گلین باجی / رقیه کبیری

rugayyeh
گلین باجی

رقیه کبیری

هله نوبه‌میزه قالیر. میز آرخاسیندا اوتوران نومره ‌وئره‌ن؛ قارا بوغدایی ساچلی، اورتا یاشلی کیشی‌یه باخماقدان اوتانیرام. یقین او دا بیلیر بیز نییه گلمیشیک. گؤزوم دووارداکی، آغ اؤرپکلی، گؤیچک اوشاغین سوس دئیه، بارماغینی دوداغیندا ساخلایان شکیلده قالیب.

آشپازخانانین سکی‌سینه سؤیکه‌نیب، دئدیم: “گئتمیه‌جه‌یم!”

گلین باجی آغ یایلیغینی بوخاغی‌نین آلتیندا سانجاقلادی. قار چرچیوه‌لی گیرده گؤزلویونون اوستوندن منه باخدی: ” آنان بیر شئی بیلیر دا، دئییر گئت…!”

بیردن دیلیمه گلدی دئییم کی، “آخی سنه نه دخلی وار، گلین باجی!” ایسته‌مه‌دیم گلین باجینی اینجیدیم. تئلویزیونو آچیب، گؤزلریمی‌اکرانداکی اوچان قوشلارا زیلله‌دیم.

آنام، قاشیق الینده آشپازخانانین سکی‌سینه دیرسکلندی: ” الیمیزده کاغاذ اولسا، بیر سؤز دئینده تپه‌ریک گؤزلرینه.”

گلین باجی آنامین سؤزونو کسدی: ” گؤرمه‌دین، آناسی زهر تولوغویدو!؟ ” وئرمزدیز دا- دئدیم.

آنامین الینده‌کی قاشیق سکی‌نین اوستونه دامجیلادی. “گئنه باشلاما!” دئدی.”تک سن دئییل سن‌هاااا…سندن سونرا ائوده ایکی قیز دا وار.”

دینمه‌دیم. گؤزوم اکرانداکی قوشلاردا قالمیشدی. تدقیقاتچیلار نیشان قویماق اوچون حالقالاری قوشلارین آیاقلارینا برکیدیب، بوراخیردیلار.

“نه ائیله‌ییم. ائلچی‌لر قاپینی یئریندن چیخاردیر آخی… ” آنام ایدی یئنه آشپازخانادان سس‌لندی. گؤزوم اکراندا- “بیر دفعه دئه الیمده قالمیشدین دا…” دئدیم.

گلین باجی یئنه گؤزلویونون اوستوندن منه باخاندا، ائله بیلدیم جیزگی فیلیم‌لرده‌کی گؤزلوکلو بوتؤو آیدی.گوموشو ساچلارینی آغ یایلیغی‌نین آلتیندا گیزله‌دیب.

-“قیسمت قیزیم، قیسمتی نه گؤرموسن!” دئدی.

-“من اؤزومه گووه‌نیرم . کاغاذ نه‌یه لازیم‌دی؟”

گؤزلمه اوتاغیندا، دووارداکی سوس دئین قیز، باشقا اوتورانلارا باخمیر. گؤزونو، آنجاق منیم اوزومه تیکیب. نومره ‌وئره‌ن هردن –هردن منه، بیر ده یانیمداکی قومرال ساچلی قیزا باخیر. ائله بیل بیزدن سونرا، بوردا باشقا بیر آدام یوخدور.

آنام بیر منه باخدی، بیر ده گلین باجی‌یا. قاشیغی اوجاق اوستونده کی بوغلایان قابلامانین قیراغینا ووروب، ” قورخورام گلین باجی‌یا چکه‌سن” دئدی.

