طبیعت قان چاناغی، دومان گؤز دووار
اوزانیب گؤیلره گئجه کؤهره‌سی؛
ایلک یاز دئیه آغ الوان گیلایول‌لار
یوللاندی ال‌لره بهشت قاپیسی.
ایلدیریم گول‌لری ماوی‌دن قیرمیزی
کپنک قانادیندا ساغالماز بیر یارا
سؤکولدو گولوش‌لر دارگلمه‌ده دوداغ‌لار
چالیشمالار تیکان باتدی گؤزلرینه سس‌‌لر
سیلکینرکن قیردی شیطان نوخدانی…
بورودولدو داغ داش کور دومانی
هاوا شیلیم شهره، هاوا قان قانچیل
یئل اسدی آجی قاشیندی سؤزلر دریسی
اویاتدی شهرلری دنیز نفسی،
دالغالار ایچینده
بوشالتمازدان قیرمیزی اخطار هاوا اوزمانینی
قوراقلیق دئییل بو ایل حیوان‌لار ائکیز دوغور
دمیرگؤیریر …
ساریمتیل آغ اوووش بیتکی‌لر
سؤکولدو ال‌لریمی اینانج ایپ‌لری
ایلمه ایلمه توخونمالار
دولدورورکن بوشالتدی اتک‌لری فیکیرلر
تیلویزیون هؤرومجک،
بئیین‌لر تور توخونوب ال‌لرینه
گؤی‌لر قار- قار قارالدی یئرلر
سس‌‌لر یابانجی
قارقیش‌لار نئیسان یاغیشی
گؤیریر بئینیمی اینیلتی ماهنیسی
ال‌لر قان قیرمیزی، اوزلری ایچدیم
زعفران چایین
اوخویوب آیاقلاریمی جهنم اووچوسو
و آمانسیز ایمانسیز‌لار …
دایانا بیلمه‌دن سؤزجوک‌لر داماریندا
سؤکولدو جیبلریمده‌کی اینام کؤبه‌سی
ایلدیریم چاخمادان دولو دوشدو بئینیمه
فیکیر قیرینتی‌لاری
و دولدورا بیلمه‌دی الینده‌کی بوش چانتا
آغاج‌لارین دوداغی آیاق‌لاردا
و الیم اللرده گؤیلری گؤیریر
یئرین بئلینده
سؤزجوک‌لر هوروت-هوروت اوز اوزه
باخیش‌لار قویروقلو دره بئی تولکو
اوهوی ی ی ی ی …
بایقوش سسینده اویوموش قارتال‌لار
ایسلاتدی قولاق‌لاریمی بولودسوز یاغیش
یئنی اینسانلار گؤیردی یئنی دونیالار
دوندورور گونشی گؤرونمز بیرکؤلگه
گؤزوم خردجل، آلینیم سوخولدو جیبلریمه
آغاج‌لار ایمسیله‌مه‌ده ال‌لریمی
«… اؤلدو گون گونو دوغدو آت‌لار»
بورا اوزو، پایلانیر اللرده آلت‌لار!
سؤزلر بیری بیرینه سارماشیق
اوجون ایتیرمیش …
کوچه باشیندا احسان آغاجی
سیزه یازیغیم گلیر قارا قوروم کلمه‌لر
ایلان وورسا کل مه‌لر
و، …
آغاج‌لار دیبینده، یام یاشیل بیتکی‌لر
اوجسوز بوجاقسیز
گومولدو هارایا سئوگیلی پالید‌لار
خیالین هانکی چؤللویونده
رنگ به رنگ قوشلارین سسی
باهارین عؤمور باغیشلایان هاواسی
هانکی ایبلیسین نفه‌سینده
هانکی دوغوزون سسینده
آیاقلادیم شئه مونجوق‌لارین
دولاشدیم کپنک‌لرین اوچوشونا
بال آری‌لارین ویزیلتیسیندا
گیزلتدیم اوره‌ییمده سیزیلتی آغاجلاری
بوشالتدیم اون‌دؤردلویونو ایشیغیندا گئجه
و یومدوم گؤزلریمده دنیزی
مئشه‌نی یاخدیم اودلارا
یاندیریرکن کول سپدیم داغ داشا وطه‌نی
و…
مسعود اسلامی
چئویرن: مسعود اسلامی
ترجمه: مسعود اسلامی
سسلندیرن: مسعود اسلامی
- شعر
- اوخوماق زامانی: < 1 دقیقه
- https://ishiq.net/?p=35647
چاپ
