و سئل‌لرین گونجل آخاری …
آلاچات ایلان‌لار دولاشیب بوینوما قیزیل‌لی داغ‌لار
آخیر آخیریمیزا دایانمادان تانری
داش داش‌لا توققوشور باش باش‌لا یئر گؤی
چالخالانیر ائو ائشیک دالغالانمادا کور سو‌لار
تاققاتاق آتلانیر باشیمیزا دام- دووار
گؤیرمه‌ده اوتاق‌‌لاری بوغدا گول‌لری
سیلیب سوپوروب آپاریب آخار باخاری
داشیردیر داغ‌‌لاری ائویمیزه ساری …
داش قالاق وورها وور
اؤلمز بیراؤلوم رومانی …
قورخمازدیم کؤلگه‌دن بوینوز چاغی
آمما یامان قورخورام
دهشتلی سئل‌لرین هایقیرما‌سیندان
رحمسیز، یابانجی، یول- یولاق تانیماز
داشدان داشا چیرپجک
سیلیب سوپورجک ائو ائشیییمیزی
رحم ائتمز وارلیغیمیزا
یازیب یازمادیق‌لاریمیزا
یئنی فیکیر چانتاسی بوجاق‌‌لاریمیزا …
هر نه‌یی آپاریب ائویمیزده اولان‌‌لاری
سؤکوب داغیدیب سؤزجوک‌لر داغارجیغین
شعیر دفترلریم لوهمه‌لری لهله‌ییر
ماسامی کامپیوتئریمله تاریم کؤینک‌سیز
آپاریب قویلاییب اؤلمه‌دن اؤنجه‌ده منی
اوخویوب دیلسیزلیییمی کیتاب‌لارین قابیغین
و آپاریر سئل‌لر منی دویا بیلمه‌دن سنی
یئر آلتی آختاران‌‌لار قازیب چیخارار
مینلر تون داش- تورپاق آلتیندان
بئیین سوللول‌لاریمی سور- سوموگومو
موزئی‌لره دوزرکن
سئل یاتاغیندا تاپیلمیش سینیق قلمیمی
وحشی طبیعت چپرینه تاخیلمیش گؤز ببه‌ییمی
چاتلاق توپراق‌‌‌لاردا دؤیونن اوره‌ییمی
آمان آللاه؛ …
آمان آللاه «تاناتوس »لار قلمی سونگو
قانیم دامار‌لاریمدا دایانمادان آخیر سئل‌لر
بونلار هامیسی یالقیزلیق‌دیر یولداش
بولودسوز هاوانی تانیماماغیمیز
چای- چاخیر یاتاغیندا کؤلگه‌له‌نیب یاتماغیمیز
واللاه یامان درددی، …
یامان درددی
دیلی باغلی، گؤزو آچیق،
اؤلمه‌ییمیز.
مسعود اسلامی
چئویرن: مسعود اسلامی
ترجمه: مسعود اسلامی
سسلندیرن: مسعود اسلامی
- شعر
- اوخوماق زامانی: < 1 دقیقه
- https://ishiq.net/?p=35571
چاپ
