images
سئحیرلی آغاج
محمد احمدی‌زاده

بیری وارمیش، بیری یوخموش. اوجا داغین اته‌یینده‌کی آغاجین باشیندا بیر قوش یووا قورموشدو. گونلرین بیر گونونده، ناغیلیمیزین قوشو یوواسیندا، اوچ یومورتا قویار و بالالاری یومورتالاریندان چیخانادک اونلارین اوزه‌رینده یاتار. سونوندا او گون گلیب چاتار و قوشون بالالاری  یومورتالارینی سیندیریب، ائشیک دونیاسینا آددیم قویارلار.
نئچه گون گئچندن سونرا یومورتادان یئنی چیخان بالالار، اؤز آنالارینین سسینه ایلگی گؤسترمه‌مکلری  آنا قوشو فیکر- خییالا سالار. سونوندا بالالارینین کار اولدوقلارینی و هئچ بیر سسی ائشیده بیلمه‌دیکلرینی آنلار، آمما آنانین اصیل دردی اوندان سونرا باشلار. آنالارینین سسینی  ائشیده بیلمه‌ین بالاجا قوشلار، اؤز آنا دیللرینده ده اؤتمه‌یی باجارمادیلار. بئله‌لیکله آنا قوشون دردی ایکی قات اولدو. آرتیق اوچماقلارینی باجارانا قده‌ر او کار و دیلسیز بالاجا قوشلاری، بؤیوتمه‌دن باشقا چاره‌سی یوخودو.
تاکی او گون  گلیب چاتار. کیچیک قوشلار آرتیق یئترینجه بؤیوموشدولر و اوچماق واختلاری یئتیشمیشدی، آمما نه یازیق کی آنا قوش نه قده‌ر چالیشدی، هئچ بیر شکیلده اوشاقلارینا اوچمایی اؤیره‌ده بیلمه‌دی.  یازیق آنانین آرتیق بئلی بوکولدو. قول قانادی سینمیش کیمی، آغاجین بیر بوداغیندا سس سیز- صداسیز اوتوردو و کدرلی کدرلی اؤولادلارینا باخیب آغلادی و سونوندا اوتوردوغو بوداقدا یوخوسو توتدو.
یوواسینی اونون اوزه‌رینده قورموش اولان آغاج، آنا قوشون آغلاماق سسینی ائشیدر و اوره‌یی رحمه گلر. گئجه یاریسی آنانین و اوچ بالاسینین یوخولارینا گیرر و او دؤرد قوشا اؤنملی بیر سیر آچیقلایار: ” آنا دیلینده اؤته بیلمه‌ین قوش، هئچ بیر زامان اوچا بیلمز. ”
آغاج، قوشلارین رویالاریندا بونلاری دئییب و اؤز سؤزلرینه گئنه داوام ائتدی:
“منیم یئددی گئجه سیزین رویالاریزا گیرمه حاققیم وار. سیز اوچ بالاجا قوش! منه یاخشی قولاق آسین. دوزدور کی حقیقی دونیادا ائشیده بیلمیرسیز، آمما رویالاریزدا کی آنازین سسینی ائشیدیب و آنا دیلینیزده اؤتمه‌یی اوندان اؤیره‌نه بیلرسیز. آنا دیلیزده اوخویا بیلسز،  ایسته‌دیغیز یئرلره راحات راحات اوچا بیلرسیز”
رویالارینا اینانیب و آغاجین اونلارا دئدیکلریندن موتلو اولان  آنا قوش و بالاجا قوشلارین بیریسی، بیرآن یوخولاریندان دیک داشلاندیلار. اؤتمه‌یه و اوچماغا اؤنم وئرمه‌ین ایکینجی بالاجا قوش، تیکسینیب و یوخوسوندان دوردو، آمما گئنه‌ده باشینی قویوب یاتدی. رویالارا اینانمایان اوچونجو بالاجا قوش یئریندن هئچ دبشمه‌دی. سانکی رویا بئله گؤرمه‌میشدی.
ائرته‌سی گئجه‌دن تام یئددی گئجه بویونجا، سئحیرلی آغاج، آنا قوشو اؤز یانینجا بالاجا قوشلارین رویالارینا آپاردی. آنا قوش رویالاریندا، بالالارینا اوخودو. اوچ بالاجادان، یالنیز بیرینجیسی کی رویالارینا اینانمیشدی، آناسینا قولاق آسیردی.
ایکینجی بالاجا، آناسینین سسینی ائشیدیردی. حتتا اونون کی کیمی اؤتوب، اوچا بیله‌جه‌یینی ده بیلیردی، آمما اوچماغین اؤنملی اولدوغونو دوشونموردو. آناسینین بیرگون یووادان آیریلاجاغیندان و تک باشلارینا، آج و سوسوز شکیلده او یووادا قالاجاقلاریندان دا هئچ بیلگیسی یوخودو، بونا گؤره ده آناسینا قولاق آسمیردی.
اوچونجو بالاجا ایسه رویالارا اینانمادیغیندان دولایی، نه آناسینی یوخوسوندا گؤردو، نه ده اوندان اؤتمه‌یی اؤیرندی. شیرین شیرین باشینی قویوب یاتدی و هئچ بیر رویا گؤرمه‌دن گئجه‌نی سحر ائله‌دی.
سککیزین گونون سحریسی،  بیرینجی بالاجا قوش ائله‌دیغی ایشه هئچ اؤزو ده اینانمادی. آناسی کیمی اؤتمه‌یه باشلامیشدی و اؤتونجه ده، اؤز سسینی ائشیده بیلیردی. آرتیق هم اوخویوب هم ده ائشیدیردی. سونرا بیرآن نفسینی سینه‌سینده حبس ائله‌دی و قانادلارینی چیرپمایا چالیشدی.
یووادا قالان ایکی بالاجا قوش، گؤی اوزونده آنالاری و  بیرینجی بالاجا قوشو یانی  قارداشلارینین اوچماقلارینی و یاواش یاواش یووادان اوزاقلاشماقلارینی گؤروردولر، آمما هله گئنه‌ده، اونلارین اؤز آنا دیللرینده اؤتمه‌لرینی ائشیده بیلمیردیلر و یالنیزجا او حسرت دولو باخیشلاریلا، اوچوب  گؤزدن ایتمه‌لرینه باخیردیلار.

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4