بورا تهران …
حبیب فرشباف
«باران»ین و باشقا کوچه اوشاقلاری‌نین شرفینه

بورا تهران؛
بوراسی «شوش»؛
نئچه قدم
گون چیخانا آددیملاسان،
«دروازا غار».

هر آددیمدا
نئچه قادین،
نئچه کیشی
یا چکیرلر،
یا اوتوراق الده سورنگ مورگوله‌ییب
چورت وورورلار…

کرپیچ‌لری
رطوبتدن یارالانمیش؛
هر حیطده
{حتی گاهدان پنجره‌سیز}
نئچه- نئچه دار اوتاق‌لار؛
هر اوتاقدا بیر ار- آرواد؛
هر ائوده ده
بارماق‌لارین سایی قده‌ر
اوشاق‌لار وار.
بو اوشاق‌لار
نه ناغیل‌لا گئجه یاتیب
نه سحرلر
ماهنی‌لارلا اویانارلار.
اونلار هر گون
سحر- سحر ائودن چیخیب،
گئجه‌لرسه
ائولرینه
الی دولو قاییدارلار.
بو آرادا
تکجه «باران»
نه گول‌لری دسته‌له‌مک باجاریر او
نه‌ده حافیظ فال‌لارینی سسله‌مه‌یی.
او، هر بیر گون سحر تئزدن
{یایی، قیشی}
چؤکوب تجریش مئیدانیندا
آسفالت اوسته؛
گئجه‌لرسه،
اوگئی آنا
ایلکجه اونون جیب‌لرینی،
سونرا اؤزون ییغیشدیریب
دروازایا قاییدارلار…

«باران» بوتون گون اوزونو
نه دینیب، نه ده دانیشیب،
ساغ الی‌نین آچیغی‌لا
بوتون یولدان اؤتن‌لره
اؤز یاشینی خاطیرلادار.
«باران» تکجه آخشامادک
بوتون یولدان اؤتن‌لرین
باشماق‌لارین سئیر ائده‌رک
باخار- باخار.
بیرده گاهدان
اؤزو یاشدا اوشاقلارین
الوان- الوان باشماقلارین
گؤرمک هامان،
قاپ- قارا لوت آیاقلارین
او، دونونون اته‌یی‌له باسدیراراق،
اوره‌ییندن
قارا- قارا قان‌لار آخار…
«باران» هر گون سحر- سحر
بوغازینین گؤینرتیسین
بورنونون‌دا
قارا باسمیش باجالارین یوماق اوچون،
حیطده کی تووالئتین نؤوبه‌سینده
هئی دایانار،
هئی دایانار…

یئنه گئجه
اونون بوتون قازاندیغی سیککه‌لری
توستوله‌یه- توستوله‌یه
یانیب- یانیب
ائولری‌نین هاواسینی قارالاییب
هئی دولدورار،
هئی دولدورار…

گئجه کئچر
آتاسی‌نین باخیشلاری
توستو، دومان چوخالدیقجا
اوگئی‌له‌شر.
«باران» دا بئش باجیسی تک
گئجه‌لرده
آتاسی‌نین گؤزلریندن
یامان قورخار،
یامان قورخار…
تهران- یای ۹۴