hebib
ساوالان
حبیب فرشباف

 ساچ- ساققالي زمانلار الي‌له بويانميش آغ،
سن اي بو اؤلكه‌نين دايانیشدان نیشانه‌سي!
اي يول- جيغير گؤتورمه‌ين اي افتخارلي داغ!
اي كئچميشين زمان ييخا بيلمز فسانه‌سي!

قالديرميسان الينده سرين، گؤي پياله‌ني،
ساغليق دئيه اؤزوندن اوزاق اولدوزا، آيا!
يوخسا ايناندين اینسانا سن، آلميسان اله
ساغليق دئيه، باشيندان اوجا مرد اوغوللارا؟

يارميش بولودلاري، گؤيه قالخميش او زيروه‌نه
قارتاللارين الي چاتا بيلمز، ناغيل قوشار.
زحمت چكن، فقير، داوا درمانسيز ائل‌لره،
اون‌لار شفالي ايستي سويون كوکره‌ير، جوشار.

قاققيلداشيب، سيره‌م سوزولن، يازدا دورنالار،
گؤم- گوي، چيچكلي دوزلرينه آه چكر باخار.
دؤزدوكده اودلو قامچيسينا سن بولودلارين،
گورگور بابا، بوينونا گؤي قورشاغين تاخار.

آچ سوفره‌لر دؤشه! يئنه يازدير قوناق گلير،
قوي ائل‌لرين آغير سوروسو گلسين اوتلاسين.
اؤز دوغما ائل‌لرين اته حسرتده قالسادا
امليك قوزو، شيشليیه قويروق دا قاتلاسين!

ساروان كيشي! گل آستاجا چك سن قاتاريني،
سوسسون بير آنليغا دره‌لردن آخان سولار.
چالسين بورول گئده‌ن دوه‌لر غملي سازلارين،
قوي چاغلاسين اوركده ياتان چنلي آرزولار.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4