زیروه‌لرده دؤیونن اوره‌ییم
رابرت برنز (شاعر اسکاتلندی ۱۷۵۹ – ۱۷۹۶)
Robert Burns
My Heart’s in the Highlands
من اؤزومله دئییلم،
منیم اوره‌ییم زیروه‌لرده دؤیونور،
من اوره‌ییمی زیروه‌لرده ایتیرمیشم؛
وحشی مارال‌لارین،
چایلاقداکی بالیق‌لارین آراسیندا.
منیم اوره‌ییم زیروه‌لرده دؤیونور
هاردا او‌لارسام
خوشجا قالین سئوگیلی زیروه‌لر!
خوشجا قالین قوزئیین داغ‌لاری،
ایگیتلرین دوغما دیاری!
هاردا آوارا او‌لارسام،
هارایا اوز قویارسام،
بو داغ‌لارین اتک‌لرینه وورغون قالاجاغام
حیات اولانا قده‌ر.
من اؤزومله دئییلم،
منیم اوره‌ییم زیروه‌لرده دؤیونور،
من اوره‌ییمی زیروه‌لرده ایتیرمیشم؛
وحشی مارال‌لارین،
چایلاقداکی بالیق‌لارین آراسیندا.
هاردا او‌لارسام
خوشجا قالین زیروه‌لر!
خوشجا قالین قارلی داغ‌لار!
خوشجا قالین بوغاز‌لار!
خوشجا قالین توم آغاجلی دره‌لر!
خوشجا قالین مئشه‌لر!
خوشجا قالین اوچوروم‌لار اوسته کی آغاج‌لار!
خوشجا قالین قاسیرقا‌لار، شیمشک‌لر!
من اؤزومله دئییلم،
من اوره‌ییمی زیروه‌لرده ایتیرمیشم،
هاردا او‌لارسام
خوشجا قالین منیم سئوگیلی زیروه‌لریم!
