دون گئجه
یوخو باشیما دوشموشدو
تانریم دلی اولماغیمدان قورخموشدو؛
بیر ماسانی پایلاشدیق
خیسین- خیسین چایلاشدیق
سوردوم:
– تانریم دئه هارداسان؟!
کؤیوندن خبرین وارمی؟!
بو ائوجیکدن ،بو کومادان
کویوندن خبرین وارمی؟
سحرینده دان بوغولور
جان ییخیلیر، قان بوغولور
گونش نه آسان بوغولور
هاییندان خبرین وارمی؟!
غوربت اوچور کوچه‌لردن
سئوینج کؤچور کوچه‌لردن
اؤلوم کئچیر کوچه‌لردن
ساییندان خبرین وارمی؟!
لاخ چیخیر یومورتالارین
کیفسه‌میش گون اورتالارین
هورکو، قیناق گؤیون یئرین
واییندان خبرین وارمی؟!
بیت دوشوب کورکونه ندن؟!
اود دوشوب بؤرکونه ندن؟!
اؤزو سفیل، یاد، گلمه‌دن
داییندان خبرین وارمی؟
باخدیم گؤزلرینه، باخدیم
دویدوم دولوخسوندوغونو
سوسدو، هئچ نه دئمه‌دی،
یالنیز
گؤزلریندن دویماق اولاردی
فالالارین لاخ اولدوغونو.
آبان ۱۴۰۲
یک پاسخ
قلمینیز یاشیل یازار اولسون یالچین بی،
ساغ اولون