کؤچوبدور ایچیمدن درین دویغولار،
دوشورم یاپراق تک خزان چاغیندان.
اسمیشم کؤنلومدن قارا یئل کیمی،
بوداغلار سولدولار حسرت باغیندان.
یالانلار سئوگینی بورودو چن‌ده،
اویونجاق اولوبدور دوشوب ال‌لره.
قارغالار اوتوردو دورنا یئرینه،
ناغیل اولاجاقدیر دوشه دیللره.
سؤزجوک‌لر تازالدی، سئوگی قوجالدی
کؤهنه محبت‌لر یامان آزالدی،
پیسلیکلر یوکسلدی، دؤندو باج آلدی،
نامردین کئفی ده ائله سازالدی.
هانی او سئوگی‌لر، هانی دویغولار،
هانی محبتین جوشغون بولاغی؟
هانی صداقتلر، او کؤهنه دیللر،
هاردادیر آنامین او دینج اوتاغی؟
