بولودلا‌‌‌نیر، سونرا یوخ اۏلور. سونرا یئنی‌دن گیجه‌لیرَم. آغاجین یان-یؤوره‌سینده فیرلا‌‌‌نیرام. آغاج دا یان-یؤوره‌مده فیرلا‌‌‌نیر. سئویمه دوموب باخیرام، سئویل یاواشجا گؤزلرینی آچیر. آیاق‌‌لاریم یارپاق‌لارین اوستونه سویروشور. سئویل، سئویمی گؤرور، قیشقیریر. سئویمی ال‌‌لریم‌‌له گؤتوروب قالد‌یر‌یرام. یولا ساری گئدیرم. کیمسه یولدا دگیل. یول دومانلی‌دیر. بیر ماشین آیاق‌‌لاریمین اؤنونده ساخلا‌ییر. باشینی پنجره‌دن چیخاردیب سؤ‌یوب، یولونا داوام ائدیر. یولون اۏرتاسیندا دیز چؤکورم. باشیمی گؤگه قالدیریب قیشقیریرام. یاردیم! منیم کیمی بیری‌سی، سسله‌نیب سسی باتیب محو اۏلور؛ اۏ دا یاردیم اوچون باغیر‌یر! دووارا سؤیکه‌‌‌نیرم. کؤرپه‌‌‌‌‌نین آغلاماق سَسی قولا‌‌غیمی بورویور. اینسان‌لار یان-یؤوره‌می توتوب، سَس‌لری آری‌لارین ویزیلتیسی کیمی قولاق‌‌لاریمدا پیچیلدا‌‌‌نیر. اینسان‌لار اؤز ایش‌لری‌نین آردینی توتماق اوچون، یوخ اۏلورلار.
گؤزلریمی آچاندا لامپا‌‌‌‌نین ایشیغی گؤز‌لریمه دۆشور. سئویل سَحَردن بری، سئویمین اوتاغیندا گیریب، هئچ ائشیگه ده چیخما‌ییب. ائوی آغیر بیر سَس‌سیزلیک بورویوب. نه قده‌ر چاغیر‌یرام، اۏندان بیر یا‌‌نیت گلمیر. باشینا بیر اۏیون گتیرمه‌گی‌ندن قورخورام کی. یومروغوم‌لا سئویمین اوتاغی‌نین شوشه‌‌سینی سیند‌یر‌یرام. الیم پارچالا‌‌نیب، قانا بورونور. یئرین اۆزه‌رینه قان تؤکولور. قیریلان شوشه‌لرین اۆزه‌رینه تؤکولور. سئویل ایسه اوتاغین بوجاغیندا اۏتوروب هئچ چؤنوب باخما‌ییر. اۏتاقدا سئویمین گولوش سَسی ائشیدیلیر. سئویل تئلئفونونون ائکرا‌‌‌‌نینا دوموب. نه قده‌ر ایره‌لی‌له‌سم، گولوش سسی اۏ قده‌ر یوکسک اۏلور. سئویمین اوچونجو آد گونونون فیلمینه باخیر. ال‌‌لریمین قا‌‌نی، آیاق‌‌لاریمین اوستونه داملا‌ییر. چیگین‌لری تیتره‌‌ییر. بیر سؤز دئمیر. من ده بیر سؤز دئمه‌‌ییب، هَمَن یئرده اۏتورورام. دووارا سؤیکه‌‌‌نیرم. سئویلین گئدیشیندن اۏن گون کئچیب. ایلک اۏن گون‌ده یئنی‌دن ایچمه‌گه باشلامیشام. ایلک گون ایکی ایستیکان، سونرا دؤرد ایستیکان. سونراکی گون آلتی ایستیکان. ائرته‌سی گون شوشه‌ده‌کی قالان ایچگینی باشیما چکیرم. اوره‌گیم ایچگی ایسته‌‌ییر. دۏلاب‌لاری نه قده‌ر آختار‌یرام، ایچمک اوچون بیر شئی تاپا بیلمیرم. شوشه‌‌‌‌‌نین دیبینده بیر قورتوم بئله یوخ‌دیر. یوخو گؤرورم، یا‌‌نی یوخلادیغیما دوشونورَم. چونکی بیردن قار‌لا دۏلو بیر دوزن‌لیکده دایانمیشام. هر طرفی قار اؤرتوب، باسدیریب. گون دۏغان یئری‌نین دیبینه‌جن آغ بویاقد‌ادیر. دیزه‌جن قارا باتمیشام. قارشیمیز‌دا یالقیز بیر چینار آغاجی وار. قار بوداق‌لارینی اؤرتوب. بعضن بوداق‌لار بونجا قارین آغیرلیغیندا دؤزه بیلمه‌‌ییب، قارلار ایسه یئره ییخیلیرلار. تام آغاجین آلتیندا دایانان کیچیک بیر قیزین آیاق‌لاری‌نین یا‌‌‌‌نینا.
