بوتون محله‌نین آداملاری ییغیشیب بیر بیر ایله دانیشیرلار. بیری دئییر:
– قبیرسانلیغی ایکییه بؤلمگ اولار؟
او بیری دئییر:
– اورتادا قالان قبیرلر نه اولاجاق؟
بیری ده میکروفونو الینه آلیب دانیشیر:
– بورا کؤهنه بیر قبیرسانلیقدی. بیز خیابانی بورانین اورتاسیندان بئله چکمه‌لی‌ییک. آخی شهر دئدیگین خیابان ایستیر، یول ایستیر. بو میللی بیر ایشدیر، بونو پوزماق اولماز. بو ایشی گؤرمه‌سَک شهریمیز ناکؤندم اولار. اورتادا قالان قبیرلری یا اوتایا یا بوتایا داشییاجاییق. آخی بو قبیرلر همی چوخ کؤهنه‌دیلر همی ده یـییه‌لری یوخدور. والاه شهرداری ائله آللاه یولوندا بو ایشی بوینونا آلیب.
جماعت ال چالیب سونرا داغیلیشیرلار. صاباحیسیندان بؤیوک ماشینلارلا لودرلر گلیب اورتادا دورورلار. ایشچیلر ایشله‌مه‌یه باشلاییب، تورپاغی داشیییب، یئرینه ده قوم، سونرا دا آسفالت تؤکورلر. دویونجا دا برکیدیرلر. نئچه گوندن سورا خیابان چکیلیب، قبیرسان ایکییه بؤلونوب؛ ماشینلار دا یئیین- یئیین اوردان سوووشورلار!
***
– سلام قارداش، خبرین واردی خبردن؟
– یوخ نه اولوب؟
– دونن ایرحمتلیک حسن‌آغا، قبیریندن دوروب گئده آتاسی حاجی دهنزین قبیرینین اوستونه، اونا‌دیه. جانیم سنه دئسین خیاباندان کئچنده ماشین ویریب، یازیق بیر ده اؤلوب!
– وای، بئناوا. ایندی نه اولاجاق، تزه‌دن باسدیراجاقلار؟
– واللاه هله هئچ کیم بیلمیر!
– حاجی آدی‌بؤیوک نه دئییر؟
– هئچ زاد، ائله هوب توتوب قالیب، هله تزه اؤلنلر هئچ، قدیم اؤلنلر ده آوارا قالیبلار!
– منه قالسا گرک اؤز قبیرینده باسدیرالار.
– واللاه بئلَنچی ایشلرده سر اصلان قاباغا دوشور.
– هه واللاه، ائله کیشی دوغوردان دا ائلدار آدامدی، هه باخ، بوداها اؤزو ده گلدی، سلام علیکوم مشه سراصلان آللاه سنه ایرحمت ائله‌سین.
– سلام حاجی آیاز، آللاه سنه ده ایرحمت ائله‌سین. مشه تاپدوق سن نئجه‌سن؟
– ساغ اول مشدی، واللاه ائله قاباغینجاق یازیق حَسنین خبرین ائشیتمیشم.
– آی مشدی سراصلان، ائله ایستیردیک سن دئیه‌سن کی بو اؤلونو نه تَهَر یئردن گؤتورک؟
– نه بیلیم، ائله قالمیشام آوارا، آما گرک بیر ایش گؤرک، واللاه منیم غیرتیم چکمیر؛ یازیق اؤز بو ساغاسیندان‌دیگرگین دوشوب!
– منیم فیکریم ایرحمتلیک اسییه یئتیشیر، یازیق یاخشی اؤلو یووان ایدی، منیم اؤزومو ائله او یوووب، بو ایشین چَمین او بیلر.
– آی حاجی آیاز، دوز دئیسن، باخ گل، بو دا ایرحمتلیک اسی؛ آدینی توت قولاغین بور. آی کیشی آللاه سنه ایرحمت ائله‌سین. باخ، ائله سنی گودوردوک.
– آللاه سیزه ده غنی- غنی ایرحمت ائله‌سین، نه‌یوووز منی گودوردوز؟
– بابام او یازیق مشدی حسنی یئردن گؤتورک دای! سن بیلمه‌سن هئچ کیم بیلمز.