قاشیغی قابلامانین اوستونه قویوب، اوجاغی سؤندوردو. سوروتمه‌لرینی سوروتله‌یه-سوروتله‌یه تنه‌بییه گلدی. الیمدن یاپیشیب، گلین باجی‌نین یانیندا اوتوردوب، دئدی: “سن بیر سؤز دئه گلین باجی! بو قیز کؤنز‌دی”

گلین باجی آیاقلارین اوزالدیب گولدو. ساختا دیشلری، میرواری دنه‌لری کیمی‌آغ-آپباغ ایدی. ” قیزیم! بلکه بیزیم زامانیمیز کیمی‌یئنگه-موشاتا قاپی‌نین دالیسیندا کئشیک چکه!”

“ایندی او زامان دئییل!” دئدیم “بیز دانیشگاه گؤرموشوک. هر شئیی بیلیریک.”

آنام دا گلین باجی‌نین یانیندا موخدّه‌نین قاباغیندا یئره اوتوردو. “کؤنزلیک ائله‌مه. گلین باجی‌نین توی گئجه‌سیندن بری، ائل- طایفانین گؤزو قورخوب، الیمیزده کاغاذ اولسا دیلیمیز اوزون اولار.”

گلین باجی، ساغ یاناغیندان آخان گیله‌لری یایلیغی‌نین اوجویلا سیلدی. یاییلیغی سورمه رنگینه بویاندی. گؤزلویونون آلتیندا، سول گؤزونون چوخوروندا بیر گیله قالدی..

تئلویزیون کنترلونو یئره چیرپیب آناما باغیردیم: “گئتمیه‌جه‌یم….بیلدیز…گئتمیه‌جه‌یم!”

دئدیم گئتمیه‌جه‌یم؛ امّا گلدیم. اوسته‌لیک یانیما بیر یئنگه ده قوشدولار. آداخلیمدان علاوه، باجیسی دا بیزیم‌له گلدی. کاشکی اونون یئرینه گلین باجی گلیردی.

گؤزلمه اوتاغی‌نین آغ، چیرکه سوْو چارپایی‌سی یانچاقلاریما باتیر، میخدی سانکی.

آداخلیم یئرینده قایناشیر. سانکی اونون قیزلیغی‌نین مؤهورونو کاغاذا باساجاقلار. یانیمدا اوتوران قومرال ساچلی قیزین عطیر قوخوسو، بورنومو آجیشدیریر. قیز منه باخیب، دووارداکی شکلین آلتیندا ایله‌شن قادینی گؤستریر. او دا قومرال ساچلی‌دیر. قیرمیزی دیرناقلاری آغ‌‌آپباغ اللرینی قات-قات گؤزل گؤستریریر. آیاقلارینی بیر-بیری‌نین اوستونه آشیریب. باشماقلاری‌نین اوجا دابانلارینا باخیرام. قیز “مامام! ” دئییر.”یانیمدا‌کی دا آداخلیم‌” آداخلی‌سینا باخمیرام. ماماسی، ماتیکلی دوداقلاری‌لا اوزومه گولومسه‌ییر. ماتیکی دیرناقلاری‌نین لاکی رنگینده‌دیر. “سیزده ماینایا گلیب‌سینیز؟” آداخلیمین باجیسی مندن قاباق اورتایا آتیلیر: “بلی، بو جومه تویلاری‌دی!” دئییر. جانیمی‌قیزیشما باسیر. آداخلیم یاواشجا قولومو دومسوکله‌ییب،گولور.

اوره‌ییمده بیر شئی قایناشیر. سانکی دامارلاریمی‌سیخیر. آز قالیرام دوروم نومره وئره‌ن کیشی‌نین میزی‌نین اوستونده‌کی کاغاذ دله‌نی آداخلیمین باشینا چیرپیم. آغ رنگلی، کوره‌کن کت-شالواری گؤزومه چیرکه سوو گلیر. گؤزومو، دووارداکی سوس دئیین قیزین دوداقلارینا تیکیرم. قیز دوداقلارین بوزوب، آداخلیما باخیر.

