شیرین ناغیللاردا قالدی آتلی‌لار،
دؤنمز «آغ آتلی»لار، گلمز بیر داها!
شیمشک قانادلی‌لار، یئل قانادلی‌لار،
دؤنمز «آغ آتلی»لار، گلمز بیر داها!
قوچاق بابالارین سؤزونده قالدی،
نغمه‌سینده قالدی، سازیندا قالدی،
شیرین خیاللارین توزوندا قالدی،
دؤنمز «آغ آتلی»لار، گلمز بیر داها!
دره‌لر، تپه‌لر چوخور اولدوسا،
یوللار هاچالانیب جیغیر اولدوسا،
اومیدلر، آرزولار قیسیر اولدوسا،
دؤنمز «آغ آتلی»لار، گلمز بیر داها!
پاپاغی گئن دوشور دای پاپاقلی‌لار،
کولونه بله‌نیب گور اوجاقلی‌لار،
سیز ائی ار ائللی‌لر! آی قوچاقلی‌لار!
دؤنمز «آغ آتلی»لار، گلمز بیر داها!
شیرین ناغیللاردا قالدی آتلی‌لار،
شیمشک قانادلی‌لار، یئل قانادلی‌لار،
الی توفنگلی‌لر، آفتاماتلی‌لار،
دؤنمز «آغ آتلی»لار، گلمز بیر داها!
۱۴/۳/۴۰۴