– آی ایرحمتلیک، من بو ایشی او دونیاده باشاریردیم. گونون بو گونو نه تهر ائله‌یه‌جه‌یَم؟ بیلمیرم! مننن سورووشساز بیزه بیر‌دیری اؤلو یوووب، باسدیران لازیمدیر. هه، یاخشیسی ائله بورانین اؤز اؤلو یووانی کلبه‌قاسیمدیر، گرک اونلا دانیشاق، آخی هئچ اولماسا، اوزو، اوزوموزه اؤیرهشیب اؤزو ده کی ائله بیر آیاغی بوتایدادیر.
– اوداها، باخ گلیر.
– قوی من اونی چاغیریم مشه اسی. سلام علیکوم آی کلبه قاسیم. منم سراصلان، اؤلولرین سؤزو وار سنه.
– نه سؤزو؟
– آی کلبه قاسیم منم اسی، سنه ایشیمیز توشوب، سن آللاه کؤمک ائله.
– مشه اسی آخی سیزلر اؤلوبسوز، نه ایشوز دوشه‌جک منه؟
– نه اولار اؤلنده، ایندی بیز اؤلموشوک دئییبن بیزه کؤمک ائله‌مه‌یه‌جکسن؟
– ایشیز نه‌دی مشه اسی؟
– اؤلوموز وار، ایستیریک اونو یئردن گؤتورک، سن ده باسدیراسان!
– مشه اسی سنه قوربان اولوم به آخی‌دیریلر قالیب، اؤلولر نییه دوشوبلر قاباغا؟ به اؤز آداملاری هاردادی؟
– بابا بو رحمتلیک یئتیمیش ایل بوندان قاباق اؤلوب، دونن بیر ده اؤلوب.
– آی گؤروم بو قبیرسانلیغی آییرانلار مَلَر قالسینلار، ائله من ده گون بویو، هئی قاچیرام اوتایا، هئی قاچیرام بوتایا، آخیردا بیر گون منی ده ماشین باسلایاجاق. یاخشی، اؤلو هاردادی مشه اسی.
– باخ ائله بوردا. اؤز قبیرینین یانیندا. سن قبیری قاز، بیز میّیتی قویاق قبیره، اوندان باسدیر.
– آخی آی باشووا دولانیم مشه اسی، اؤزون بیلیرسن، قایدا وار قانون وار. کاغاذسیز من نئجه قبیری آچیم آخی؟ ایستیرسن منی توتوب باسالار قودوقلوغا؟
– آی کلبه قاسیم آخی بو رحمتلییین اؤز قبیرین آچیب تزه دن اورا قویماغا نه کاغاذ؟
– وئی، مشه اسی سن بو سؤزو دئمه، سن اؤزون بوردا سوموک سیندیریبسان. سنی آللاهون، دئنن، کاغاذ‌سیز قبیر آچیبسان؟
– یوخ!
– هه‌دیلینه قوربان، بابام آدامین دریسینه سامان تَپَرلر.
– کلبه قاسیم قادانی آلیم، او قانون‌دیرینین اؤلمه‌یینهدیر، اؤلونون اؤلمه‌یینه دؤوورکی؟!
– من بیلمیرم، اؤلو اؤلودور. کاغاذ آل گتیر، منیم بو کور گؤزلریم اوسته.
– آی بالا بو کلبه قاسیم ایش گؤره‌نه اوخشامیر، نئیله‌یَک؟
– ساققیز آلاق چئینه‌یَک. نئیلَیه‌جه‌ییک مشه اسی، گئدک اؤلولر ایداره‌سینه، بو یازیغی دا گؤرسه‌دیب دئیَک بیزه بیر پیتیک وئرسینلر. نه دئییرسن مشه سراصلان؟
– هه گئدک، گل، بو دا اؤلیلر ایداره‌سی. قویون مشه اسی دانیشسین.
– یاخشی مشه سراصلان، قوی گؤروم نه دئیه‌جَکلر: -“آی بالا، آی بو ایداره‌نین بیلنده‌لری، بیزیم بیر اؤلوموز وار، اونی باسدیرماغا بیر پیتیک وئرین بیزه.”
– بولار هئچ بیزی سایمیرلار، ائله بیل هئچ‌دیلیمیزی ده باشا دوشمورلر؟
– آی مشه تاپدوق، هله‌دیری اولاندا سؤزوموزه باخان یوخ ایدی قالمیشدی ایندی اولا؟
– آی حاجی آیاز ائله بیل بولار ناشیدیلار، قورخوب ووروب بیزی بیر ده اؤلدوررلر، قالاریق حسنین گونونه، ایندی کیم بیزی باسدیراجاق؟
– بیلیرسیز نه وار، عاغیل عاغیل دان اؤتگوندور. بیز گرک اوتایین اؤلیلرینن ده بیر گه‌ییشَک.
