(جانینی خالقینا فدا ائده‌ن انقلابچی شاعر «مرضیه احمدی اسکویی»نین شرفلی خاطیره‌سینه)
بوگون «پامنار»ین کوچه‌لرینده یئره سریلدی
سن گؤنولو مئیدانگاها واریب یووارلانارکن.
گنج‌لرین نبضی مرمی ووردو او گوندن بری،
جسارت آخدی شه‌هرین دامارلاریندا…!
هئی،
اوجا بویلو قاراساچلی سرویم!
قارا ساچلارین بوتون اویماقلاری سیزلامیش حزین- حزین؛
یارالی اویلاقلاردا دالاشیب،
بوتون اوبالاری آغلاییب ظولوم- ظولوم.
گون دوغمادان
ساعات بئش‌ده یوللانان یولچولارین
آچیق ایسته‌دییی گؤزلرین،
اییلیب اؤپموسن
شام آغاجیندان اوجا دوران گونشین دوداقلاریندان.
هئی،
جئیران باخیشلی «مرجان»یم!
حیاتین اصیل معناسی‌دیر سئوگین یئنه؛
هله‌ده
بو یئرلرده سئونلر سجده قیلیر
سن گئده‌ن یوللارداکی آیاق ایزلرینه.
هله‌ده
قورشون باخیشلاریندا تیتره‌ییر
بارماغی تتیکده‌کی کندیر چکن‌لرین اللری؛
ظولمت دونیاسینا مئیدان اوخویور
جسارتین قیزیل گونش سحری.
هئی،
مارال گؤزلو گؤزه‌لیم!
واراقلا عؤمرونو،
سؤیله دلی جئیران
سن یاغیش‌می‌سان یوخسا گونش؟!
سن یاغان چؤللرده
تاخیل بیتیب اؤزون بویدا
ساری ساچلاری دن‌له دولو؛
کولک ترننوملو آلتون داراق‌لار گزیشیر
مئشه‌سینده او ساچلارین.
بیر قاییت باخ،
یئللره سوورولور تئل- تئل اولموش بایراق.
هئی،
اوجا بویلو قارا ساچلیم!
مارال گؤزلو گؤزه‌لیم!
جئیران باخیشلی «مرجان»یم!
یادیندامی
کئچن یای بو چؤللرده
قیزیل بوغدانی باششاقلاییب سوتول اوتوردون؟
ایندی او سوتول دادلی خاطیره‌لرینله یاشاییر چؤللریمیز،
خاطیره‌لی اللرینله قیزینیر اللریمیز.
هله‌ده
او قیزینتی کئچیر کؤکسوموزدن؛
نفس آلیریق سندن،
جئیران باخیشلی «مرجان»یم!
جانیم!
۶ اردیبهشت ۱۴۰۴
0 پاسخ
👏👏👏