جیزگی‌لر ایتی،
بویالار توتغون،
سس‌لر قولاق یوران…!
یادیرقانمیش احساسیمی قینامیرام:
نه کپه‌نک اوچوشوندان
دوداغیم قاچیر،
نه بیر چیچک سولماغیندان
گؤزلریم دولور؛
ایتیرمیشم سرحدینی سئوینجین، غمین
اونوتموشام لذتینی بوتون عالمین…
هارای دوستوم
توت الیمدن!
شئح چیلنمیش جیغیرلارا
ایزلریمی سال!
یاشیل مخمر چیمن‌لره
باخیشیمی سر!
قولاغیما
بولاقلارین نغمه‌سینی دامیزدیر!،
قوی یئنه ده
اینسان کیمی آغلاییم، گولوم!
