گجیل بازارچاسی آدام الیندن قیمیلداییر، باساباس‌ایدی، آل- وئر ایچینده‌ میرتا بازاری دا دیزدن‌ایدی، ایتهله‌مه‌، سورته‌له‌مه‌ داها نه‌دئییم. بیری او باشدان چیغیریردی: «اولان قادیر، سورت گئتسین!»، قادیرده‌ سورته‌- سورته‌ بازارچانی باش- ایاغ ائله‌‌ییردی. مئیوه‌ ساتانلار هره‌سی بیریاندا چیغیر- باغیردایدی‌لار: «اوجوز ائله‌دیم کاسیب دا یئسین»، «تازه‌ گولبه‌سر»، «مشددی قت‌دی»، «جوما آخشامی‌دی الی بوش گئتمه‌ ائوه‌، شرمنده‌ اولارسان»، … ابراهیم یاخینلاشیب بیرینه‌ دئدی:
– مشه‌دی ایکی کیلو کپک آلماسی وئر.
– اوغلان آلا بونو دا ایکی کیلو چک حاجی‌یا! حاجی دای نه‌ وئریم؟
– ساغ اول گؤرر.
– جوما آخشامی ایکی کیلو آلمادان نه‌ چیخار آخی؟
– مشه‌دی، ذهنین دوورودو ها!
– آی قارداش سنین نییه‌ دیمدیغیوا ده‌‌ییر، دئییب گولمه‌سک کی دیغلییاریق، دونیانی اؤزونه‌ چتین توتما، بو دا کئچر.
– کئچر مشه‌دی … ، آمما ایت کوره‌دن کئچن کیمی.
– الله‌ مین برکت وئرسین.
– وار اول.
مشه‌ ابراهیم آلمانی آلیب گجیل بازارچاسیندان ائشییه‌ چیخماق ایسته‌‌ییردی، بازارچانین گیره‌جه‌‌یینده‌ غلام کیشینی گؤردو.
– سالام آ کیشی، نئجه‌سن؟
– بای، علیکالسلام مشه‌ ابراهیم، اؤزون نئجه‌سن، اشی اوزووی گؤراخ.
– من ده‌ یاخشییام، والله‌ هره‌ بیر جوره‌ گرفتاردی، سندن ده‌ نئچه‌ واختدی خبر یوخدور.
بازارچانین آغزیندان خیاوانین قیراغینداکی آغاجین کولگه‌سینه‌ چکیلیب، صؤحبتلشدی‌لر:
– غلام کیشی شیکارا گئدیرسن؟
– آ کیشی شیکار هاردئیدی، دئنه‌ ائویزه‌ گئده‌ بیلیرسن؟ کئچن ایل سیزینله‌ آرمیدلیغا گئتدیگیم‌دی. اوندان بو یوزه‌ آروادین خسته‌لیینه‌ گرفتارام. او دوزلمه‌میش اؤزومونده‌ دیسکیم پاتدییب. کیلوودان آرتیق گؤتورنمیرم.
– بس نه‌ عجب گجیله‌ گلمیسن؟!
– گئجه‌ اوشاقلار گله‌جاقلار دئدیم بیرآز قارین- قورساق آلیم نوه‌لریم صبحانییه‌ یئسینلر.
– نه‌ گؤزه‌‌ل؛ بؤیوک آتا اولماغین دا باشقا دادی وار.
– هه‌ هم دادی وار، هم ده‌ کی خرجی. سن نه‌ عجب، مئیوه‌ آلماغا گلمیسن؟!
– هه‌ رسول تصادف ائلییب دئدیم بیر ایکی کیلو مئیوه‌ آلیم گئدیم گؤروشونه‌.
– هانسی رسول؟
– کوچه‌ باغلی رسول.
– په‌ آتوونان هئچ خبریم اولمویوب. وضعیتی نئجه‌دی؟
– ائله‌ تعریفی یوخدور. قول- قیچی بوتون پلاتین‌نیدی، هر یانین پیش- مؤهره‌ باغلییبلار.
