یازار: عزیزنسین
چئویرن: اسماعیل شیخلی
کؤچورن: علی آغ‌گونئیلی
جان آرکاداشیم ائششک آریسی!
اؤزون بیلیرسن کی، بیر آدام رسمی بیر دایرده وظیفه‌یه کئچدیمی قورتاردی، عؤمرونون آخیرینا قدر اوردا قالاجاق. بیزده اونون کیمی خسته خانانین زیرزمی‌سینده قالدیق. بیرگون سحر تئزدن قاپی آچیلدی، اؤلولر سئویندی‌لر:
ـ بیزی یارماغا آپاریرلار، یارماغا آپاریرلار، ـ دئیه باغیردیلار.
اؤلولرین سسینی دیریلر ائشیتمیرلر. او دونیادا حقیقتاً دیری اولانلارین اؤزونو دیری حساب ائدنلرین سسین ائشیتمه‌دیک‌لری کیمی. ایچری‌یه ایکی خادیمه ایله اورتا یاشلی بیر کندلی گیردی. کندلی:
ـ منیم اوغلوم هانی؟ ـ دئیه باغیردی.
خادیم‌لردن بیری:
اوغلونو یئمه‌دیک ها، ـ دئدی. ـ نییه باغیریرسان ؟ باشقا یئرده تاپمادیزسا دئمک بوردادیر.
– کندلی:
گؤز گؤره – گؤره گئتدی، – دئدی ـ خسته خانادا یاتیردی، گلدیم تاپمادیم، «یوخدور» دئدیلر. دئییرلر کی سهو سالیبسان، یقین باشقا خسته خانایا آپاریبسان. چاشیب قالمیشام. خادیمه جواب وئردی:
– قوجا، استامبول دا خسته خانا ائله بیرجه بورادیر؟ اوغلونو بورایا گتیردیینی هاردان بیلیرسن؟ بوردا هئچ نه ایتمز.
کندلی:
– من اوغلومو بورایا گتیرمیشم؛ نومره‌سی ده وار ـ دئدی.
خادیمه، کندلینین الیندن نومره یازیلمیش کاغیذی آلیب و اورادا یاتانلارا باخماغا باشلادی. بیر اؤلونون باشی اوستونده دوردو:
ـ باخ، اوغلون بودور، ـ دئدی ـ سنه دئمه‌دیم می بورادا هئچ نه ایتمز. ائله «اوغلوم» دئییب باغیریرسان.خسته خانا دا آدام آختارماق لوتئپئیا بلیطینده نومره آختارماق کیمی‌دیر. اول اؤده‌نیش نومره‌سینه باخاجاقسان، سونرا دا اودوش نومره‌سینه. خسته خانایا گیردینمی،گرک اول اؤلولره باخاسان، آدامینی اؤلولرین ایچینده تاپماسان، پالاتالاردا دیریلرین آراسیندا آختارمالیسان. خسته خانانین بئله بیر قایداسی واز.
کندیلی‌یه اوغلو عوضینه منیم یانیمدا یاتان یاشلی قادینی گؤستریردیلر. کیشی باخدی، باخدی:
ـ بو منیم اوغلوم دئییل ـ دئدی.
خادیمه حیرصلندی:
ـ بو نه سؤزدور؟ بیز یالانمی دانیشیریق؟ نومره‌سی دوز گلیر. گؤرمورسن ؟
کندلی:
ـ واللاه ـ دئدی ـ بو اؤلو بیزیم اوغلانا هئچ بنزمیر.
ـ خسته خانایایا نه واخت گلیب؟
ـ بو جمعه گونو ایکی هفته اولاجاق
خادیمه باشینی آشاغی سالدی.:
ـ قارداش بورا خسته خانادیر. بورادا ایکی هفته یاتان آدام دوغرودان دا تانینماز اولور. پوللو خسته‌خانادا یاتسا، کؤکه‌لیب تانینماز اولور؛ پولسوز خسته‌خانادا یاتسا آریقلاییب تانینماز اولور. ایندی باشا دوشدونمو ؟ بورا ندیر، خسته خانا دئییلمی؟
کندلی ائشیتدیک‌لرینه اینانماق ایسته‌مه‌دی:
ـ بو اوشاغی بیردفعه آنادان اولاندا دوغوم ائوینده ده‌ییشیک سالدیق. اوشاق قاریشیق دوشدو ده‌ییشدی‌لر. ایندی ده بورادا تزه‌دن ده‌ییشیک‌می سالاق؟
ـ بابالی منیم بوینوما، سیزین اوشاقدیر، واللاه نومره‌سی دوز گلیر.
