یورولوب زامان
یورولور جاهان،
یورولوب سرت قایالی داغ‌لار-
آغناییر دره‌لره؛
دولایی‌لار یوروبدور اوزانان یوللاری
ایتیریب کلفچه‌سینین اوجونو آغ بیرچک قاری.
یورغون هاوادا
یورغون یوللاری
یورغون آیاقلاری‌ایله یورویوب
دایانمادی بیر آن-
اوره‌یی آیاغی‌ایله آیاقلاشانا قده‌ر.
۷۵ باهار کئچدی باشیندان
اؤزونه هئچ بیر شئی ایسته‌مه‌دی ۷۵ یاشیندان؛
اولدوقلارینا آدینی یازمادی،
وارینا گؤز یومدو؛
هر نه‌یی
یالنیز انسان اوچون پای اومدو.
ایللرجه
پنجره آرخاسیندان
شه‌هرین سیرلی بوجاقلارینا بویلاندی؛
دؤنه- دؤنه
سحرین آلا تورانیندا
قارانلیق کوچه‌لرده سومسونن
قوتور کؤپک‌لرین هورمه‌سیله اویاندی؛
کیمسیز، کیمسه‌سیز یاشادی-
یاریم عصیر قاچاق،
عؤمور بویو قوچاق!
۲۵ اسفند ۱۴۰۳
