بیری واریدی، بیری یوخودو. تانریدان سونرا هئچ کیم یوخودو.
البت ده اوشاقلار! بو چوخ چوخ اوزون زامان اؤنجه‌یدی. زامان کئچدیکجه هر شئی اولدو، حئیوانلار اولدولار، آداملار، ائولر، کندلر، شهرلر، مدرسه‌لر، کیتاب و قلملر و هم ده ائو تاپشیریقلاری.
سوروشورسوز بس بونلار نئجه اولدولار؟ هاردان گلدیلر؟ منجه ده سیزین ماراقلاندیغیز بو طرز شئیلر چوخ گؤزل سورولاردیلار. آمما اوشاقلار بوگون بو سورولاریزی یادیزدا ساخلایین، بیر باشقا ناغیلیمیزدا دا اونلارین جاوابلارینی تاپاریق. چونکی بو گونکو ناغیلیمیز جیرتدان و معللیمین اونا وئردیگی ائو تاپشیریقلاریدیر.
جیرتدان کیمدیر!؟
باخین! نئجه ده من اونوتقان بیریسی اولموشام. هئچ جیرتدانی سیزه تانیتمادان اونون ناغیلینی دئمه‌یه باشلامیشام. آماندی ها! سیزده منه تای اولمایین. عاغلیزا هر نه گلیر تئز الیزه بیر قلم آلین، دفتریزده یازین. چونکی تانری، سیز اوشاقلارین عاغیللارینا هر زامان گؤزل فیکیرلر، چوخ ماراقلی سورولار گؤندرر.
هر کیم نه دئسه، قویون دئسین. بوراخین اونلار سیزین دوشونجه‌لریزله آلای ائتسینلر. آمما بونو بیلین کی، سیزین خیاللاریزا گولن اینسانلار چوخ سهو ائدیرلر. او خیاللار تانری طرفیندن وئریلن ان قیمتلی خزینه‌لردیلر. هر زامان اونلاری قورویون.
وای، وای، وای. . گئنه باشیم قاریشدی. جیرتدان یادیمدان چیخدی. یاخشی، گولمه‌یین. دا بو سفر ناغیلیمیزدان باشقا بیر یئره جایمایاغیمی سیزه سؤز وئریرم.
هه، جیرتدان سیزه تای بیر مدرسه اوشاغیدی. اوشاغیدی، چونکی من اونو تانیییرام. او ایندی آرتیق بؤیویوب، یئتشکین بیریسی اولوبدور. بو ناغیلی دا من اونون کیچیکلیگینده یازدیغی دفتردن اوخویوب سونرا سیزه یازدیم. بلی بس نه. بیرآز اؤنجه سیزه نه دئدیم. عاغلیزا نه گلیرسه دفتریزده یازین دئمه‌دیم می؟ باخین گؤرون جیرتدان کیچیک یاشلاریندا نه قدر ده گؤزل شئیلر دوشونورموش.
البت ده اونون یازیسینی سونرا من ائدیت ائتمیشم. ائدیت نه دئمک؟
یانی کی خطالارینی دوزلتمیشم. بیلیرسیز اوشاقلار! یازیدیغیز شئیلرین خطالی اولماسیندان اصلا قورخمایین. حتتا بؤیوک یازیچیلارین شعیرلری، حئکایه‌لری و ناغیللاری دا خطالی اولار. بونا گؤره ده یازدیقلارینی بیر ائدیتورا گؤستررلر. ائدیتور دا اونلاری چوخ دیفتلیجه اوخویوب سهولرینی دوزلدر. سیزلر ده یازماقدان هئچ چکینمه‌یین. یازدیقدان سونرا آتا، آنا، بؤیوک قارداشیز و باجیز او یازینین ائدیتورلوغونو ائله‌یر. یادا ساخلایین اؤزوز بؤیودوکدن سونرا گله‌جکده اونلاری دوزلدیب کیتاب حاینا گتیررسیز.
هه، نه وار؟ گئنه کی گولورسوز. نه اولوب؟
هه آنلادیم. آی کول باشیما تؤکولسون منیم. گئنه ناغیلیمیزی اونوتدوم. هله منه باخین کی سیزلره نئجه ده سؤز وئرمیشدیم.
جیرتدان چوخ زیرنگ اوشاغیدی. مدرسه ده معللیمینی دیققتلی دینلردی.
جیرتدانین فقط بیر عئیبی واریدی. هفته‌نین ایلک گونو مدرسه‌یه یورقون آرقین و یوخولو گئدردی. نئیه؟ ایندی سیزه ندنینی سؤیله‌رم.
چونکی هفته سونو تعطیلینی صاباحدان آخشاما قدر باشی اوینامایا قاریشاردی و تعطیل گونونون سون ساعاتلاری، گون باتاندان سونرا ائو تاپشیریقلاری یادینا دوشردی. هئی یازاردی پوزاردی، تا کی گئجه یاریسی معللیمین اونا وئردیگی تاپشیریقلاری یئرینه یئتیرردی. بونا گؤره ده گئجه‌نی گئج یاتاردی و صاباحیسی گون، یوخولو یوخولو مدرسه‌یه گئدردی.