کندلی یاشلی قادینین مئییتینین اوستونه اییلیب باخدی!
ـ والله، ـ دئیه باغیردی ـ بو بیزیم اوغلان دئییل، گؤرمورسن می قوجا بیر آرواددیر؟
خادیمه بیر آز دوشوندو:
ـ ایندی یئنی بیر اوصول چیخیب: کیشی‌لری آروادا دؤندریرلر، آروادلاری کیشی‌یه. آدامین جنسیتینی ده‌ییشدیریرلر. ایندی سن ندن بیلیرسن کی اوغلونو معالجه ائدنده جنسینی دییشدیریلمه‌ییب‌لر!.
کندلی ائشیتدیک‌لرینه هئچ جور اینانا بیلمه‌دی.
ـ یاخشی، دئدیک‌لری نین هامی‌سی ایله راضییام. اما بیزیم اوشاق ییرمی یاشیندا ایدی. بوکی قارتیمیش قاری‌دیر.
ـ آمان الله، سن نه قانماز آدام‌سان، بونلارا دوکتور دئیرلر. بونلار ائله بیر ملتدی کی انسانی جاوان ایکن اؤلدورمورلر. آسپیریندن کینه‌دن وئریب یاشادیرلار قوجالدیرلار سونرا اؤلدورورلر. بیلدینمی قارداش گؤتور اؤلونو…
کندلی قارینی اوغلو حساب ائدیب قوجاقلادی.
– امان اوغلوم یازیق بالام سن تانینماز اولوبسان، نه یامان دییشیبسن گؤزومون ایشیغی. کیشی باشینا – گؤزونه دؤیمه‌یه باشلادی. ایکی خادیمه قاری‌نین مئیتینی باییرا چیخارتدی. اؤلولردن بیری دیللندی:
ـ بوآروادین باختینا باخ جانی قورتاردی. بیر کندلی ده گلیب منه « آنام، قای آنام » دئییب آپارسایدی نه یاخشی اولاردی.
دانیشان اؤلو:
ـ کندلی نین اوغلونون باشینا نه ایش گلدیینی بیلیرسنمی؟ ـ دئیه سوروشدوم.
ـ دونن جراحیه اوتاغینا آپاردیلار. دوکتورلر جاوانین ندن اؤلدویونو بیلمک ایسته‌ییردیلر. منه قالارسا انسانلارین ندن اؤلدوکلرینی یوخ، ندن اؤلمه‌دیک‌لرینی و نه اوچون یاشادیقلارینی اؤیرنمک لازیمدیر. ائله دئییلمی ؟
سئویملی قارداشیم ائششک آریسی!
اورالاردا نه‌لر اولدوغونو، منیم حاقیمدا نه‌لر دانیشدیقلارینی بیلمک ایسته‌ییردیم. منیم آرخامجا دانیشانلار منی «عوض ائدیلمز بیر ایتگیمی» حساب ائدیرلر، یوخسا «میکروبین بیری ده گئتدیمی» دئییرلر. نه دئییرلر دئسین‌لر، منیم اوچون فرقی یوخدور. من اؤلوب جانیمی قورتارمیشام. قوی او دونیادا قالانلار یانیب یاخیلسین‌لار، پاخیلیق‌لاریندان پارتلاسین‌لار. من قاباغا دوشموشم. بیردن یادیما دوشدو: بیزیم بیر شاعر واردی، آدینی یازیب یادیما سالا بیلمیرم، او سفئه یوخسا ائله بیلیر کی دیریدیر.
سالامات قال قارداشیم ائششک آریسی
قارداشین
اؤلموش ائششک
