منی چوخ دانیشدیریب
اورا- بورامی آختارما دوکتور!
منیم اؤلوموم دیلیمین اوجوندادیر
کس چیخارت بو یارانی سؤزجوک‌لرین ذئهنیندن،
کس چیخارت سؤزلرین کسکین‌لییین
شاعرین دوشونجه‌سیندن دوکتور!
من اؤلمک ایسته‌مه‌ییرم،
لاپ آسان یئرده‌دیر بو یارا
کس چیخارت و سیل حیسس‌لرین اؤپوجویون
عاطفه‌نین یاناغیندان!
کس چیخارت دوشونجه‌نین زوغونو
سؤزلرین اختیاریندان دوکتور!
من اؤلمک ایسته‌مه‌ییرم،
کس چیخارت فیکرین اینجه‌لییین
مصراع‌لارین جوهرسیندن دوکتور!
منی باغیشلا پول- پارامدا یوخدو سنه وئریم،
آللاهدان خاطیر کس چیخارت سؤزجوک‌لرین ایهامین
اوخوجولارین ذئهنیندن!
من اؤلمک ایسته‌مه‌ییرم دوکتور،
چیخارت اؤلومومو دیلیمین اوجوندان!
بونو بیل کی،
دئییبدیرلر دیلدن شیرین هئچ نه اولماز آجی‌دا
کس چیخارت آجی‌لاری دیلیمین شیرینلیییندن!
ائله‌جه ده شیرین‌لری قات
آجی‌لارین طامینا دوکتور!
من اؤلمک ایسته‌مه‌ییرم،
هئچ نه‌ییم اولماسا دا
کؤهنه بیر فیکیریم وار
ایسته‌سن سنی ده گتیره بیلرم بورایا.
آماندی کس چیخارت دیلیمین اوجونو
سؤزلرین قارا جییاریندان!
ایمکانیندا اولماسا
کس چیخارت بوتون دیلیمی!
دیلسیز ده یاشایا بیلرم بیر نئچه گون، آی
و نئچه ایل.
سؤزوم بیر‌دیر دوکتور!
من اؤلمک ایسته‌مه‌ییرم
سن آللاه دوشون منی بیر آنلیق بوردا
فیکریمی بیل،
من اؤلمک ایسته‌مه‌ییرم
دوکتور …!