 گلین باجی‌نین گؤز چوخورونداکی یاش گیله‌سی هله قورومامیشدی. ” من یازیلمامیش آغ-آپباغ کاغاذ کیمی‌ایدیم” دئدی. یایلیغینی باشیندان آچیب، بیر ده سانجاقلادی. “او زامان حکیم-قابیله یوخ ایدی کی قیزیم!” سونرا باغداش قوروب، بیر ده دئدی”موشاتانین سؤزو حکم ایدی.”

آنام: “گلین باجی! هله طایفا داعوالاریندان دئه با..”

گلین باجی دئدی “هله اؤز عمواوغلوم ایدی‌ها…، اؤزگه دئییلدی کی…!”

گؤز اوجو آداخلیما باخیرام. ماینا سؤزونه گولوب، قولومو دومسوکله‌ینده، بیلمیرم نه‌دن اؤز یانیمدا دئدیم بلکه اؤزگه‌دی یانیمدا اوتوروب. تاکسی لار دا، اؤزلرینی قادینلارا سورتن کیشی‌لر یادیما دوشدو. بیر آن دئدیم بس، اوندان زهلم گئدیر.

میز آرخاسینداکی نومره وئره‌ن کیشی پول ساییر. یانیمداکی عطیرلی قیز منه ساری اییلیر. الینی قولاغیما طرف گتیرنده، اوزون، ماوی مانیکورلو دیرناقلاری یاناغیما باتیر.

-“سن ده قورخوسان؟”

-“بیر آز”

دیرناقلاری یاناغیمی‌اینجیدیر.

-“دئییرلر بو قابیله اؤز ایشینده باجاریقلی‌دیر. ترمیمی‌ده یاخشی بیلر، هن…؟”

-“ترمیم نه‌دی؟”

-“هئچ زاد بابا، قیزلیغی تیکیرلر دا…”

-“نه بیلیم. بیرینجی دفعه‌م‌دی گلیرم”

قیزین ایستی نفسی یاناغیمدان اوزاقلاشیر. دوداقلاری پاریلداییر. دووارداکی قیز، گؤزلرینی میزین اوسته‌کی درگی‌لره زیلله‌ییب. درگی‌لرین اوزه‌رینده‌کی اوشاق شکیل‌لری سوس دئین قیزا اوخشامیرلار.‌هامی‌سی‌نین دوداقلاری ماتیکلی،گؤزلری سورمه‌لیدیر. شکیل‌لرین بیرینی قومرال ساچلی‌یا گؤستریرم “گؤره سن بو اوشاقلار، بیزیم یاشیمیزا یئتیشنده، اونلاردان دا قیزلیق وثیقه‌سی ایسته‌یه‌جکلر؟”

قومرال ساچلی، شکیله باخیب گولومسه‌ینده ماینا اوتاغی‌نین قاپیسی آچیلدی. قیزین گولوشو دوداقلاریندا دوندو. اوچ نفر ائشیگه چیخدیلار.

 گنج قیز ایله آداخلیسی گوله-گوله قاپی‌یا ساری گئتدیلر. اونلارین آرخاسیندان گلن قادینین الینده، اوزون، ائن‌سیز بیر پاکات واریدی. نومره وئره‌ن کیشی، قومرال ساچلی‌یا گؤز‌ اوجو اشاره ائله‌ییب “سیزین نوبه‌زدی” دئدی. قومرال ساچلی‌نین گؤزو اؤنوموزدن کئچن قادینین الینده کی پاکاتدا قالمیشدی.

آنام آشپازخانادان گلین باجی‌یا گؤز ائله‌دی، اؤز یانیندا دئدی بس گؤرمه‌دیم. “هله سلطان عمّه‌قیزینی دئه با…”

گلین باجی آیاقلارینی اوزالداندا، آغ دونونداکی ساری کپنک‌لر سانکی اتگیندن یوخاری‌یا اوچدولار. “یازیق سلطان عمّه‌قیزی…” دئدی.

