مارالیم! قلبیمین جوشان پیناری. ساری ساچلی گؤزل قیزیم! اینسانلار بو دونیادا نه ائتمه‌دیلر کی؟! گاه حرامی، اَهریمن و شیطان اولوب دونیانی و وارلیق‌لاری، قارانلیقلارا سورودولر. خیال‌لاریندا گاه جنت یاراتدیلار، گاه دا جهنم. آمما بو دونیادا اَن اؤنَمسیز، تکجه اینسان‌لارین سعادتی اولدو. بیر پارا آدام‌لاردا ساواش‌لار و قاوقالار یاراداراق بیر کوپه قیزیل، بئش قاریش تورپاق و دؤرد گونلوک قودرته خاطیر، یئر اوزونده اؤزلرینه جنت قورماغا چالیشدیلار. تانری‌یا قولوق دئیه، اؤزلرینی تانری‌دان اوستون سایدیلار. آسدیلار، کسدیلر، توتدولار و قولدورلوقلا، حاققا و دوزلویه اینانان و اسکی قارا دوشونجه‌لری قارقیشلایانلارا قان اوتدوردولار. عصیرلر بویو ائله اینسانلار بو سایاق گلیب نسیل‌لر دَییشیلدی، آمما یئر کوره‌سینده، زامان – زامان باخیشلار دَییشیلدی و شنلیک‌له یاشایانلار دا اولدو.
مارالیم ! بونلار بیر طرفه؛ طبیعت اینسانلارا و بوتون جانلی وارلیق‌لارا حیاتین شیرینلییین دادیرسادا، سئلی ده اولدو، فیرتیناسی دا. زلزله ده قوپدو، وولقان دا. یئر اوزونده تورپاقلار بؤلوندو و هر یئره بیری صاحیب اولاراق، وطن یاراندی و وطنه محبت ده اولدو، تعصوب ده؛ آمما یئر اوزونده اینساندان باشقا هرنه جانلی وارسا و حتا ییرتیجی اولانلار تای‌لارینا تای توشلارینا دوست اولوب، آرخا دوروب آجلیقدان گَبَرسه‌لرده، اَت‌لرینی یئییب قانلارینی تؤکمه‌دیلر.
مارالیم! بونلارلا بئله، اینسانلار ایچره درین اینجه دویغولو و جانلارا ده‌ین جانلار دا اولدو. آداملار بیر پارا آداملارا اینسان دئدیلر و بیر چوخونا دا اَهریمن. اهریمنی آداملار، شیطانی لعنت‌لسه‌لرده ایچ‌لرینده بالالییان شیطانی گؤرمزدن گلیب اوره‌ک‌لر پارچالادیلار.
بونلاری دئدیم سؤز آچاق گونش سیمالی و سینه‌سی آی اولدوزلو ساری گلین‌دن؛ ساری گلین‌ین حئکایه‌سیندن.
مین‌لر ایل اؤنجه، تبریزده هله گؤی مچید تیکیلمه‌دن و اورمودان گلن آتلار کیشنه‌ییب خزرین قوینوندا دالغالار رقصه گیره‌ن اودلار دیاریندا، مَلَک روحلو اینسانلار، اَهریمن و دئو صیفتلی آداملارلا ساواشا گیریب بؤیوک بیر قاوغا یاراندی. او زامانلار و او آنلاردا، گونش قیزیل ساچلارینی هؤروب سما‌دان یئره قوناراق، نه گون باتان وارایدی نه گون چیخان. آی اولدوزلار وار ایدی، آمما ایشیقسیز و گؤرونمز. ظولمتین نه اولدوسونو هله اینسانلار آنلامیردیلار. آمما گونش‌ین آلتین ساچلاری، آداملاری ایکییه بؤلدو. بیری‌لری اونو جاندان سئویب وارلیغینا شوکر ائده‌رک، ائل‌لرینه گلین آپارماق ایسته‌دیلر؛ بعضی‌لری ده اونو اوغورلویوب آیدینلیغی بوغاراق، قارانلیق ایش‌لر سایه‌سینده جَهلی، خورافه‌نی و یالانی یالتاقلیغی یایماغا چالیشدیلار. گون اوگون اولدو کی اهریمن دوشونجه‌لی آداملار، بولور قلب‌لی آیدین اینسانلاری قانا بولاشدیریب اعتراض فریاد‌لارینی سوسدوردولار و گونشی اسیر آپاردیلار. اونلار ظفر تاپدیقدا، آیدین فیکیرلی اینسانلار ماهنی‌لار قوشدولار:
ساچین اوجون هؤرمزلر، گولو قونچا دَرمزلر… ساری گلین
بو سئودا نه سئودادیر؟ سنی منه وئرمزلر…
نئیلیم آمان، آمان، آمان… نئیلیم آمان، آمان… ساری گلین
اهریمن‌لر گونش‌ین آلتین ساچلارینی قیریب یولارکن، تکجه اونون ساچسیز سیماسی قالدی و سؤنمز ایشیغی. اینسانلار ایسه ماهنینی دوام ائتدیلر:
بو دره‌نین اوزونو، چوبان قایتار قوزونو… قوزونو…
نه اولار بیرگون گؤره‌م نازلی یاریمین اوزونو…
نئلیم آمام، آمان… نئلیم آمان، آمان… ساری گلین
گونش گؤردو خئیر ایله شر یئر اوزونو بورودو و داها، چوخ قلب‌لره نور اثر ائتمیری. بو اوزدن، گونش قیزمارلیغینی آرتیریب گؤی‌لره ساری قاناد آچاراق، کهکشانلارین پارلاق گلینی اولدو و کهکشاندا ائله یئرده بیر قصر قوردو کی، یئرکوره‌سینی گاه قارانلیغا بوغدو، گاه ایشیق‌لیقلا آیدینلاشدیردی و گونشه وورغون اولان اینسانلار ماهنی‌لارینی بئله قورتاردیلار :
عاشیق ائللر آیریسی، شانا تئللر آیریسی… ساری گلین
بیر گونونه دؤزمزدیم، اولدوم ایللر آیریسی…
نئیلیم آمان، آمان… نئیلیم آمان، آمان… ساری گلین
سونو بللی اولمادان، او گونلردن مین‌لر اؤتدو و اؤته‌جکدیر، آمما حیات دوردوقجا، آلاولار یوردوندان، ساری گلین ماهنیسی، مین‌لر بوغازدان سسله نرک، گونشین قولاغینا چاتیب، جانینا جان قاتاجاقدیر.