داغ – داغا آرخا دورار
داغ – داغی یاشادار
آمما،
هر داغ ابدی قالماز،
هر داغ ابدی یاشاماز.
داغلارین حیاتی
ات- قانینا باغلیدیر.
درین قاتلی بوزلار
سینه‌سینی سیویرر آپارار،
جوشغون سئل‌لر
داش- قومون یوووار.
دلی باشلی توفانلار
هئیکلین یونار، آپارار.
قاسیرغالار اونا مئیدان اوخویار.
بو دؤیوشدن ساغ- سالامات قورتاران
یاشایار یوز ایللرله،
مین ایل‌لرله،
یاشاییب ابدی قالار.
بو دؤیوشدن قورتاران
تکی او داغلاردی کی،
دامارلارینی کؤکله‌دیب تورپاغین درینلیگینه
او سیویریلیب
یویولوب
یونولدوقجا،
کوکره‌ییب اؤز ایچیند‌ن پوسکورر،
یاراسین ساغالدار،
او یئنه یاشایار.
1392