او گئجه‌نی غزل‌گیلده قوناق ایدیم. ائولرینی تانیمیردیم. اَلیمده تکجه بیر آدرس وار ایدی. اؤز دئدییی کیمی دوغوم گونو اوچون بالاجا بیر شادلیق تؤره‌نی ایدی. غزل ایله بیر فاکولته‌ده درس اوخودوغوموز اوچون، ایستر – ایسته‌مز هردن گؤزلریمیز بیر – بیرینه ساتاشیب، زامان اؤتدوکجه آرامیزدا بیر تانیشلیق یارانمیشدی. ایلک دانیشیغیمیز دا بیر سینَما سالونوندا اولموشدو. «تولستوی»ون «آناکارنینا» آدلی رومانیندان چکیلمیش فیلمی بیاض پرده‌ده ایزله‌مک اوچون چوخ تصادوفی حالدا بیر – بیریمیزه راستلاشماق کیمی بیر زاد. غزل، یونیوئرسیته‌ده تئاتر یؤنتمنلییی اوخویارکن من ده یوکسک لیسانس اؤیره‌نجیسی اولاراق ادبیات اوخویوردوم. ندنسه غزلی هر گؤردوکده اوره‌ک دؤیونتولریمی توتا بیلمیردیم و اونون باخیشلارینا گؤز تیکرکن، او دا مجبور اولمادان دوردوغو یئردن چکیلمیردی. من اؤزومو اونا واله و وورغون حیسّ ائده‌رک غزل‌له دانیشماغا نه بیر سؤز تاپا بیلیردیم، نه ده بیر باهانا؛ آمما او، سینما سالونوندا فیلمین باشلانماسینا خاطیر انتظار چکدیییمیز آنلاردا، آرامیزدا سوکوتو سیندیریب گولر اوزله «گؤزلرین دانیشسادا هئش واخ سسینی ائشیتمه‌میشم» دئیه اَلیمدن یاپیشیب آدیمی سوروشدو. آدیمین «روشن» اولدوغونو بیلرکن او دا آدینی، سوی آدینی، سئودییی رنگ‌لری، گول‌لری و عقرب بورجوندا دوغولدوغونو آنلادارکن دوستجا یاشاماغیمیزی ایسته‌دی:
– یولداش اولاراق یالنیزلیق‌لاری پایلاشاق کی سونوندا یا ائولنه‌ریک یا دا عشقین و سئوگی‌نین دادینی چیخارداراق گوله – گوله هره اؤز یولوموزا گئده‌ریک.
غزل بیر نئچه آن ایچره اوره‌یینده هر نه وارسا بوشالدارکن اونون جسارتینه حئیران قالاراق تئلفون نومره‌سینی وئردی. غزلی آرتیق تانیدیقجا حیسّ ائتدیم او منیم آیریلماز بیر پارچام ایدی کی ایندییه‌جن اونسوز کامیل دئییلدیم. من اؤز ایچیمه جومان، غملی کدرلی، استرسلی، اوتانجاق و خلوتی سئوه‌ن بیر آدام ایدیم و او بیر یاشام بومباسی کی هیجان و سئوینجی‌له منی اؤز دونیامدان آییریردی.
غزل قاپینی اوزومه آچدیقدا اَلیمده‌کی گول دسته‌سینی آلیب قوخلارکن هئچ بیر قالابالیق گؤرمه‌دن دوروخوب شاشدیم. آنجاق اونا «اییی کی دوغدون» دئیه ائو سکوت ایچره جانسیز ایشیقلارلا دالغالانیردی. او منی گؤرجک پیانویا ساری گئدیب نغمه‌لر قاناد آچدی. غزل‌له باش باشا یالنیز اولاراق، اونون پیلَکلی مونجوقلو ماوی بیر دون ایچره نه قَدَر گؤزل گؤرونمه‌سی منه بیر رؤیا کیمی گلیردی. او یام یاشیل گؤزلری‌له منه اورمان‌لاری خاطیرلادارکن سانکی آیاقلاریم یئردن اوزولموش کیمی ایدی. غزلین بئلنکی بیر سورپیرز‌له منی قارشیلاماسی و بئله بیر شاعیرانه حیسِ‌لری ایچیمه آخیتماسی، منه داهادا چوخ عجیب گلیردی. دوغوم گونو اوچون آی اولدوزلو بیر کئیکی منیم اَل‌لریمدن یاپیشاراق بیرگه کسمه‌میز و ییرمی ایلی گؤسترن عطیرلی یانان شام‌لارین آلاوینی وار گوج ایله بیر آندا پوفله‌مه‌سی، منه سعادت دولو آنلار یاشاداراق باشلادیق رقص ائتمه‌یه. غزلین گؤزلرینده دنیز‌لرین درینلییینی و اونلارین چئشیدلی رنگ‌لره دوشمه‌سینی دویارکن، عشقی دوشونوردوم کی بیر آن دا هر یئر ایشیقلاندی و اوزه‌ریمیزه چیچک سَپیله‌رک، ایکی نفر اَل چالاراق ایره‌لی گلدیلر. غزلین آتا آناسی ایدی‌لار و منی اؤپوب باغری‌لارینا باساراق غزله تبریک دئییب بیر کادو وئردیلر. قیزیللی الماسلی بیر آغ قوش ایدی کی اونو بیر زنجیردن آساراق بوینونا سالدیلار. بو آندا بیر پارا جوان اوغلان و قیز دا ایچَری گیریب غزل‌له منی دؤوره‌لرکن چال چاغیر و شنلیک سسی ائوی بورودو. سونرا هامینی یئمه‌یه دعوت ائدیب کئچدیک دال حَیَطده‌کی صفالی بیر باغچایا. غزل منی قرارسیز گؤره‌رک دئدی:
– آرادا بیر آز چیلغینلیق یاشاسادا منی باغیشلارسان.