– بالام ال ساخلا من ده‌ گلیم بیرلیکده‌ گئده‌ک. دایان من ده‌ بیر ایکی کیلو مئیوه‌ آلیم الی بوش گئتمییاخ.
– نئجه‌ ایسترسن، آمما قارداشی رحیم دئییردی دوکتور ملاقاتی قداغان ائلییب دئییب قویون یاخشی دینجلسین. عملدن چیخیب قورخورلار بدنی میکروب آلسین. من ده‌ اوزومه‌ سالمیشام، هئش بیلمیرم قویاجاقلار یا یوخ.
– بابا بوراخ، اشی نئجه‌ قویمازلار، بئش دیقه‌ گؤروب دوراریخ. سن بیر نئچه‌ دیقه‌ دایان من قاییددیم.
مشه‌ ابراهیم اؤز ایچینده‌ دارتینیردی بابا بو نه‌ ایش‌ایدی منی توتدی، من نییه‌ دئدیم گئدیرم ملاقاتا، آخی اؤزومو قویوردولار بونو دا اؤزومه‌ یئنگه‌ ائله‌دیم! بو فیکیردیدی غلام کیشی الینده‌ ایکی قره‌ پلاستیک تؤشویه‌- تؤشویه‌ گلیب چیخدی.
– گئش گئداخ.
– غلام کیشی ایکی پاکات آلیبسان.
– بیری لیمودی ناخوشا، او بیریسی‌ده‌ قارین- قورساخ‌دی نوه‌لریمه‌.
– بس سن کیلودان آرتیق گؤتورنمیردین، بونلاری اؤزوونن داشییاجاقسان؟
– نیگران قالما، اونا دا چاره‌ قیلارام. گئش گئداخ، یوبانساخ شاما ساخلارلار.
– معده‌وه‌ یئرسیز قول وئرمه‌، نه‌ شامی؟
ایکیسی یوللانیب ترمینالا طرف. گجیل قاپیسینا یئتیشمه‌میش مهرعلی جیز- بیزچی‌نین توکانی‌نین قاباغیندان کئچرکن، غلام کیشی دئدی:
– ابراهیم دایان بو قارین قورساغی قویوم مهرعلی‌نین توکانینا، قاییدیب گؤتوررم.
بونو دئییب دؤزمه‌دن گیردی ایچری:
– سالام مهرعلی. نئجه‌ وارسان؟
– سالام غلام کیشی. سن نئجه‌سن؟
بو جمله‌نی دئیینجاق بیر اووج آغزی‌نین تورتاسین سپدی غلام کیشی‌نین اوزونه‌. الله‌دان نه‌ گیزلین؛ توپورجه‌یی‌نین یاریسی‌دا تؤکولدو جیز- بیزین ایچینه‌.
– ساغ اول مهرعلی، بو نایلون قالسین بوردا قاییدیم گؤتوروم.
– هه‌، عیبی یوخدو. قوی اورا. هارا ایشالله‌؟
– کوچه‌باغلی رسول تصادف ائلییب، مشه‌ ابراهیمینان گئدیروخ اونون گؤروشونه‌.
– به‌ من ده‌ گلیرم. هانی ابراهیم؟
– یوخ قارداش، من اؤزوم ده‌ زوراکی سوخولموشام ابراهیمین قولتوغونا. ناخوشون وضعیتی یاخشی دئییل، ملاقاتا قویمورلار. دوکتور قداغا ائلییب.
– به ‌سیز نییه‌ گئدیرسیز؟
– قارداش خاطییا قالدیق ها، ایسته‌میرم، منیم نایلونومو وئر من گئدیم.
– سیزه‌ نه‌، من اؤزوم گئدیرم.
مهرعلی بونو دئییب پئشگیره‌سین چیخارتدی، اوز توتدو شاگیردینه‌:
– قنبر توکانا باخ، من تئز قایدیرام!
