اوشوتمه/ ائلدار موغانلی


اوشوتمه

ائلدار موغانلی

قار یاغیر …
قار یاغیر اوره‌ییمین باشینا
ایچینی ایتیرمیش
تامینی اونوتموش
قارا بیر قار؛
قریبه‌دیر روزیگار…!
بولانیر آغ چیچک‌لی قیزیل آینام
اوشویور بنؤوشه‌لی دونیام.
جان‌لانیر آینامدا
قاسیرغایا دوشموش جیلیز بیر داغ
اته‌یی چیرکاب
باشی چیلپاغ.
یازیغیم گلیر بئله داغا،
بئله‌هاوایا.
یازیغیم گلیر بئله قارا
بئله روزیگارا.

قار یاغیر اوره‌ییمین باشینا
قارا بیر قار…
نه داغی قینایاجاغام
نه ده‌هاوانی،
نه قارا قاردان کوسه‌جه‌یم
نه ده غریبه روزیگاردان،
یالنیز
آساجاغام قیزیل آینامی
ماوی گؤزلو  باهار گؤزه‌لی‌نین
قیزیل ساچ‌لارین‌دان؛
ارییه‌جک قارا قار
دورولا‌جاق آینام.
ایته‌جک قریبه روزیگار
باهارلانا‌جاق دونیام.

                                                   آذر – ۱۳۸۷– تهران

Check Also

بلکه … / سحر خیاوی

بلکه … سحر خیاوی آاااه… ایچیمده سورگون گئتدیگیم اوزون ایل‌لر وار، اوزاق- اوزاق یئرلر، بوزقیرلیق، ...

One comment

  1. باهار، گولون آچان چاغی‌دیر؛
    قیشین اورتاسیندا اولسا بیله…
    و گوللر آچاجاق ، باهارلاناجاق دونیامیز هلبت.
    اینانج دولو سایدام دویغولار گوجلو بیر قلمین اوجوندان پوسکورورسه، “ائلدار موغانلی”نین شعری اولار کسین! چوخ گؤزل، یاشایین سیزی!

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *