۱- یولچو
سؤز واختینا چکر؛ قاش قارالمیش، گونش غروبا یووارلانیردی. -«یولچو یولدا گره‌گ!» دئییب، یولا دوشدو. الی بوش، کؤنلو توخ. سفر بوقچاسیندا ایللردن میراث قالمیش قانلی قاندال‌لار، چیگنینده دارآغاجی، اوره‌یینده قالاق – قالاق آرزولار. یول گئتدی ایینه ایله گور قازان کیمی؛ اللشه-اللشه، چارپیشا- چارپیشا.
گؤی اوزو آغلاماقدا ایدی. گؤزلرینده بیر قیغیلجیم اویناییردی. خوروز بانی سانکی -«صاباحین خئییر یولچو قارداش!» دئییردی…
۲- دیالوق
قوجا دئدی:
– بیز یاندیریلمیش نسیلین ائولادلاری‌ییق، یاندیریلان کیتابلار کیمی یاشانتی‌لاری قیریق- قیریق، گولوش‌لری چاپیق- چاپیق؛ تفککورو اوتولموش بیر نسیلین.
جوان دئدی:
– بیز سؤنوک‌لر نسیلیندن‌ایک. دویغولاری سرحدلنمیش؛ احتراص‌لاری محبوس؛ حسسیات‌لاری سؤنؤک بیر نسیلین نماینده‌لری.
درد بورودو منی. دوشوندوم: گؤره‌سن اوغلومون اوغلونون نسیلی نئجه آدلاناجاق؟!…
۳- نوستالوژی
بولاق باشینا گلردیلر سورمه‌لی قیزلار. چیگین‌لرینده سهنگ، باش‌لاریندا گوللو کالاغای. لاله‌لی – نرگیزلی چؤل‌لری ایچه –ایچه، سال قایالاری بیچه –بیچه گلردیلر بولاق باشینا. بیر چاپیق قایا آرخاسیندان بئش آتیلاندان آچیلان گولله کیمی چاتیلان باخیش‌لارا ناز ساتماق اوچون، یاندیریب- یاخماق اوچون. سئوگی دئییرم آآا… یانیب، یاخیلاردی‌لار کول اولانا قده‌ر.
زامان اؤتدو؛ دویغولار لیللندی. بئله‌جه سئوگی‌لر ده چیلیک- چیلیک اولدو، پارچالانان آینا کیمی یوزه دؤندو، مینه دؤندو، سپیلدی کوچه‌لره، پارک‌لارا.
سئوگی‌لر بؤلوندوکجه محبت اورکده‌ن، صداقت باشدان کوسدو و ده‌میر سورمه‌لی قیزلار لال – ساکیت مورگولو گؤزله گؤزله‌ییرلر بیر پارک کونجونده…