– باش اوسته‌، آرخایین اول. من وارام.
بو حالدا مشه‌ ابراهیم کی ائشیکدن اونلارین چکیش- برکیشینه‌ شاهید ایدی، ایچری گیریب دئدی:
– مهر علی سن اولماز. انشاا… سن ده‌ صاباح گئدرسن. قوی هله‌ گؤروم غلام کیشینی نئجه‌ یئر به‌ یئر ائلیرم.
– سنین ایشین اولماسین، من اؤزوم دوزلدرم.
– دده‌ن یاخشی، ننه‌ن یاخشی، نه‌یی دوزلدرسن؟ دییرم دوکتور دییب ملاقات اولماسین، سن دییرسن دوزلدرم؟
– من دوزلدرم.
بونو دئییب اودا بیر ایکی کیلو مئیوه‌ آلیب، آغیر آغیر یولا دوشدولر. مشه‌ ابراهیمین هئچ گئتماغا ایاغی گلمیردی. هاندان هانا گلیب چاتدیلار رسول‌گیلین قاپیلارینا. مهرعلی قاپی‌نین زنگینی باسیب باخدی ابراهیمین اوزونه‌، گولومسه‌دی. قاپینی آچماغا بیرآز گئجیشدیلر. مهرعلی ال آپاردی بیرده‌ زنگی باسسین، مشه‌ ابراهیم الیندن توتوب دئدی:
– بیرآز دایان، باش گتیرمییبسن کی!
مهرعلی هئچ نه‌ دئمه‌دن الین چکیب دایاندی. بو حالدا حیطدن بیری سسلندی:
– کیمسن؟
ابراهیم دئدی:
– رحیم! بیزوخ.
رحیم گلیب قاپینی آچدی، گؤردو اوچ نفر دایانیب قاپیدا. اوز توتدو ابراهیما:
– مشه‌ ابراهیم خئیر اولا؟
– والله‌ اوزوم قارا، گلمیشوخ رسولون عیادتینه‌.
– چوخ ساغ اولون. ممکن دییل. دوکتور دییب ملاقات قداغاندی.
– دای گوذشت ائله‌، بوراجان گلمیشوخ، ایاغ اوسته‌ رسولو ایکی دیقه‌ گوراخ گئداخ.
– بابا تلفوندا دئدین، من ده‌ دئدیم یوخ. اصرار ائله‌دین دئدیم اؤزون گل گؤر گئت. ایندی اوچ نفر گلیبسیز؟
بوحالدا گؤزو توخوندو مهرعلی‌یه‌، دوداقلاری قاچدی، تئز اؤزونو ییغیشدیردی، حیرصینن دئدی:
– بونو نه‌یه‌ گتیرمیسن؟
– والله‌ من گتیرمه‌میشم، گؤردو گلیریخ ملاقاتا، اؤزو باشین سالیب گلیب. من ده‌، بو غلام کیشی ده‌ نئچه‌ دؤنه‌ دئدوخ اولماز قوی قالسین سورویا، قبول ائله‌مه‌دی.
غلام کیشی دیله‌ گلدی:
– آی رحیم، چتین توتما ایکی دیقه‌ گوروب دوراجاغیخ.
– آغا غلام، بابا بیز اونو پیش مؤهره‌اینن باغلامیشیخ. او دوغرودان سالیم آدام دییل کی. دوکتور دییب نه‌ دینسین، نه‌ دانیشسین، نه‌ ایندیرین، نه‌ دیندیرین، نه‌ گولدورون. ایندی بو مهرعلینی گؤرماق همین، هیریلدییب لخلییه‌جاق. نمنه‌ پیش مؤهره‌سی وار آچیلیب تؤکوله‌جاق. خواهشن گئدین بیر ایکی هفته‌ سونرا گلرسیز.
