آرتیق بو یوللار دا چوخورلاشیرلار،
قارقالار لش‌لری سریب یول‌لارا.
دیدرگین ایزلری قویلاماقداییق،
اوره‌ییم یانیری یازیق قول‌‌لارا.
پیلته‌لر هیس ای‌یین سریب ائولره،
بوغونتو عادتدیر بیز اینسان‌لارا.
داشلارین اوزونو یامان آغارتدیق،
هله ده قوسوروق بو زامان‌لارا.
هره‌نین ایچینده یوزلرله کولک،
بورانلی بیر باخیش شه‌هر بویونجا.
چوخورلو یولاقلار آددیم به آددیم،
اینانجلار قویلانیب یولا دویونجا.
آغیر کامیونلار ایچینده ماسکه،
گتیریر شه‌هره بویاقلانماغا.
دونور بوغازیمدا باغیرماغلیغیم،
قاچیرام اؤلومله دوداقلانماغا.
نیفرتین ماسکه‌سین تاخمیشیق اوزه،
شه‌هرده هر کسه نیفرت ساتیریق.
آغیزدا یامانلار، گؤزده یالانلار،
بؤیوگه، کیچیگه هئی داش آتیریق.
دووارا آسمیشیق یاخشیلیقلاری،
هر ساعات اونونلا سلفی چکیریک.
یالانلار کؤلگه ایله قوجاقلاشیرلار،
سیخینتی توخومون یئره اکیریک.
آیین دا ایشیغی سؤنور بیلیرم،
کؤلگه‌لر ایتیری قارا کوچه‌ده.
گئجه‌لر ماسکه‌نی عوضله‌ییریک،
دوروروق لش سرن سینیق تیمچه‌ده.
بؤیله‌سی دورومدور بو آنلاریمیز،
آی‌ایلا باریشماق گره‌کیر داها.
ایشیغی گئجه‌ایله باریشدیرماغا
ال‌ـ اله وئرمه‌لی، قالماییب چارا.
