سؤکولونجه تاوانی یئددینجی گؤیون
ایلکین یاز سحری …
یووارلاق بیرداش دوشدوم
آغیلیمین درینلییینه
ایندی من بیر قارا داش، درین سویون
سوکوتوندا
مین‌‌ ایلدیر چیخارانماییر
آغیل‌لی دلی‌لری
بئینیمین آغ جییاریندان!؟
ائله اوردان باشلاندی باشیم آیاغی …
گئدن گلنی بیلن بیلمه‌یه‌نی تؤکولدوم
مثلث برمودایا!
آمان آللاه کیمه دئییم درد‌لریمی
یاردیمجی‌لار یاپ – یوپ
بایقوش‌لار سئور کیمی‌دیر
خارابالیق‌لار
اینیمده دوغو کؤینه‌یی!
جانیمی یاندیران بئینیمی دوندورور
فیکیریم توستوله‌مه‌ده ایچ کؤزومو
اؤزومه قارشی باغیریرام
کیمسه ائشیتمه‌دن
او هوی دؤن دؤنگه‌لری
و دؤن آدینیزا!
دؤن …
قوپارد دوداغیمدان آغری آجی‌لاری
و دوشورد عیناد آت نال پاریلتی‌سیندان
آدینی!؟
آت اودو، سویو سؤندور! …
یاخانیزدان ایینه‌نی
چیخارت قارا داشی!؟
و گوجن گوج‌لرینی
دوغ دوغرولاری تاپیرکن
هر طرف جهننم هر طرف آلابوز
یول‌لاریم یولسوز ال‌لریم السیز
یؤن یؤرم فیرتینا اوکیان‌لار چالخانتی‌لی
ناققالار قان قودوز!
سیغیناجاغیم یابان گؤز ساری داش!؟
ایکی ال بیر باش …
اؤزوم اؤزومدن سویونموشام
دؤن
دؤن آدینیزا …
بورا آمازون مئشه‌سی
آغاج‌لار آدامجیل حیوان‌لار ییرتیجی
واللاه یامان قورخورام گؤزلرمین اویناشیندان
گؤزلرینی اوخشاسا دا
سس‌لرین صدفی‌نی
دایانمادان دؤن
تویوقلارین چیغیرتیی‌سیندا بیتدی،
تولکولرین آندی
دؤن ائوینیزه
دؤن
سون پازئل‌لرینی دوز
بیری ایری …
اَیریسی دوز
منی الینه آلان اولو تانری …
نه سیز نه بیز،
هامیمیز …
و بورا
قیزیل توپراق
یامان گونده قان قارداشی
قورد قوجامان
جاوان
تبریز
بورا وطن
بورا باش و،
تن.