ابراهیم دئدی:
– آی رحیم سن دوز دییرسن. بیز گره‌ک گلمییدوخ. بیرآز گؤبودلوق اولدو. سن اوزولمه‌، بیز تئز دوراجاغیخ، سؤز وئریرم گولماق گولدورماق یوخدو. دانیشدیغیمیز اؤلومدن، تصادفدن، آجی خبرلردن اولار کی گولماق اولماسین.
رحیم باشین توولاییب قاپیدان چکیلدی کنارا، قوناقلار ایچری گیرسینلر.
– نه‌دییم والله‌، سیز داها نه‌ جور آدامسیز، بیلمیرم!
یالله‌، یالله‌ دییب ایچری گیردیلر. سلاملاشیب اوتورماق ایسته‌دیلر. رسولون خانیمی اوشاقلاریندان سووای قایناناسی، قاینآتاسیدا ائوده‌ایدی‌لر. رسول مهرعلینی گؤرماق همین باشلادی هیریلداماغا.
رحیم دئدی:
– داداش سنه‌ الله‌ بیرآز گؤزله‌. نئچه‌ گوندو یاتمامیشیق. اؤزون ده‌ کی بوگونده‌سن. باشیوا دولانیم گولمه‌.
ابراهیم دئدی:
– رسول، قوربانین اولوم بیرآز دایان، باخ رحیم زورونان بیزی ایچیری قویوب. سن گولسن بیزی اؤتورجاق ائشییه‌. هله‌ نئجه‌‌سن؟ شوکور اللها ائله‌بیل دئییشلردن بیرآز سازالییبسان.
– هن یاخشییام. فقط بو ایاغیم کی گؤیدن آسیلیب بیرآز اذیت ائلییر. قالانینا تابلاشیرام. سیزدن نه‌ خبر؟
– رسول سن دانیشما. بیز ده‌ بیرآز اوتوروب گئدیروخ. انشالله‌ کئفین بیرآز سازالدی گلیب دویونجا صؤحبتده‌شروخ.
ابراهیمین آردینجا غلام کیشی دئدی:
– رسول والله‌ لاپ ازولدوم سنی بو حالدا گؤردوم. اما سن گینه‌ یاخشیسان، کئچن ایل گئتدیم رضا گؤورچینین ملاقاتینا، کئچن قیشدا گئتمیشدی امام آغاجیندا گؤورچین اوولوماغا، قایادان بودورویوب توللانمیشدی، قول- قیش، بئل- باش، آغیز داغیلمیشدی. ایندی ده‌ ائله‌ بیل سیندیربولت کسیب، ایری- ایری یئرییر، اونو دا چلیی‌نن. نه‌ یئریماق، ایکی آددیم آتیر اون دیقه‌ دینجلیر.
بو سؤزو ائشیتدیکده‌ رسولون گولوشو پوزولدو، قایناناسی گیردی سؤزه‌:
– الله‌ ائله‌مه‌‌سین، انشالله‌ بیر ایکی آیا دوزه‌لییب گئده‌ر ایشینین باشینا.
– انشالله‌، من ده‌ اونو دییردیم کی رسولون وضعی رضادان چوخ یاخشیدی. اینانیرام کی هئچ ایکی آیا دا چکمه‌‌سین.
ابراهیم مجادله‌نی قورتارسین دئیه‌، سؤزه‌ باشلادی:
– یوخ اللها چوخ شوکور رسولون وضعیتی یاخشیدی. بو نه‌دی کی. منیم دده‌مین عمواوغلوسو گئتمیشدی قره‌داغ کتدلرینده‌ جوما بازارینا. قاییداندا مشک‌عنبر ماحالیندا یوخلویور، نیسانینان گئدیر دره‌یه‌. الله‌ شاهیدی صاف یئری قولاغینین دالیسیدی. اون دؤنه‌ عمل ائله‌دیلر. هله‌ ده‌ بدنی دولودو پلاتیننن. بوتون پیش مؤهره‌ایدی. سن نییلیسن دوردو ایاقا، ایندیده‌ یاشییر. البته‌ دئییم کی بیر قیچین کسدیلر، ولی قولتوق آغاجینان ائله‌ بیل قیرقیدی. مندن ده‌ سالیمدی. من یئردن قالخاندا هلیکوپتر کیمی اون دؤره‌ دولانیرام اؤز باشیما بلکه‌ ایاغ اوسته‌ دورام، ماشالله‌ او قوش کیمی قولتوق آغاجین توتوب قالخیر، هئچ اوخ دا دئمیر.
