چئویرن: روح‌انگیز پورناصح
ترجمه: روح‌انگیز پورناصح
روح‌انگیز پورناصح

یئرلی ـ یاتاقلی، اوره‌یی اوخشایان یازی‌لار، شکیل‌لر مه‌یه‌ر قویور اوردان ائشییه چیخسین. بیر یئرده اوتورسا دا تاققا ـ تاق بوردان وورور، اوردان چیخیر.
ایچ ـ ایچه تزه تزه دونیالاردا دولانماقدان یورولمازدی. ایندی هردن فیکیرله‌شیر، هردن بیرده داریخیر. آستا ایشله‌ینده ایسته‌ییر چیخسین ائشییه. تزه دونیالاری دولانماق مه‌یه‌ر بوندان سورعتلی اولا بیلر می؟ اؤزـ اؤزونه دئییر. داها بونا کؤهنه‌لیردی اونلاردا.
بیر آز دؤزور، داها حؤوصله‌سی چکمیر. تاققا ـ تاق گئتدییی یوللاری قاییدیر. چوخ کئچمز بیر تاق‌ایله اؤزوم ده او یئرلره گئدیب گزه بیلرم، دئییب، کؤکس اؤتوردو. مجازی دونیاسیندان ائشییه چیخیب ـ چیخمامیش گئرچک دونیاسی‌ایله اوزـ اوزه گلیر. نئچه یاریمچیق ایش ده‌ییر گؤزونه،  ایکی دونیاسینی‌دا قاتیب قاریشدیریب، ایش ایچینده ایش گؤرور، سیلان ذهنی بس ده‌ییردی، سیلان ایش ـ گوج ده بیر یاندان تاپیلمیشدی. بیر ایشی قورتارمامیش او بیری ایشی باشلامازدی، ایندی‌لر حؤوصله‌سی توتمور، یا یادیندان چیخیر، بیلمیر؛ بلکه ده ایکی دونیانی یاریمچیق گزمه‌سینه گؤره‌ هر نه‌یی یاریمچیق قویوردو.
اوره‌یی تزه‌دن توتولور، هنده‌ورینده هر نه وار دا، یوخ دا، هامی واردی دا، یوخدی دا. تزه‌لیک ده نه اورا گئده بیلیر، نه بوردا قالا بیلیر. بلکه ده اوچونجو دونیا گلیب ایکیسینی بیرلشدیره بیلئیدی. بس هامی نئجه ایکی دونیاسینی دا راحاتچیلیق‌لا دولاندیریردی؟ نه جور ائیله‌یه بیلردی؟ سؤزلر، شکیل‌لر، آدام‌لار، هر زاد مجازی دونیادا بیر جور گؤرسنیردی، گئرچک دونیادا بیر آیری جور، هره‌سی فرقلی دوروم‌دایدی، گاهدان دا بیربیرینین ترسینه، کیمسه‌نی هانسی دونیاسیله دوشونمه‌لیدی، بیلمیردی داها. مه‌یه‌ر اؤزونو بیلیردی؟
بلکه ده مجازی دونیا ایچرسی‌ایدی، گئرچک دونیا ائشیکی، یا دا عکسینه؟ بیلمیردی. ذهن ده کی بوجور بیر زادلاری آییرد ائیله‌یه بیلمزایدی. هر حالدا بیر جور، ایکی جورلوق داریخدیریر بونو.
وایبرین جورولتوسونو داریخماسینین ایچیندن ائشیدیر. سؤز دانیشماغا چاغیریرلار. بترده سؤز دانیشانیدی. او گون بیر یئرده ایسته‌دیلر دانیشسین، یئکه سؤزلردن باشلادی، ایکی کلمه دئدی، دالیسین گتیرنمه‌دی. بلکه ده وایبرده اولسون. اوندا یازاردی سؤز یازماغا گؤزله‌ییریک.
ائله بیل دونن‌ایدی، مکتبین بیرینجی گونونده آناسی اونون توکلرینی دم اسب ائله‌میشدی؛ بتر اوتانیرمیش، دئییرمیش بس لوت دی! بوتوو یولو بویون ـ بوغازینی اللری‌ایله اؤرتموشدو. صینیف‌ده ده معلمین نه‌لر دئدییینی بیلمه‌میشدی. بیر اللری اولموشدو، بیرده بویون ـ بوغازی. دئکولته گلین دونونو نه جور گییه‌جاغ‌ایدی؟ لاپ آزی اون ـ اون بئش دانا ال ایسته‌ییردی بویون ـ بوغازینی، سینه ـ باجاسینی اؤرتماغا. گولومسه‌دی، ایکی نسیل کئچیر او گوندن آی کیو، ایندی بیر تاق‌ایله هر نه ده‌ییشیلیر، اؤز اؤزونه دوشوندو.
مجازی دونیادا دا هر ایشین گؤره بیلیردی، دانیشیق، گؤروش، دوستلوق، آل ـ وئر، یازی ـ پوزو، … داها قوهوم قارداشینی دا چوخ اوردا گؤروردو.
یئنه حؤوصله‌دن چیخدی. بیر تاق‌ایله مجازی دونیاسینا قاییتدی. بلکه ده سؤز دانیشما اوردا اولدو. دوغرودان دا بیلمه‌دی سؤز دانیشما هانسی دونیادا اولاجاق؟ هر یئرده اولسادا، ایسته‌ییردی بیلسین، یالنیز سؤزلر ائشیدیله‌جک یوخسا سسلرده؟ ائله سؤز دئییر کی، دانیشیق‌دا مه‌یه‌ر سس‌لر ائشیدیلمیشدی، قالا یازماق‌دا؟
گؤره‌سن تکجه لایک یییه‌جک یا کامنت ده قویولاجاق؟ بو کی سؤز دانیشانی، یازانی ده‌ییردی، اؤزونو آف‌لاین گؤستریب، ساکیت‌جه‌سینه سؤزلره باخاجاغیدی.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

بیر جور ایکی جورلوق!

روح‌انگیز پورناصح
www.ishiq.net

آذربایجان ادبیات و اینجه‌صنعت سایتی

بیر جور ایکی جورلوق!

روح‌انگیز پورناصح
www.ishiq.net

آذربایجان ادبیات و اینجه‌صنعت سایتی

بیر جور ایکی جورلوق!

روح‌انگیز پورناصح
www.ishiq.net

آذربایجان ادبیات و اینجه‌صنعت سایتی