پاییز چؤکدو باغ ـ باغاتا،
بوداق، یارپاقسیز آغلادی!
حیات دؤندو لال سوکوتا،
شیمشک چاخماقسیز آغلادی!
داغی، داشی یول ائیلهدیک،
یوللاری گئت-گل ائیلهدیک،
قایالیغا ال ائیلهدیک
آیاق چاریقسیز آغلادی!
گون دوشمهدی قونچامیزا،
توز سپیلدی تاخچامیزا،
داش آتدیلار باغچامیزا،
بوستان قوروقسوز آغلادی!
عؤمور –گونو مات بورودو،
درد بؤیودو قات بورودو،
آرزولاری چات بورودو،
سینیق- ساریقسیز آغلادی!
شن سئودامیز تئز چاللاشدی،
ساچلاریندا دن دولاشدی،
سار اووج آلیب قارتاللاشدی،
زیروه قوچاقسیز آغلادی!
اردیبهشت ۱۳۹۲