قادینین گؤزلریندن اوچدو کپه‌نک
اوچوب قوندو-
باش‌داشی‌نین دؤشونده‌کی چیچه‌یه،
آغلی قارالی ناخیشلاری
دامجی- دامجی آخدی داش اوره‌یه.
داش اویاندی،
قادینین اوره‌یینده
بیر پاییز آخشامی‌نین سون پیچیلتی‌لاری
آلوولاندی.
کپه‌نک اوچدو
دؤنه – دؤنه اوچوب قوندو-
گاه چیچه‌یه
گاه گؤزلره؛
نه قادینین یاناقلارینداکی‌لار قورودو
نه باش‌داشی‌نین دؤشونده‌کی‌لر اریدی.
اوچوب قوندو … قونوب اوچدو …
ساریلدی بیر- بیرینه
کپه‌نک‌لر، چیچک‌لر،
یاناغیندا
اوتانجاق بیر بنؤشه‌نین ایزی قالدی قادینین؛
چیچکلندی آغلی قارالی ناخیش‌لار
اریدی مزار.
مهر ۱۴۰۱- تهران
