شخصی حیس‌لردن آسیلی هونر
قارنی آج یوخسولون نه‌یینه گره‌ک؟!
هونری هونرچون بیلن کیتابلار
ویتیرین دالیندا قالاق- قالاق‌دیر
«حبیب فرشباف»
گؤرکملی شاعر «حبیب فرشباف»ین زنگین یارادیجیلیق خزینه‌سی، آذربایجان ادبیات ساحه‌سینده درین آلقیشلارا لاییقدی. خصوصا ۵۹-نجی ایلده نشر اولموش «قره‌داغ کندلری» آدلی کیتابی، دولغون معنالی بدیعی بیر یارادیجیلیغا مالیک بیر اثردیر. بو کیتاب شاعرین ۱۳۴۴دن ۱۳۵۵- نجی ایل‌لری احاطه ائده‌ن اثرلرینه شامیل اولاراق، اونون هر آلوولو میصراعسی زحمتکش خالقین اینجه دویغولارینی ترنم ائدیر و اونلارین هر هانسی سیخیتی‌لار ایله یاشادیقلارینی خاطیرلایارکن زحمتلرینه و آلین ترلرینه درین حؤرمت بسله‌ییر:
ائل دردی اولمازسا ائل‌لر سؤزونده
زاماندان زامانا او آخیب گلمز.
دویغولو ائل شاعری، «کؤچ» آدلی شعرینده ائلاتلارین قورتولماز درد و نیسگیل‌لریندن سؤز آچاراق صنعتکار بیر رسام کیمی اونلارین یاشامینی بدیعی صورتده ترسیم ائدیر و گؤزل معنالی بئله بیر تمثیل یارادیر:
هر شئیین کؤهنه‌سین آتیر، ترک ائدیر
تازالیق دالیجا ابدی گزیر
بو ائلین دبی‌دیر، ائل عادتی‌دیر
حرکت اینسانین سعادتی‌دیر
شاعر، اینسانین وارلیق و سعادتینی حرکتده وتلاشدا گؤررکن، کؤهنه قورولوشلارا و جهالته قارشی، موباریز بیر اینسان کیمی جبهه آچیر و ظولم ایله استثماری دارما- داغین ائده‌ن اینسان هیمَّتی، اونون قوتسال ایده اللارینا چئوریلیر.
حبیب فرشباف، حقیقت وورغونودور. حقیقتی و اَمه‌یی دونیادا اَن یوکسک قووه بیلیر. خلقی آلدادان و اونلارا یالان ساتان استبداد قوللوقچولارینی اودلو و دوشوندوروجو قلمی ایله سانجارکن، حقیقتی بئله وصف ائدیر:
یالان حقیقته غالیب اولسادا
بو غالیبیتین عؤمرو آز اولور
اینسان سارسیلسادا، تسلیم اولسادا
حقیقت ابدی سارسیلماز اولور
طبیعت اونون شعرلرینده یئنی بیر جان تاپارکن، برکت و ایلهام قایناغی ساییلیر و حیاتین واز کئچیلمز گؤزللییی اولور. او آذربایجانین گوزل و دؤزوملو قادینلارینا گلرکن اونلارین دوغال گؤیچک‌لیک‌لرینی بئله وصف ائدیر:
چرچی‌لر ماتیک ساتماز، گلین‌لر بزه‌ک بیلمز
طبیعتدن وسمه‌له‌نیب چاتما قاشلار بیزیم یئرده
گاهدان ایسه دوزگون اینسانلارین بیرپارا آلچاق، ساتقین و ثروت دوشگونو اولان آداملارلا و طبیعت آراسیندا اولان دؤیوش‌لریندن سؤز آچیب یوخسول و اَزیلمیش کوتله‌لرین داها آرتیق غلبه‌سینی آرزولاییر:
اینسان گولدوره‌جک طبیعت اوزون
او غالیب گله‌جک طبیعته ده
کسیب یئر اوزوندن شرّین کؤکونو
چاتاجاق عشقه ده، محبته ده
سون سؤزده دئمک کی «دیرناقی له یئر ائشیب اَمه‌یی ضایا گئده‌ن» و «آلین تریله بیر تیکه یاوان چؤره‌ک تاپان» آذربایجانلی اکینچی و فهله‌لرین آجیناقلی یاشاییشلارینی، بدیعی بیر شعر دیلی ایله اونودولماز رَسیم‌لره چئویریر. خصوصیله کیتابین آدینی داشییان «قره‌داغ کندلری» آدلی پوئمادا شاعر اؤز معللیمچیلیک خاطیره‌لرینی جانلی و دویغولو بیر سایاقدا بیان ائتمکله، شعرین اصیل جؤهرینی کشف ائده‌رک زحمتکش‌لر شرفینه، اینسانلیق آدی ایله باش اَییر:
کندین ایچینده چؤل باییردا دا
هامی چالیشماقدا، ایشله‌مکده‌دیر
اونلار دوز دوشونموش بو فلسفه‌نی
شرف یاراتماقدا، صاف اَمکده‌دیر…
حبیب فرشباف، معللیمچیلیک ایل‌لرینی اوزاق کندلرده و اوبالاردا، بوتون چتینلیک‌لر و دؤزولمز وضعیت‌لرده، کؤنوللو اولاراق باشا وئرسه ده، محبتلی ایزی نسیل‌لرین کؤنول‌لرینده بیر عؤمور یاشاییر و یاشایاجاقدیر. علیرضا نابدل دئمیشکن او اوزاق ائل ده اوبادا، خورما تئللی بیرمعللیم اولاراق، قارانلیق کیلاسلارا و آی اولدوزسوز دونیالارا ایشیق ساچیر و شاگیردلری‌نین اوره‌ک یارالارینا، اوره‌ک تئل‌لرینه ملهم اولور.
حبیب فرشباف‌ین دولغون یارادیجیلیق دونیاسیندان آیدینجا آنلادیغیم و حیاتینی قره داغ اهالیسیندن و همکار اولدوغو معللیم‌لردن و اونون شاگیردلریندن دینله‌دیگیم فاکت‌لار اساسیندا، منجه او معاصرآذربایجان مدنیتینده، بیر اجتماعی شخصیت کیمی ده قیمتلنمه‌لی‌دیر. حبیب معللیم، گرکدیر کی «رشدیه»، «باغچه‌بان» و «صمد بهرنگی» کیمی فخرلی معللیم‌لر سیراسیندا یئر آلا و امینم کی بو ایستک، بیرگون گئرچکلشه‌جکدیر.
۱۳۵۹ – خوی
