هانکی داغلارین سینه‌سینده سیغاللانیب بو باخیش
هانکی زیروه‌نین دؤشوندن امیب بو قوش،
قایالار، یوکسه‌لیشیندن چکینیر
توفانلار، اؤنونده باش اییر؟!
هانکی داغلارین سینه‌سینده سیغاللانیب بو باخیش
اوچور درینلییینده شه‌وه – شه‌وه میرواری‌لار،
یوللارینا دوزولور دوزوم- دوزوم لاله‌لر
یارپاق- یارپاق یاشیل‌لار
خیشیم- خیشیم خیشیلتی‌لار،
که‌کیلینده چیچکله‌نیر
سحر یئلی‌نین تومورجوقلاری،
آغاج- آغاج مئشه‌له‌نیر
قاسناق وورموش تورپاغین سون باهاری؟!
هانکی داغلارین سینه‌سینده سیغاللانیب بو باخیش
گؤرونوشونده
داملا- داملا دامیر ایشیق قوخوسو
میشیل- میشیل اریییر یوخولولارین یوخوسو؟!
سیرا- سیرا سیرالانیب
گوی زمی‌لرین توراغای‌لاری
– باخیشلاریندا برکت ایشیلتیسی، قیها سسی
قانادلاریندا له‌لک- له‌لک یوکسه‌لیش
چیچک- چیچک قیزیل اوچوش؛ –
یاشاییر یاشام
دیرچه‌لیر اولوم،
ماویلییه یورویور-
اؤنجولوم!
شهریور ۱۴۰۱- تهران
