سن ایله قول- قولا بیر آیلی گئجه
ساحیله چیخدیق،
دایانیب کؤرپوده دوردوق؛
سولار آخدیقجا داشین چیینین آلیردی
شپه‌لر گئت- گئده قالخیب اوجالیردی
اوزاغا گؤز قارالیردی.
قارا ساچلارینا آی هاله سالاندا
گولوشوندن، گول اوزوندن یاش آخاندا
سیغینیب داغ کیمی قوینوندا اوجالدیم،
قورویان جاندا جان آلدیم.
گؤی اوزونده آیا، اولدوز ساتاشار کن
ایاق آلتیندا سو ایله آلاچینقیل دالاشار کن
سئوگی قات- قات قالانیردی،
منده بیر سن یاشانیردی.
ایللر اوندان سورا او آیلی گئجه خاطیره قالدی،
سن گئدرکن
بیر سینیق کؤرپو، حزین سو
داریخان کؤنلومه دولدو.
یاپا یالنیر گزه‌رک
ساحیلی سنسیزلیین آلدی
آیدا نور هاله‌سی قالدی
ایشیق آنلار دا قارالدی
ائله بیل دونیا دارالدی.
او گولوش دالغاسینی یادا سالارکن
دویغولار منده دوغارکن
گؤزومو یاشدا بوغارکن
اوره‌ییم غم‌لره دالدی
منی مندن یئنه آلدی.