«عاشیق اصلان»دان ایکی شعر
علیرضا ذیحق
موعاصیر ساز شاعیرلریمیزدن “عاشیق اصلان” ۱۲۸۷ گونش ایلینده “خوی” شهری‌نین “حمزیان” کندینده آنادان اولوبدور. آتاسی “نجف کیشی” و فامیلی “طالبی”دیر. عاشیق اصلان‌ین اوستادی رحمتلی”عاشیق اسد” ایدی. او، اوره‌گی وطن عشقیله چیرپینان احساسلی شاعیرلریمیزدن‌دیر. عاشیق اصلان خلق شعری‌نین موختَلیف نوع‌لرینده طبعینی سینامیش و شعرلر یازمیشدیر. اونون یارادیجیلیغیندا، آنا یوردا سونسوز محبت و آنا دیلینه حؤرمت و باغلی‌لیق آیدین شکیلده گؤرونمکده‌دیر. نئچه ایل بوندان قاباق “لندن” فاکولته‌لری دعوتلیسی اولاراق “لندن”ه گئتمیش و اورادا آذربایجان خلق ادبیاتی‌نین نمونه‌لرینی او جومله‌دن “شاه اسماعیل” حاققیندا بیلدیقی داستانلاری ساز و سؤزله بیرلیکده تقدیم ائتمیشدیر. بورادا عاشیق اصلان‌ین یارادیجیلیغیندان بیری جیدّی و دیگری طنز ایکی نمونه نقل ائدیلمیشدیر:
گول تبریزیم
آذر ائلی جوشار داشار
دونیا وارکن آزاد یاشار
قارتال کیمی داغلار آشار
ائل تبریزیم، گول تبریزیم،
گل دردیمی بول تبریزیم!
گؤزه ل اولار یایین، قیشین
صفالیدیر داغین، داشین
دوشمان اَتین دیده‌ر دیشین
ائل تبریزیم، گول تبریزیم،
گل دردیمی بول تبریزیم!
آذربایجان بیر واخت اولار
ائل دریا تک جوشوب دولار
یاغی‌لرین رنگی سولار
ائل تبریزیم، گول تبریزیم،
گل دردیمی بول تبریزیم!
یاد جانینا اود سالارسان
دوشمانلاردان باج آلارسا ن
آزاد اولوب شن قالارسان
ائل تبریزیم، گول تبریزیم،
گل دردیمی بول تبریزیم!
“عاشیق اصلان” گل ایمانا
صیدقی باغلا او سوبحانا
ائل یولوندا اؤل مردانا
ائل تبریزیم، گول تبریزیم،
گل دردیمی بول تبریزیم!
بوغاز دردی
بوغاز سنی خار اولاسان
بوی آتمامیش تئز سولاسا ن
گؤرمه‌دیم بیرجه دویاسان
اوخشاییرسان ماره بوغا ز،
چیخسین سنه یاره بوغاز!
یولوم دوشرکن بازاره
سالیرسان منی آزاره
نفسیم دوشور آلما ناره
گتدین منی جانه بوغاز
چیخسین سنه یاره بوغاز!
ائده‌نده میوه‌لر نازی
یییه‌نده وارلی‌لار غازی
سیزلاییر “اصلان”ین سازی
قارقیش دئییر ناره بوغاز
چیخسین سنه یاره بوغاز!
باش اَیمَزدیم نامرد یادا
گووه‌نردیم یاخشی آدا
آد سانیمی وئردین بادا
سنسن اوزو قاره بوغاز
چیخسین سنه یاره بوغاز!
بوغاز سنی دویورماغا
کول باشیوا سُووورماغا
سولا ساغا قاچدیم قاغا*
منت چکدیم یاده بوغاز
چیخسین سنه یا ره بوغا ز
قاغا = داداش
بو یازی عاشیق اصلا ن (۱۲۸۷- ۱۳۷۸ ) دونیاسینی دَییشمه‌دن یازیلمیشدیر.
