(تیراختور تیم‌یمیزه و بوتون تیراختورچیلارا تقدیم اولور)
فوتبول،
هر شئیدن اونجه بیر ایدمان.
توپلومسال بیر ایدمان.
آرتیق قلوباللاشمیش دا.
آرتیق سیاساللاشمیش دا!

فوتبول،
هر دؤنه تزه.
تکرارسیز تزه.
ایکراه‌سیز تزه.
هئچ ایکی اویونو عینی اولمادان،
هئچ ایکیسی عینی اولمایان اینسانلار کیمی تزه.
تزه جانلار کیمی تزه.

فوتبول،
بیر گونجل یاشاییش.
یانی،
سئویلمک،
کئچمیشینه واریلمادان.
یانی،
سئومک،
قورخمادان، داریلمادان.

فوتبول،
گرگ‌لیلیک‌دیر.
گرک‌سیزلیک دئییل.
فوتبول،
بیزلیک، سیزلیک‌دیر.
تکجه بیزلیک دئییل.
تکجه سیزلیک دئییل.

فوتبول،
هرکس اؤز یئرینی تاپماق‌دیر.
هرکس اؤز حاققینی قازانماق.
هرکس اؤز ده‌یرینی آلماق‌دیر.
فوتبول،
یازماق‌دیر.
یازماماق دئییل.
یازانماماق دئییل.
سؤی کیمی‌دیر ده فوتبول،
سربست سؤی کیمی.
بیر ته‌هر قلیب‌لی سؤی‌لرین سربست‌لییی کیمی‌دیر ده.
بلکه ده،
سؤی‌لریمیز فوتبول کیمی‌دیر.
اؤیله کی؛
یئرلریمیز فوتبول کیمی‌دیر.
گؤی‌لریمیز فوتبول کیمی‌دیر.

فوتبول،
یاریشا-یاریشا باریشماق‌دیر.
باریشا-باریشا یاریشماق‌دیر.
فوتبول،
بیر ته‌هر قایناییب قاریشماق‌دیر.

فوتبول،
آلیشماق‌دیر.
یانماق‌دیر.
یاراتماق‌دیر.
فوتبول،
یارانماق‌دیر.
هیجان‌دیر، احتراص‌دیر.
عصیان‌دیر، اعتراض‌دیر؛
عدالتسیزلیییه قارشی.
برابرسیزلیییه قارشی.

تبلیغات یازیسی‌دیر دا فوتبول.
تبلیغات ایکرانی‌دیر دا.
یانی،
عاید اولدوغو خالقی،
دونیا خالقلارینا تانی‌دیر دا.

فوتبول،
بیر درام اثر،
دوخسان دقیقه‌لیک؛
اینسان عؤمروندن.
اینسان حیاتیندان.
یانی،
غمله، دمین قارشیلیلقلی نمایشی.
یانی،
دم‌لنمک گریینجه.
غم‌لنمک یئترینجه.

یاشاماغی باجارمایانلارا درس ده اولا بیلر فوتبول.
یانی،
اودارکن سئوینمک،
غم‌لرینی سایا سالمادان.
یانی،
اودوزارکن غم‌لنمک،
وایا قالمادن.

فوتبول،
هامیلیق‌دیر.
یانی،
آغلی- قارالی، ساریلی- قیرمیزلی‌دیر.
یانی،
فوتبول آغ‌دیر.
یانی،
یاشاماق‌دیر.
یاشاماق‌دیر یانی هرنه‌دیر.
آنجاق،
بیر شئیی منی یامان اینجیدیر؛
فوتبول توپونو وورا- وورا،
بیرواخت دا گؤرورلر،
اؤزلریده،
بیر فوتبول توپونا چئوریلیب‌لر ایستادیوم‌لار آرا فوتبولچولار
آی فوتبولو سئونلر
آی فوتبولچولار!
1386