قادینلار…
قادینلار…
بو قادینلارین دوداقلاری تورپاق بویالی
ساچلاری باریت قوخولو.
بو قادینلارین سؤزلرینده مرمی شاخیر
نغمه تراوتلی دانیشیقلاریندا مینا پارتلاییر.
بو قادینلار
دوشکالارلا قول- بویون یاتیرلار
بو قادینلارین آغیزلاریندان
راکئتلرین هنیرتیسی پوسگورور.
بو قادینلارین
اؤلومله گرگیشن گؤزلری هله ده قادین‌دیر.
یاخشی باخ!
اونلار کیمسهلره اؤلومو اوجوز ساتیرسالاردا
میلیونلارا سئوگی پایلاشیرلار.
بو قادینلارین بیر ال‌لرینده داشا دؤنموش چیچک
دیگر ال‌لرینده یوموروقلانمیش اوره‌ک؛
یول آچیرلار
قول- قولا وئریب خیاوانلاری آددیملاییرلار
آیاقلاری آلتیندا
قوشلارین یئره سوزموش اوره‌ک یاغی چیچک دوغور.
بو قادینلارین ساچلاری آل- الوان پاییز یارپاقلاری؛
چیراقگازلاردا بوغازیندان آسیلان
سوچلو بایراقلاری هله ده دالالغالانیر.
بو قادینلارین نفسی وولکان،
اؤزلری سئوگیلی جانان.
باغریما سیغینمیش آغری‌دیر اونلارین گؤزلری.
«دونیانی بیر گؤزده گؤرمه‌یه بیریسی ده کفایتدیر،»- دئییرلر!
من گئجه یوخودا گؤروردوم-
گؤزلرینده ایشیق گؤیه‌ریب؛
دئمه یئرین قاتلاریندان اؤلوم قایناییر،
هندهوریمیزده نیفرت قوخویور؛
گؤزلرینیزه بیر واخت وئرین دینجلسین …
بو قادینلارین ایچینده
حبس اولونموش عصیرلرین زققوم خاطیره‌لری.
دارتیب دووارلاری، چئینه‌ییرلر مفتیللری
زینه زینه آخیرلار کؤنلونه حیاتین.
بویلانیرلار بتونلاردان اوزو یوخاری
تاوانین چاتلاریندان زینه- زینه سوزه‌ن ایشیغی ایچمه‌گه.
بو قادینلار
هاوالانیب،
کندیره بورونوب
گئدیرلر بیزدن اوزاق‌لارا،
داها اوزاق‌لارا …
اسفند ۱۴۰۳