– آی سراصلان ایستیرسن خیاباندان کئچنده بیزی ده ماشین وورا، یازیق اولاق؟
– مشه اسی، گرک دَهَتله‌یه دَهَتله‌یه کئچک خیابانی. بوندان سورا توشو وار؟
– یاخشی نه دئییرم مَشَدی سر اصلان کئچک خیابانین اوتایینا.
وای ددم وای او ماشین گؤر نه گلیر! یییه‌لیگ اول مَشَدی تاپدوق!
– تاری کیشی وایقیلدی. آی ایرحمتلیکلر آناز ناماز اوستونده ایمیش، یوخسا ایندی قالمیشدیز منیم بو یازیق اوغلوم حسنین گونونه.
– حاجی دهنز، آللاه بالووا ایکیمینجی دؤنه ایرحمت ائله‌سین. سن بو ایشه نه دئییرسن؟
– آی ایرحمتلیکلر، گلون خیابانین قیراغیندا دوروب، هاییمیزا باساق، بلکه بیزی بیریولا قویان تاپیلا. قدیم اؤلنلره آللاه ایرحمت ائله‌سین، دئییبلر، داغ داغا یئتیشمز اؤلی اؤلییه یئتیشَر. هه قیشقیرین، هارای چکین.
– آی ایرحمتلیک لر، او کیمدی خیاباندان کئچیر، ائله بیل ماشینلار اونو گؤرورلر آخی.
– حاجی دهنز، او کلبه قاسیم‌دی.
– یا آللاه، به نه اولدی؟ بابا به اونو گؤره- گؤره ووریب آشیردیلار آخی، مَشَدی سر اصلان؟!
– گؤردون مَشَدی اسی. بولار‌دیرییه وای قیلمیرلار، اؤلویه هاردان وای قیلاجاقلار؟ آی کلبه قاسیم، آللاه سنه ایرحمت ائله‌سین ایندی لاپ یاخشی کؤمک ائله‌یه بیلَرسن، گل بو اؤلونو یئردن گؤتورک.
– بابا منیم اؤزومو یئردن گؤتورن ایستیر، هاردان سیزین اؤلوزو گؤتوروم، آی ایرحمتلیک سر اصلان.
– کلبه قاسیم بو اَوَل اؤلمه‌ییندی. نه تَهَر اولسا سنی گؤتورن اولاجاق. نه اولار، قوی بو اوغلومو دا سننَن باسدیراق.
– یاخشی سیز دئین اولسون، آخی منیم یئریم دار اولار، بونو هانسی کیتابدا یازیب؟
– به ایرحمتلیک، ائله دردیمیز بودور دای. بابام نه قالین قافاسان، بو ایشی هله هئچ کیتابدا یازماییبلار، کلبه قاسیم سنون اَوَل اؤلمه‌یین‌دیر، بو یازیغین ایکیمینجی اؤلمه‌یی. سنه زحمتی اولماز!
– گئدین اؤزوزه آلاهی روضه خان تاپین.
– باخ مشه اسی، یا قویارسان اوغلومو سننَن باسدیراق، یا دا سنی ایته‌له‌یه‌رَم آلاهی ماشینین آلتینا، بیر ده اؤلوب، قالارسان آواستا. مننن دئمک، اؤزون بیلرسن.
– هله قویون منی یوسونلار، سورا دانیشاریق.
– یوخ کلبه قاسیم، شوخومدا دانیشاق خرمنده دعوامیز چیخماسین، بیزی اویناتما، هه یا یوخ؟!
– بابام، هه، نه یامان سیرتیق اؤلوسوز. هه، گل، راضی اولدون؟
– هه بو دا بوزخانا، بو دا مَردَشیرخانا، بو دا کفن، هه نئجه‌سن کلبه قاسیم.
– اؤسکورک آمانیمی قیریب. آللاه منه ده ، مشه اسییه ده ایرحمت ائله‌سین، نه یاخشی یویوردوق اؤلونو. بو تزه اؤلو یووان، قولومدان توتوب ائله چکدی کی قولوم یئریندن چیخدی. گرک گودَم آغ آببا کیشی بورا گله، اوندان وئرم قولومو سالا یئرینه.