ایسته‌دیم دئییم: “گلین باجی! منه گئجه ناغیلی دانیشما.” گلین باجی، گؤزلویونون شوشه‌لرینی هوْولاییب، یایلیغی‌نین اوجویلا سیلدی “اونون گوناهی یوخ ایدی کی! بی‌بی اوغلویلا دوشمان‌چیلیقلاری وار ایدی، آجیغینی اوندان آچمیشدیلار. قیزلیغینی پوزموشدولار.”

دیلیمین اوجوندایدی آز قالمیشدی دئییم: “آخی سلطان عمه قیزی‌دان، منه نه وار؟”

گلین باجی اودقوندو “توی گئجه‌سی- عمّه خانیم، موشاتانین اووجونا پول باسمیشدی، کیمسه‌نین دابان قانینی شوشه‌یه دولدوروب، دسمالین اوزه‌رینه توکمه‌یینی موشاتایا تاپشیرمیشدی. دئمه بس قان قورویوب.‌هارا چاتاجاق! موشاتا،‌ها شوشه‌نی چالخامیشدی، بیر داملا قان بئله دسمالا تؤکولمه‌میشدی. او گئجه، هم موشاتا، هم ده سلطان عمّه‌قیزینی اؤلدوسونه دؤیموشدولر.”

آنام، آشپازخانادان سس‌لنیر: “هله دئییرلر سلطان عمه قیزی، بیر ایل یاتالیق یاتدی.”

گلین باجی‌نین گؤزوندن یئنه ده یاش آخدی. “بونلارین هئچ بیری، خالا قیزی‌نین قیزی کیمی‌نیسگیل‌لی دئییلدی. اونون قیزلیغین پؤزاندان سونرا،کبینینی بیر قوتو شیرینی ایله ائولرینه گؤندرمیشدیلر. یازیق خالا قیزی، ایکی آی چکمه‌دی قیزین غصه‌سیندن فیججه‌له‌دی. اؤله‌نه قدر قیزی‌نین قبرینی بئله گؤرمه‌دی”

نومره وئره‌ن کیشی، میزین سورگوسوندن تئلویزیونون کنترلونو آلیب، دوواردا پایا اوزه‌رینده‌کی تئلویزیونو آچدی. یئنه دوننکی قوشلارین فیلیمی‌نین تکرارینی گؤستریردی. قوشلارین آیاغینا مئتال حلقه وورودولار.

 قومرال ساچلی‌دان سونرا، سیرا بیزه چاتاجاق ایدی. اوره‌ییم گوپ-گوپ گوپبولداییر. دئییرم بس آداخلیم دا بو اوره‌ک دؤیونتولریمی‌ائشیدیر. آنجاق اونون ایسه گؤزو تئلویزیوندا‌کی قوشلاردان یایینمیر. باجیسی تبسّوم‌له اییلیب، “ایندی بیزیم نوبه‌میزدی” دئییر. منیم دوداغیم قاچیر. دووارداکی قیزا -” بو زهلم گئتمیش گلمه سیدی، اولمازدی‌ها…” دئییرم. قیزین، بارماقلاری‌‌نین آلتیندا، دوداقلارینین گولومسه‌ییر.

مطبّین قاپیسی هوژمونن آچیلاندا دووارداکی قیز دیسکیندی. گولوشو دوداقلاریندا قورودو. من ده دیسکیندیم. ایکی قادین، گنج بیر قیزین قولوندان یاپیشیب ایچه‌ری گیردیلر. قیزین آیاقلاری یئرده سورونور. ریمل‌لری‌نین قاراسی قیپیقلارینا یاییلیب، یاناغیندان چنه‌سینه آخینیب. اؤرپه‌یی‌نین آلتیندان یایینیب ائشییه چیخان تئللرینده‌کی گول، آلماس کیمی‌پاریلداییر. ماتیک‌سیز دوداقلاری جادار-جاداردی.

