نه وار دوشگونویم، نه زر، نه آلتون
سسین سوراغیمدا گلسین، بسیمدیر!
نه واخت پنجه‌لشسم اؤلومله بیر گون
گؤزلرین اوزومه گولسون، بسیمدیر!
سسین آرزو کیمی، شوخ دویغو کیمی
بو یورغون روحوما بیر اویغو کیمی
شیرین خاطیره تک صاف قایغی کیمی
عؤمرومده کونلومده قالسین، بسیمدی!
من اوچروم قایادا، سن اوزانمیش ال
من پوتور واراغام، سن قازانمیش ال
سوسلنمیش چیچک سن، من سوزالمیش ال
روحوم، تک عطرینی آلسین، بسیمدیر!
سئودالی بیر کؤنول وئردیم یوللارا
کئچید کؤرپو اولسون بلکه یول، یولا
منیم حسرتیمی بیر آز وئر یولا
وصلینه اومیدین سالسین، بسیمدیر!
هارداسان؟ ایذین وئر یان‌یانا گلیم
سن داغ اول، من چنه، دومانا گلیم
اوفاجیق مایاق اول، گومانا گلیم
سنسیزلیک توزونو سیلسین، بسیمدیر!
۱۵/۰۷/۱۴۰۴