– ییه‌لیک اول کلبه قاسیم، ماشینا میندیریرلر سنی. یاخشی، ایرحمتلیکلر گئدک گؤرک هارانی قازیبلارسا، اوردا گودَک.
– مَشَدی سر اصلان من بایاقدان هر یئری گزمیشم، بولار هئچ یئری قازماییبلار.
– نئجه یانی مَشه اسی؟ به‌یَم بئله بیر شئی اولار آخی؟ اؤلو مَرده‌شیر خانادان چیخان کیمی گئدر قازیلمیش قبره ساری دای! به ماشین گلیب هاردا دوراجاق؟
– مَشه سر اصلان، ماشین، دالینا دا باخماییب گئتدی، منیم اوغلوم دا قالدی یئرده.
– من بایاقدان باخیردیم. ماشین گئدیب مرکزه.
– مرکز هارادی آی ایرحمت‌لیک مشه اسی.
– مشه سراصلان، دئییرلر دای بوردا هئچ کیمی باسدیرمیرلار. یئنگی اؤلولری آپاریریب، مرکزده باسدیریرلار.
– مشه اسی، هره‌نین اؤز محله‌سی وار، اؤز کوچه‌سی، اوز دسته‌سی؛ اؤز مچیدی وار آخی؟
– مشه سراصلان بیز تورکه‌سایا اؤلولَریک، گومان هر نمنه‌دییشیلیب، بو قدیم قبیرسانلیقلدا دای هئچ کیمی باسدیرمیرلار. تزه اؤلنلری، قدیم اؤلیلردن آییریرلار.
– اوندا گئدک مرکزه. هه باخ بودا تزه قبیرسانلیق. مشه اسی به نییه بوردا هامی بیر بیریندن کوسولودور؟
– آی ایرحمتلیک مشه سراصلان، به ائله آغینا بوزونا باخماییب، اؤلونو، اؤلویه قاتسان ائله بئله اولار دای. بابام بیری بو محله‌نین آدامی‌دیر، بیری او محله‌نین، بیری بو کندین آدامیدیر؛ بیری او کندین. بو دئییر هَمنَن هَمه، او دئییر دامدان داما، اودور دا بیربیرینَن کئچینمیرلر. اوداها باخ، کلبه قاسیمی اوردا باسدیریرلار. تئز اولون حسن‌آغانی گؤتورون گئدک.
– دایانین گؤرم هارا بئله؟ قدیم اؤلیلر بورا گله بیلمزلر!
– سن کیمسن؟ سنی کیم تیکدی بورا؟
– باخ گؤزومون ایشیغی بورانین بیر قارینجی قیزیل‌دی، او دامخانی گؤرورسن؟ اورانی شهرین پوللولاریندان بیری آلیب اوچ یوز میلیونا کی اؤز، طایفا توروغو اوردا باسدیریلسین. قبیرسانلیغین اورتاسیندا، قبیر اوچ میلیون، یولون قیراغینداکیلار ایکی میلیون‌دور.
– بیز تزه قبیر ایسته‌میریک، بو یازیغین ایکینجی اؤلمه‌ییدی. بیر اؤلو یووان دوستوموز دا وار ایدی تزه اؤلوب؛ باخ اوداها، اوردا باسدیریریلار، بونو دا اونون یانیندا باسدیراجاییق.
– یاخشی، ایکی دؤنه اؤله‌نه چیخاروق. آپارتمان دا وار. آپارتمان ایسته‌سن لاپ اوجوز باشا گلر.
– دایان گؤروم ائله‌بیل کلبه قاسیمی قایتاریرلار. آی کلبه قاسیم به نه اولدو؟ به نییه سنی باسدیرمادیلار؟
– آی سر اصلان منیم آداملاریم چنه وورماغا کئشدیلر، اولار دا منی بوردان قووالادیلار. ایندی آداملاریم منی آپاریرلار ائوده باسدیرالار!
– کلبه قاسیم بولار آلاهی یووانین قوشودولار. ائله ائو یاخشی‌دی.
– آی مشه سر اصلان بورا هارادی؟ نه هایدی بوردا؟
– حاجی دهنز بورا نیارین قبیرسانلیغیدیر. ائله بیل شهرداری ایستیر قبیرسانلیغا ال قویوب، جماعتدن پول آلا. آما جماعت قویمورلار. کلبه قاسیمین آداملاری دا ایستیرلر اونو ایستی- ایستی بوردا باسدیرالار.