گونش قارشیمدادیر، ایشیغی ایسه دیم-دیک گؤز‌لریمه شاخیر. گؤزلریمی الیم‌له ایشیغین شاخینتی‌سیندان قورویورام. گؤزلریمی قیییب آغاجین آلتیندا دایانان قیزا باخیرام. بور‌ادان یالنیز پئنجه‌گی‌نین رنگی بیلینیر و قیرمیزی پئنجَک گئیینیب، آغاجا ساری گئدیرم. آتدیغیم هر آددیمدا دیزه‌جن قارا باتیرام. اوزومله قارین اوستونه دوشورم. اوزوم سویوقدان سیزلاییر. قار الیمین یاراسینا کئچیر. قالخیب دوز قاباغا باخیرام. چینار آغاجی‌نین آلتیندا. سئویم آغاجین آلتیندان ترپنمه‌‌ییب. آیاق‌‌لاریمی قارین آلتیندان چیخاردیب، بو دؤنه داها یئیین قآچیرام. هاوانین شاختا‌سی سینه‌مده یئرلَشیر. آغاجا چاتدیغیمدا، اوردا اولمادیغینی باشا دوشورم. باشیمی چئویریب بوتون دوزن‌لیگه باخیرام. قار‌لا دولو او دوزن‌لیکده، کیمسه یوخ‌دیر. گؤزلرین گؤره بیلدیگی نؤقطه‌یه‌جن یالنیز قار و قار وار. هئچ بیر آیاق ایزی اولمازدان. قارغا دوزن‌لیکده قیشقیریر. اۏ قده‌ر یوکسک قیشقیریر کی، قولاق‌‌لاریمی ال‌‌لریم‌‌له توتماق مجبورلوغوندا قالیرام. بیر دسته قارقا آغاجین بوداق‌لاریندا اوتوروبلار. سَس‌لری اۏ قده‌ر یوکسک‌‌دیر کی، من اویا‌‌‌نیرام.
بَدَ‌‌نیم تر‌لی‌‌دیر، جا‌‌نیم اوشویه‌رَک باشیم فیرلا‌‌‌نیر. کولک پنجره‌‌‌نی آچیب. هر کولک اسنده پرده‌لر ترپه‌‌‌نیب، دوردوغوم یئردن، یالنیز چینار آغاجی‌نین بوداق‌لاری گؤرونور. آرتیق سنین ائوین اولمایان بیر یئرده، اویا‌‌نیق کابوس‌لاری، گئجه‌‌‌‌‌نین گؤوده‌سینده‌کی کابوس‌لار کیمی، نه قده‌ر چتین، نه‌‌قده‌ر آجی‌دیر. قاپی-باجاسی سنه بونو دئییرلر کی، بوراسی آرتیق سنین ائوین دگیل. من ایچگی ایسته‌‌ییرم. آیاغا قالخیب ائشیگه چیخیرام. دیره‌گین لامپاسی یاندیریلیبدی. خیاباندا آزاراق اینسان‌لار‌لا راستلاشماق اولور. کوچه‌‌‌‌‌نین آسفالتی یاغیش‌لا ایسلا‌‌نیب. کوچه‌‌‌‌‌نین باشیندا دایانان بیر اوغلاندان ایچگی آلیب، پئنجه‌گیمین جیبینه قویورام. هردن الیمی جیبیمه سالیب، اونا توخا‌‌‌نیرام. هاوا سویوق‌دیر و پئنجه‌گیمین یاخا‌سینی قالدیرمالی‌یام. ایندی ده یئنی‌دن گوزگو قارشیسیندا دوروب، بو دؤنه یالنیز ابدی ایچ‌سیز اولان گؤرونمز بیر گوموشه بَنزَر یئری گؤرورم. مطبخه گئدیب، سویودوجونون قاپی‌سینا یاپیشمیش سئویمین رسمینی قوپارد‌یرام. سئویمین اوتاغینا گئدیرم. رسمه میریدیب، باخیرام. سئویمین رسم ائتدیگی جَنّته دالیرام. قه‌هرله‌نیرم. آغاجین یاشیللیغیندا بیر داملا شورالمیش گؤز یاشیم دامیر. بویاق‌لاری یا‌ییلیر. سئویمین یاراتدیغی رسمی، پنجره‌‌‌‌‌نین قاباغیندا قویورام. قولچاغی‌نین سسلَندیره‌‌‌‌‌نینی دۏلاندیریب، ماسا اوستونه قویورام. سَسی اوتاغین سَس‌سیزلیگینده قالانان اۏد کیمی فیرلانماغا باشلا‌ییر. قالخیب سوبانین یا‌‌‌‌نینا گئدیرم. سوبانین قوشومونو چیخارد‌یرام. گاز موسلوغونو آچیرام. شاختا پنجره‌دن اوتاغین ایچینه جومور. قالخیب پنجره‌‌‌نی باغلا‌ییرام. خیابانا باخیرام، سئویم اورادا، بیر آغاجین آلتیندا دایا‌‌نیب.
اۏتاقدا گازین ا‌ییی یا‌ییلیب. اوره‌گیم ایچگی ایسته‌‌ییر. شوشه‌‌‌نی، فینجا‌‌نی الیمده توتورام. دوردوغوم یئردن بیر دسته قارقا، آغاجین بوداق‌لاریندا اوتوروب، سَس‌لری هر آن داها یوکسَلمکده‌‌دیرلر. کؤرپه‌‌‌‌‌نین آغلاماق سسی داها اوجالیر. سانکی بیر کؤرپه‌‌‌نی خیابان قیراغیندا بوراخیب گئدیبلر. بو آندا، یالنیز ایچمک ایسته‌‌ییرم.
هاوا قارانسا‌ییر. اوشویورم. گئجه اولور. یالقیزام….
2013/۱۲/۱۸ ساعات ۰۴:۴۸ – کرج
دقت: بو حئکایه بوندان اؤنجه «یئنی قاپی» سایتیندا یاییلیبدیر: https://yeniqapi.com/?p=6256