اونلارین آرخاسینجا، اوتوز یاشلی بیر کیشی ایله ایکی چارشابلی قادین ایچه‌ری گیریب، نومره وئره‌ن کیشی‌نین اؤنونده دایانیرلار. قادینلار، قیزدان بیر آز آرالیدا، چیرکه‌سوْو صندل‌لرین اوستونده اوتوربلار، کیشی ایسه، نومره وئره‌ن‌له دانیشیر. قار کوتونون کورک حصه‌سی قیریشیق‌دیر. ائنلی کؤره‌یی، نومره وئره‌ن کیشینی گؤرمه‌ییمه مانع اولور. یالنیز سسینی ائشیدیرم. “نوبه‌سیز اولماز!” دئییر. کیشی‌نین الینده گیزلتدیگی سیگار، توستوله‌ییر. نومره وئره‌ن “سیگاری ائشیکده چکین.” دئییر. شکیلده‌کی قیز، الی‌آغیزیندا اؤسگورور. کیشی، الینده‌کی سیگارینی چارشابلی قادینلار گؤستریب- “من ائشیکده‌یم!” دئییر. ریملی یاییلان قیزین گؤزو، اونون قیریشیق کوتوندا قالیب.

بالدیزیم، قیزین یانینداکی قادینلارا اییلیر: “سیز نه اوچون گلیب‌سینیز؟”

قادین: “دونن گئجه تویلاری ایدی.” دئییب الینده‌کی کاغاذی گؤستریر “الیمیزده کاغاذ دا وار، ائله بو خانیم دوکتور وئریب” دئییر.

گلین باجی‌نین گؤزونون چوخورونداکی یاش گؤزومده پاریلداییر. اوتانیرام قیزین یاییلان ریمل‌لرینه باخیم.

گؤزوم ماینا اوتاغی‌نین قاپی‌سیندا قالیب. قومرال ساچلی، باییرا چیخیر. آداخلیسی، قولوندان توتوب. ماماسی آرخاسیندان گلیب. پاکاتی کیفینه قویور. قیز اوزومه گولومسه‌ییر.

آداخلی‌سیندان آیریلیب، منه ساری گلیر. اییلیب قولاغیما “قورخما! چتین دئییل” دئییب آداخلی‌سی‌نین الیندن یاپیشیب، گئدیر. ماماسی‌نین دیک دابان‌لاری‌‌نین سسی گئت-گئده اوزاقلاشیر.

نومره وئره‌ن کیشی، منه اشاره ائله‌دی. آداخلیم‌لا بالدیزیم منیم‌له بیرلیکده قالخدیلار. آداخلیمی‌بالدیزیما گؤستریب، دئدیم: “اولار بو گلمه‌سین؟” او ایسه یئنه دیشلرینی آغارتدی. “اصل‌کار او‌دی دا…” دئدی.

اوزونه گولمه‌ییم گلمه‌دی: ” زهلم گئتمیش گولنده، نئجه ده دوزسوز اولور!” دووارداکی شکیله دئدیم.

اونلاردان قاباق ایچه‌ری گیریرم. قابیله خانیم اوزومه گولور. اوندان خوشوم گلیر. گلین باجی کیمی‌گؤزلویونه باغلادیغی زنجیر، اوزونون ایکی طرفیندن ساللانیب. اوتوردوغو صندله یاراشیر. ماوی چرقدینین آلتیندان قارا تئل‌لری قاشقاسینا تؤکولوب. مانتوسونون بیر دویمه‌سی قیریقدی. قیرمیزی بلوزو گؤرونور. اوزومه گولور “پرده‌نین آرخاسینا کئچین!” دئییر.

