هر سحر
گونش چیرتلایاندا سمانین بیر بوجاغیندان
بیزیم شه‌هرده ده
هر قاپیدان بیر نئچه کؤلگه
چیرتلانیر چؤله.
کؤلگه‌لر
بو یاندان او یانا سوزولور آستا- آستا،
کؤلگه‌لر
بیر – بیریندن آخیر،
کؤلگه‌لر
بیر – بیریندن سوزور.
کؤلگه‌لر اینجیمیر
کؤلگه‌لر آغریمیر،
ساکیت – ساکیت
خیمیر – خیمیر،
هر سحری آخشاملاییر،
هر آخشامی گئجه‌له‌ییر
و هر سحر یئنی‌دن چیرتلانیر چؤله.
بو کؤلگه‌لر هاردان آخی…؟!
بو کؤلگه‌لر نه‌دن بئله…؟!