گونلرین بیرینده، گئنه هفته‌نین ایلک گونو یوخولو حالدا مدرسه‌یه گئتدی. صینیفده او قدر یوخوسو گلیردی کی آرتیق معللیمین نه دئدیگینی ائشیتمیردی. معللیم کیتابدان بیر شئیلر اوخویوردو، هامی دا اونون دئدیکلرینی دفترلره یازیردیلار.
جیرتدانین اوتوراجاق یئری پنجره قیراغیندایدی. پنجره آچیغیدی. جیرتدانین گؤزلری بیردن ائشیکده پنجره قاباغیندا اوجا بویلو، ایکی بوینوزلو بیر دئوه ساتاشدی. هامی باشی آشاغی یازماقلا مشغولدو. بونا گؤره ده کیمسه دئوی گؤرموردو. جیرتدان قیشقیرماق ایسته‌دی، آمما قورخودان دیلی توتولموشدو. سس چیخارا بیلمیردی. ائله او آندا، دئو گوجلو و اوزون قوللارینی پنجره دن ایچری اوزاتدی و جیرتدانی اوتوردوغو یئردن قاپیب ائشیگه گؤتوردو. سونرا دا اونو بئلینده کی توربایا آتدی و مدرسه دن قئیب اولدو.
جیرتدان یول بویونجا توربادا قورخو ایچینده آغلاییردی. دئو اونو تورباسیندان چیخاراندا اؤزونو بؤیوک بیر اوطاقدا گؤردو. او هله ده آغلاییردی.
دئو اونا دئدی کی:
– اگر منیم دئدیگیمی ائله سن، سنینله هئچ ایشم اولماز، یوخسا آخشام یئمه‌ییم اولارسان.
جیرتدان آغلایا آغلایا سوروشدو:
– منیم جانیمدان نه ایستیرسن؟
دئو دئدی کی:
– من توپ اوینامایی چوخ سئویرم. آمما معللیمیمیزین وئردیگی ائو تاپشیریقلاری اوزوندن اوینامایا چوخ واخت قالمیر. آتام دا دئییر کی درسلرینه دوزگون چالیشماسان سنه یئمک یوخدور. سنی بورا گتیردیم، یا منیم درسلریمی یازارسان، یا دا وئررم آنام سنی قازاندا پیشیرر، آخشام یئمه‌ییم ائله‌رم.
جیرتدان دئدی:
– دئو قارداش! نه اولار، منی یئمه. باخ! نه قدر درسین وارسا هامیسینی من یازارام.
سونرا دا دئوین دفتر قلمینی الینه آلدی و یازمایا باشلادی. دئو ده توپونو گتیردی اوطاقدا آتیب توتدو. بیردن توپ هاوادا فیرلاندی و جیرتدانا دوغرو گئتدی. جیرتدان توپو گؤردو و آنیدن یئریندن سئچراییب باشییلا توپا ووردو.
دئو بو دورومو گؤرونجه تعججوبلندی و سئوینه‌رک دئدی:
– اوها! سن توپ اوینامایی باجارا بیلیرسن می؟
جیرتدان دئدی:
– بس نمنه! من هفته سونلاری صاباحدان آخشاما ائله توپ اوینارام.
دئو دئدی:
– دئییرم کی. آخشام چاغینا هله چوخ قالیر. گئدک ائشیگه، بیرلیکده بیرآز اوینایاق. سونرا سن گئری دؤنوب منیم درسلریمی یازارسان.
جیرتدان قبول ائله‌دی و ایکیسی ده ائودن ائشیگه چیخدیلار. ائوین قاباغیندا بیربیرلرینی قووالادیلار. توپا شوت چکدیلر. ایلندیلر، گئنه ایلندیلر و زامانین نئجه کئچدیگیندن هئچ ده خبرلری اولمادی. فقط هاوانین قارانلیغیندان و بیرده یورقون توشدوکلریندن نه قدر گئج اولدوغونو آنلادیلار.
دئو باخدی جیرتدانا، جیرتدان دا دئوه. ایکیسینین ده سسی چیخمیردی. ایکیسی ده، نه لر اولاجاغینی یاخشی بیلیردی. بیردن جیرتدان اوجا سسله آغلامایا باشلادی. دئو ده اوزونو ائوه ساری توتوب قیشقیردی:
– آنا، آی آنا! تئز اول قازانا سو دولدور، قوی اوجاغین اوستونه.
سونرا دا جیرتدانین بوینوندان توتوب ائوه آپاردی. جیرتدان آغلایاراق یوکسک سسله دئوه تئز تئز دئییردی:
– نه اولار منی یئمه، نه اولار منی یئمه.
او آندا جیرتدان چیینینین ترپتندیگینی حیسس ائله دی و سونرا دا بیر سس ائشیتدی:
– جیرتدان، جیرتدان! دور منیم بالام.
جیرتدان باشینی یوخاری قالدیردی. صینیفدایدی و معللیمی ده اونون باشی اوستونده دورموشدو. صینیف یولداشلاری هامیسی اوجا سسله “نه اولار منی یئمه” دئییب گولوردولر. معللیمی ده گولوردو.
جیرتدان هامییا باخدی. او دا گولمه‌یه باشلادی. آرتیق یوخوسو قاچمیشدی.
آمما او گوندن سونرا اؤزونه سؤز وئردی، بیر داها ائو تاپشیریقلارینی گئج ساعاتلارا ساخلاماسین.