hebib
هره‌نین اؤز دردی وار
حبیب فرشباف

سريب الوان بويالارين
دوزوم – دوزوم ايلك باهار.
قاتار – قاتار سيرالانيب
توپا، پامبيق بولودلار.
پيچيلدايير قولاغينا
كپه‌نك‌لر گوللرين؛
ياز نفسلي سحرين
ماهني اوچور هاواسيندا؛
دنيا باتيب سئوينجه،
دوشونجه
گنج‌ليك
تك‌‌ليك…

بو آن آياق سسيندن
گلير آت كيشنه‌مه‌سي؛
ماهني سوسور بيرآندا،
بيردن، بير ياد نفسي؛
كوزه‌نين ضربه سيندن
سينير بولاق آيناسي.

ساچلاريني گيزله ديب،
اوركك گئري‌يه باخير.
كوزه‌سيني دولدوروب،
قيوراق آياغا قالخير.
دايانير قارشيسيندا
دونيا گؤرموش بير قوجا،
ائنيب آتدان سو ايچير
بوز بولاقدان دويونجا.
بير توخداديب اؤزونو
قیزا توتور اوزونو:
-قيزيم دوه گؤرمه‌دين؟
– آنام وئرير آي عمي
آنجاق آتام
چوخ چكر هله راضيلاشماغا
تكجه علاجيم قاليب
قوشولماغا،
قاچماغا.
– سنده‌ن د‌وه سوروشدوم
قيزيم!
سن نه دئييرسن؟
مني بير اؤزگه‌سينه
سن اوخشاديرسان بلكه؟
– آتين سور اي …آي عَمي،
هره‌نين بير دردي وار
واللاه دوه‌دن يئكه.

 

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4