سونرا اوغلانلی قیزلی دانسا گیریب جینسئل جاذیبه‌لرله اَل آیاق اوینادارکن بیردن بیره غزلی اؤزوندن چیخمیش گؤروب چکدیم کنارا. الکل، توستو وکریستال تک پارلایان شیشه توزلاری اَل اَله گزرکن قافام ائله قاریشمیشدی کی سانکی بو دونیادا دئییلم. آنجاق هله غزل ایله بیرگه او دورومدان بیر نئچه آددیم اوزاقلاشمامیشدیق کی بیردن بیره باشیمدا بیر شوشه سینیب گیجه‌لرکن اوتوردوم یئره. اؤزومو تاپدیقدا باشیمدا بیللور بیر گولدان سینسادا قان آخماسینا باخمادان اوردان آیریلدیم. دئمه کی من غزلین بیر اوغلانلا دانس ائتمه‌سینه مانع اولونجا اونون حالین توتموشام و او دا بئلنکی بیر ایشه اَل آتیبدی.
غزل دفعه‌لرجه گؤروشومه گلسه ده، اونو بیر سئوگیلی کیمی یوخ بلکه بیر دوست کیمی قارشیلاییب صمیمی باغلانتیلاریما سون وئرمک ایستیردیم. غزل‌له منیم فرقلی دونیالاریمیز وار ایدی. عائیله طرزیمیز و چئوره‌لریمیز فرقلی اولاراق بیز ادب، تربیت و شرف سایدیغیمیز شئی‌لر اونلارین گؤزونده بیر تَهَر کؤهنه عادت‌لر ایدی‌لر.
عشقه، گؤزللییه، کولتوره، هُنره و بیر پارا دویغولارا ده‌یَر وئردیییم حالدا، غزلی گؤرمکدن چکیندیم و یونیورسیته‌نی بتیردیکده چیخدیم گئتدیم سربازلیقا. آنجاق هر نئیله‌سم ده غزلین یاشیل گؤزلری اوجسوز بوجاقسیز اسرارانگیز بیر جنگل کیمی هئی یادیما دوشوردو. آنا کارنینا فیلمینی ایزله‌دیییمیز آنلار یادیما دوشوردو و غزلین دئدییی سؤزلر ظولمته چئوریلمیش دونیاما ایشیق ساچیردی:
– دوغرو عشق و محبت، قیغیلجیم قده‌ر سیجاق و اینجه اولسادا، یئنه کؤنول‌لری مقدس آلاولار کیمی قیزیشدیرا بیلر.
آنلامیشدیم کی اینسان سئوگی اوغروندا اوزاقلارا قاچسادا، اؤزوندن و کؤنلوندن قاچا بیلمز.
بیر گون آنام تئلفون آچیب داریخدیغینی دئیه‌رک مندن ایسته‌دی کی بیر نئچه گون مرخص‌لیک آلیب گلم ائوه. بیر ایکی گون کئچمیشدی کی بیر گئجه اوتوبوس‌لا یولا چیخیب صوبح اذانی اولدوقدا چاتدیم شَهریمیزه. عائیله‌دن نیگران اولورسامدا اونلاری ساغ سلامت گؤردوکده اوره‌ییم یئرینه گلدی؛ آمما هاننان گئژدن ائشیتدیم کی غزل کسیک دامارلاری ایله خسته خانادادی و اینتحاردان قورتولونجا ایلک ایسته‌یی منی گؤرمک اولوبدور.
غزلین سولغون باخیشلارینی گؤرجک، اَل‌لرینی اَلیمه آلیب گؤزلریمین یاشینی توتا بیلمه‌دیم. سونرا اونو هله ده سئودیییمی آنلادیب بو عشقی یاشایاراق یاشاتماغا سؤز وئردیم. بو آندا غزلین بستری اولدوغو اوتاغا بیر داها دؤنوب باخاراق گؤردوم کی تکجه ایکیمیز قالمیشیق و ندنسه، هامی قویوب گئدیب‌لر.
1384
علیرضا ذیحق
چئویرن: علیرضا ذیحق
ترجمه: علیرضا ذیحق
سسلندیرن: علیرضا ذیحق
- حئکایه
- اوخوماق زامانی: 3 دقیقه
- https://ishiq.net/?p=36029
چاپ
