وطن حسرتی
حیدر آرازلی

گتیریبدیر قارا هیجران یئنه‌ده جانه منی
ائده جکدیر وطنین حسرتی دیوانه منی
چاره یوخدور نه ائدیم دوغما وطن عاشیقی‌یم
وطنیم ائیله‌ییب اؤز شمعینه پروانه منی
سانیرام غربت آرا ایپ آتیلیر گنزیگیمه
چئویریبدیر زامانین سرتلیگی قوربانه منی
زهره دؤنسون چؤره‌یی روحومو زنجیره چکیب
باغلاییب ال- قولومو آتدی بو زیندانه منی
گؤز تیکیب خلوتی اؤز طالعیمی هئی سوزورم
سالمادی چونکی حیاتیم بویو سامانه منی
گئجه- گوندوز اوتوروب باعثی من قارقییرام
ائیله‌دی عالم آرا خانه‌سی ویرانه منی
«حیدر»م آتش هیجران اریدیر وارلیغیمی
چاتدیرین سون چاغی سیز آذربایجانه منی