– بابا من نیارلی دؤوورم کی منی بوردا باسدیریرسیز.
– سس ائله‌مه کلبه قاسیم، بوندان یاخشی یئر؟ ائله بیل گئدیب ائوده تک قالیب داریخاجاقسان. بوردا نم نه‌قَدَر قدیم اؤلو وار هامیسی تای توشون. باخ او داها بیر قبیر قازیرلار.
– آی داد، آی هارای، آی مشدی سراصلان، هارداسان یئتیش!
– نه اولوب حاجی آیاز، نییه بئله هؤوول بالا گلیب سن، نییه ال آیاغووی داغیدیرسان؟
– بابا شهردارینین بیلنده‌لری گلیبلر اؤز قبیرسانلیغیمیزا، دئییرلَر بورا چوخ کؤهنه‌دی، اؤلولرین ده آدام نَفَری قالماییب. قبیرلرین تورپاغینی بؤیوک توربادا داشیییرلار. دئییرلَر یئرینده آپارتمان تیکه‌جکلر.
– مشه سر اصلان، دئییرم ائله بو قبیر حاضیر کن، اؤزوموز ده بوردا یاتاق، نه دئییرسن؟
– واللاه بئجاها دئمیرسن حاجی دهنز. وای دده لحد داشینی قویورلار، تئز اولون گیرین قبیره.
– هوپ. دایانین گؤروم. هارا سوخولوسوز؟
– قبیره!
– اؤزوزون قبریز یوخدی؟
– ایندینین ایندیسینَن دئسَن، یوخ!
– آی کلبه ایلدیر، گل بورا. بیر جوما دلی اؤلی گلیب.
– اده، آغیزووون قاطیرین بوراخما ها. آی حاجی دهنز بولار آغیزلارین قویوبلار یابانا. بولار بیزدن چوخدولار. قورخورام بیزی شیل کوت ائله‌یه‌لر.
– آی ایرحمتلیکلر نه شیل- کوت ائله‌مک؟ سیز اؤز قبیریزدن کوسوبسوز؟
– یوخ. کلبه ایلدیر. بیزیم قبیرسانلیغیمیزی داغیدیبلار، هامیمیز قالموشوق آرالیقدا.
– به سیزون‌دیریلَریز نییه قویدولار؟
– والله بیز قدیم اؤلولَریک.‌دیری‌لریمیز هئچ بیزیم آدیمیزی دا بیلمیرلر.
– باخ آی آغ ساققال اؤلی حاجی دهنز، بیزیم ‌دیریلریمیز شهرداری‌لا ‌دیدیشیرلر. ایندی بیز نه تهر اولارین یئرین سیزه وئرک؟ سیز اولون بیزیم یئریمیزه، بو ایشی گؤرَرسیز؟
– یوخ!
– آی حاجی دهنز به نئیلییک؟
– مشه سراصلان نه دئیه بیله‌ریک؟ اؤز یئرلری‌دیر، اؤز محله‌لری. ائله یاخشیسی بودور کی باشیمیزی آشاغی سالیب اوزو سولو چیخیب گئدک.
– هارا گئدک حاجی دهنز؟
– آلله کریمدی هله گئدک قمر باغینا گؤرک نه اولور؟
– گل حاجی دهنز بورا دا قمر باغی …وئی؟ نه واخت بورانی تیکیبلر؟ دای باغ قالماییب کی؟
– مَشَدی سر اصلان، بورا قمر باغی‌دی. بورانی تیکیبلرسه بیزه نه؟
– ایندی نئیله‌یَک؟
– چیخین داملاردا اوزانین دامین یئرینه!
– آی بالا چیخین داملارا.
– حاجی دهنز ایندی نئیلییک؟
– آی ایرحمتلیک لر، آللاه سیزه غنی- غنی ایرحمت ائله‌سین، یامان‌دینجَلدیم، ساغ اول مشه سر اصلان. باخین بوردان خیابان سوووشوب سوووشماسا، یئریزدن دَبَرمه‌یین. آمانین گونودور خیابانا زادا چیخیب ائله‌مه‌یه‌سیز ها! یوخسا ایشیمیز قالار آللاها. مَشَدی سراصلان سؤزون باشین باغلا.
– آی ایرحمتلیکلر، باشیزی آتین، یاتین. تاری کیشی سیزه غنی- غنی ایرحمت ائله‌سین. یاتین، یاتین آی ایرحمتلیکلر….
سون ائدیت۱۴۰۲