پرده‌نین آرخاسیندا سوس دئیین اوشاغین اکیز باجی‌سی دوواردان منه باخیر. اوتاقدا، نابلد تخته اوخشار بیر شئی وار. مریض‌خانالارین تخت‌لری کیمی‌دئییل. کئچمیشده آپاندیس عملیاتی اوچون مریض‌خانادا یاتمیشام. قابیله خانیمین سسی گلیر:”شالوارینی سویون! قالخ اوزان ماینا تختینه، گلدیم.”

آداخلیمدان آدینی، شهرتینی سوروشور. منیم قیزلیغیمدان اونون آدینا نه دخلی وار، بیلمیرم.

ماینا تختینه نئجه چیخاجاغیما معطّل قالمیشام؛ اوجالیغی منیم سینه‌مه‌جن‌دیر. اورتاسیندا گیرده بیر دئشیک، آلتیند ایسه ایستیل بیر قاب وار. ایکی طرفینده آیاقلیق کیمی‌اوجا پایا گؤرونور.

قابیله خانیم، اللرینده طبّی الجک، پرده‌نین دالینا گلیر: “بس بئله نییه؟ شالوارینی چیخار، اوزان تخت اوسته!”.

بالدیزیم پرده آرخاسیندان سس‌له‌نیر-“کؤمه‌یه گلیم‌می؟” قابیله خانیم “ایسته‌مز” دئییر.

نه یاخشی کی، “ایسته‌مز” دئدی. او زهلم گئتمیش گلسه‌یدی، چیخیب قاچاجاغیدیم.

شالواریمی‌چیخارا-چیخارا، شکیلده‌کی سوس دئین قیزدان نه‌سه اوتانیرام. قابیله چارپایانی آیاغیمین آلتینا ایته‌له‌ییر. گوجن-بیللاه ماینا تختینه چیخیب، اوزانیرام.

قابیله “آیاقلارینی، آیاقلیقلارین اوستونه قوی! جان کؤینه‌یینی بیر آز یوخاری قالدیر” دئییر.

دووارداکی شکیل منه باخیر. منی گؤرمه‌سین دئیه، گؤزلریمی‌یومورام.

گلین باجی گؤزلویونو چیخاریب، موخدّه‌یه دایاندی.گؤزونون چوخورونداکی یاش قوروموشدو. دئدیم: “سونرا نه اولدو گلین باجی؟” سوسدو؛ ائله‌بیل سؤزومو ائشیتمه‌دی.

بیلمیرم گؤزلریمدن قولاقلاریما آخان نه‌دیر. ریملی یاییلان قیز کیپریکلریمین آراسیندان گؤزلریمه گیریر. گلین باجی یئریندن قالخیب، پنجره‌یه ساری گئدیر. نومره وئره‌ن کیشی ساعاتینا باخیب، اوتورانلاری ساییر. سلطان عمّه‌قیزی یاتالیق یاتیب. خالاقیزی‌نین قاپی‌سینی دؤیوب، شیرنی قوتوسو اوستونده‌کی پاکات ایچینده قیزی‌نین کبینینی وئریرلر…

قابیله خانیم “قالخا بیلرسن ” دئییر.گؤزلریمی‌آچیرام. شکیلده‌کی قیز گؤزلرین یوموب.

قابیله خانیم الجک‌لرینی چیخارا-چیخارا “بوتؤو قالاجاق، قیزلیغین گیرده‌دی” دئییر.

آداخلیم بارماغینی استامپا باتیریب.کاغیذین اوزه‌رینه باسدیقدان سونرا بارماغینی شالوارینا سورتور. آغ شالواریندا جوهر لکه‌سی قالیر….

فروردین90

Check Also

کپنک‌لری قوْرخوتمایین / رقیه کبیری

کپنک‌لری قوْرخوتمایین رقیه کبیری اؤلوسونو آستاجا یئردن گؤتوروب، چؤرک سبدینه قوْیدوم، ائوه گتیریم. ساغ- سوْلوم، ...