بیزیم بو معلیمیمیز او قده‌ر سؤزه باخماز ایدی کی آتاسی دا اونون قولاغی‌نین آغریسینا باخمایاراق، دفعه‌لرجه قولاغینی چکمیشدی. وار دؤولتی دده ائوینده بوراخیب پول قازانماق اوچون کَت‌لره یول دؤیموشدو، آما بیلمیردی کی عاققی والدین اولماغین آللاه طرفیندن نه قده‌ر جزاسی وار و او جزاسینی ایلک گوندن چکمه‌یه باشلادی.
دیپلم آلیب معلم یازیلمیشدی. او زامانلار ائله دئییلدی کی ایشسیزلیکدن معلیم اولماق دا بیر یاغلی ایش اولا و بیر دئوین بورنوزونو سیندیرماق کیمی چتین. ائده بیلردی بانک‌دا، عدلیه‌ده و چئشیدلی اداره‌لرده استخدام اولا، آما او گئتمیشدی معلیمچی‌لیک دالیجا و دئییردی عشقیم اونادی. آتاسی ها دئمیشدی عالی تحصیلات آل تا کی کند معلیمی اولماق عوضی بیر یونیورسیته‌ده اوستاد اول، قولاغ آسمامیشدی و فیکر ائدیردی کی نه قده‌ر تئز معلیم اولورسا او قده‌ر چوخ جماعتین یاراسیندان تیکان چیخارداجاقدی.
آتاسی اونون قولاغینا نه قده‌ر اوخوسادا کی اصلن درسی مشقی اؤتور گل بازاردا تاجیرلیک ائله، اونون قولاغینا باتمامیشدی؛ تا کی بیر گون پاتداغا باتاراق گؤرموشدو گوناهلار هامیسی اونون قولاغیندا ایدی. سؤز دینله‌مک سانکی اونا گلمه‌میشدی. تا کی بیله‌سینی بولبول‌آباد کندینه معلیم یوللادیلار. ایکی ساعات کنده پیادا حالدا و ماشین‌لا یول دؤیه‌رک گؤردو مدرسه دولودور بوشونان. نه پنجره‌سی وار نه قاپ باجاسی، نه صندلی وار نه میزی. گئتدی کدخدانین سوراغینا. گؤردو به نه دئییر او باشا دوشمور، او نه دئییر بو باشا دوشمور. سانکی کدخدانین قولاق‌لاری آغیر ائشیدیردی. آنجاق بیری کی اونون دیلینی باشا دوشوردو دئدی: «مندن ائشیتسن گئت دالان دا دؤنوب باخما. اوشاقلار نه فارسی بیلیرلر نه تورکجه. یعنی سنین ایشین سویوق دمیر تاپداماق اولاجاق. حتتا توتاق کی یئنه گلیب مدرسه‌یه قاپ باجا سالالار گینه ایکی اوچ گونون قوناغی‌سان سن.»
بیزیم معلیمیمیز کی بو ایشی عشق و کؤنول ایله سئچمیشدی یئنه بو سؤزلری سانکی قولاغی ائشیتمه‌دی. آز گئتدی چوخ گئتدی و یولون چوخون باشماق داغیداراق، تاکی یئتیردی اداره‌یه. قضیه‌نی دئدی کی دام- دوواردان باشقا اوردا هئچ زاد یوخدی. جماعت ده باشقا دیلده دانیشاراق دئدیک‌لریندن باش آچانمیرام. منی وئرین آیری کنده. آما هئچ کندده بوش یئر یوخ ایدی و دئدیلر بو ایلی اوردا گئچین تاکی گلن ایل بیر فیکیر قیلاق. بیله‌سینه بیر بنا نئچه فعله وئریب قاپ باجانی یئنی‌دن آسماق اوچون اونلاری یولا سالدیلار. میز صندل ده وئریب دیلیندن کاغاذ آلدیلار کی بونلارین بیری ایتیرسه یا مدرسه‌یه خسارت یئتیریرسه پول‌لارینی سندن آلاجاییق.
بیزیم معلیمیمیز کی سئوینجک اولموشدو هر نه کاغاذ کی قاباغینا قویوردولار ایمضالاییب بارماق باسیردی. بیر آی درس ایلیندن گئچمیشدی کی مدرسه ایپه ساپا گلدی. آما هله کیمسه اوشاغینی مدرسه‌یه یازدیرمامیشدی. دوشدو قاپی قاپی شاگیرد آختارماغا، آما یئنه کیمسه‌نی باشا سالانمادی. تا کی ژاندارمانین گوجونن یئددی نفر تاپیلدی که مدرسه‌یه گله. او تورک، کیتابلار فارس، شاگیردلر تات. نه بو بیر شئی قاندیرا بیلیردی نه اونلار بیر شئی قانیردیلار. باشیندان توستو قالخیب آز قالا دلی اولسادا، یئنه معلیمچی‌لیک اونون عشقی اولوب اَل چکنمیردی. کیلاسلارا بو گونلوکله دوام ائدیردی کی بیر گون گلدی گؤردو نه تکجه قاپی پنجره و میز صندل‌لر یوخدولار، بلکه دام دوواری دا سؤکوب آپاریب‌لار. بیر اَلی اولدو بیر باشی و قاچدی اداره‌یه. دورومو آنلادارکن اداره اونو سوچلو بیلیب اوستونه شیکایت ائتدی. دئدی‌لر گتیر وئر بیزیم پولو.
بیزیم معلیمیمیز نئیله‌سین نئیله‌مه‌سین، کتدی‌لرین اوستونه شیکایت ائتدی. آما پاسگاه دئدی: قیرخ ائو وار اوردا کی قیرخی‌نین دا یوزه یاخین اوغورلوق دوسییه‌سی وار. کیمسه‌نین بوینونا ییخماق اولماز، مگر اینکی گؤزونله گؤره‌سن و نئچه نفر شاهیدین اولا. شیکایتی رد اولدو وگئتدی شاگیر‌لرینین سوراغینا کی سانکی اصلن اونو تانیمیردیلار. ایش‌لری اولموشدو یا مال اوتارماق یا فرش توخوماق. بیر قادینا راس گلدی کی آز چوخ تورکو بیلیردی و دئدی: «تا ازیلمه‌میش یئرین، قولاغین دیبی اولماییب بوردان چیخ گئت. شوکر ائله کی اؤزون اوغورلاماییبلار. وار دؤولتلی بیری اولسایدین بیل کی سنی ده اوغورلویوب عائیله‌ندن پول کسه‌جَی‌ایدیلر.»
معلیم کی هله بیر تیکه چؤره‌ک قازانمامیش دده‌سی‌نین آیاغینا دوشموشدو کی بلکه دؤولتین پولون وئریب اونو زینداندان قورتارا، بو شریف شوغلو بیر دفعه‌لیک اؤتوردو و دده‌سی قولاغیندان یاپیشاراق آپاردی قویدو بازارا کی باشلاسین آل وئره.
ایندی اوتوز ایل او گونلردن گئچیر و بیزیم معلیمیمیزین دوغوزو اسکیک اولاراق، دونیانین کئفینی چیخادیر و اوتوز ایل خیدمت‌لرینی بیتیرن معلیم‌لر معاشین یئتمه‌مه‌سی اوزره، شریف شوغلو‌لاری یا تاکسی سورمک دی یا کی دووارلار دیبینده اوتوروب بدبخت‌چی‌لیک‌لرینی یادا سالیب تسبئح چؤوورمک.