– آی قارداش سن الله‌ آجی آجی دانیشیب منیم بو کوره‌کنیمی اوزمویون.
– یوخ باجیم نه‌ اوزمه‌یی، ماشالله‌ رسولون وضعیتی اعلادیر. شوخلوق دئییل او تصادفدان بوجور قورتارماق هر اوغولون ایشی دئییل.
بو حالدا مهرعلی کی دینمز اوتورموشدو قولاق آسیردی سؤزه‌ گلدی:
– مشه‌ رسول گونلرین بیر گونو …
بونو دئماق همین رسول باشلادی گولماغا. قارداشی رحیم وضعیتی گؤروب دئدی :
– آقا مهرعلی سن ساخلا انشالله‌ سون کی مجلسیه‌. قرار اولدو داداشی گؤلدورمیاخ.
– بابا نه‌ گولمه‌سی، بیر تصادف گلیب باشیما اونو ایستیردیم نقل ائلییم.
– سن الله‌ بیرآز قیسسات.
– بعلی دئییردیم. گونلرین بیر گونو. توکاندیدیم گئتدیم مچید حیطینه‌ سو باشینا چیخام. ایشیمده‌ بیرآز تله‌سیک ایدی. گیردیم مچید حیطینه‌، بیرآفتافا گؤتوروب، کئچدیم ماوالا ساری. اوهه‌ دئدیم، اوهه‌. او بیریسینه‌ کئچدیم اوهه‌ دئدیم، اوهه‌. دء او بیریسینه‌ کئچیب اوهه‌ دئدیم، اوهه‌. آخیرینجیسینا کئچیب اوجادان دئدیم اوهه‌. جاواب گلمه‌دی. گینه‌ اوهه‌ دییب قاپینی آچدیم. دئمه‌ بیری اوتورموشدو گوژ وئریردی، من قاپینی آچماق همین قالخیب ال آتدی منیم خیتدییمه‌. ائششک اوغلو ائششک گورموسن قاپی باغلیدی. آز قالیردیم بوغولام آفتافاینان چیرپتدیم باشینا. الین خیتدییمدن چکدی یاپیشدی یاخامدان. من اونو سورودوم او منی، چیخیدیق حیطه‌ اودا طهراتسیز، شالواری دوشموشدو ایاغینا. منی ده‌ دستشویی کیریخدیرمیشدی، بیردن گؤردوم کی کیم؟ سن دئنه‌ کیم؟ منیم بیبیم اوغلو فرضعلی. سن تصادفه‌ باخ ها، من اونو هئچ ایللرینن گؤرمه‌رم.
هاممی شاخ شاققیلدییب گولوردولر کی گؤردوخ رحیم دوشوب رسولون اوستونه‌، رسول گولور، بوتون بدنی گولماقدان تیتیریر، رحیم یالواریردی:
– داداش سنه‌ الله‌ گولمه‌، سنی بالاوین جانی گولمه‌، بوتون امگیمیزی بو قورومساق هئچ ائله‌دی. ابراهیم گؤتور بو دییوثی چیخارت ائشییه‌. داداش سنی منیم جانیم گولمه‌. زن دادش اؤتور ائشییه‌ بو قورومساقی …
ابراهیم، غلام کیشینی قووزویوب یاپیشدی مهر علی‌نین الیندن. دور گئتداخ، سیشدین خئییر برکتینه‌ …