من یالقیز اولمادیم کی…!
محمد احمدی‌زاده
ایللر بویو بیز ایکیمیز بیرلیکده یاشادیق
ایکی بدنده اولدوغو بیر جان کیمی
ایکی بوغازدا اولدوغو بیر ماهنی کیمی
ایکی قوش کیمی اوچدوق خیالیمیزدا کی ماوی سمالارا
قوندوق یام- یاشیل مئشه‌لرین آغاجلارینداکی بوداقلارا
اوتوردو دیزیمین اوستونده کدرلی گئجه‌لریمین یاسلاریندا
موتلو گونلریمین شادلیقلاریندا
آچدیم اونون اوزونه
زور گونلرده کؤنلومون قاپیسینی
دینله‌دیم اونون دیلیندن
اوره‌گیمدن اسن یئللرین سیزیلتی سسینی
اونونلا برابر پایلاشدیم آجی دولو خاطیره‌لریمی
اونونلا بیرلیکده قوخلادیم خوش گونلرین عطیر ساچان گوللرینی.
ان یاخین یولداشیم اولدو حیاتدا
یورولمادان سیرداشیم اولدو حیات یولچولوغوندا
بارماقلاریم تئللرینین آراسیندا گزدیگینده
بعضن دانیشدی ائله‌سینه
چاشدیریب منی، چالیشدی دوشوندورمه‌یه
دوستوم! من سنین اؤزونم ائله
یوخسا کیم بو قده‌ر یاخین اولار باشقا بیریسینه؟.
بو گونه‌دک هئچ دؤزه بیلمه‌دیم اوندان آیری دوشمه‌یه
هر گئتدیگیم یئره، اونو دا گؤتوردوم اؤزومله
و او ایندی هله ده منیم یانیمدا
اوتوروب گئنه دیزیم اوستده قوجاغیمدا
سیزلاییر ایچیندن گلن آذربایجان نغمه‌لرینی
یادا سالیر وطن خاطیره‌لرینی.
اونا باخیب من ده دوشونورم
کامانچام اولماسایدی گؤره‌سن
نئجه کئچیرردیم قوربتده کی یالقیز گونلریمی؟
