آیریلدین،
اریدی باخیشلاریم آیاق ایزلرین‌له؛
منی مندن آلیب آپاردین اؤزون‌له.
آیریلدین،
تنهالیقدا کئچدی گون‌لر، آی‌لار، ایل‌لر؛
او گئدن آیاق ایزلرینه-
حسرت گولو اکدی باخیشلاریم هر سحر.
آیریلدین،
گؤزلریم یول چکدی سن گئدن منزیل‌لره،
اومید باغلادیم ووصال دونلو قیزیل بیر سحره.
آیریلدین،
یاشیل دیله‌یین‌له
قیزیل اوره‌یین‌له
آپاردین آرزولاریمی،
کؤچورتدون سؤز باهاریمی؛
سارالدی زامان کئچیدینده یاشیل خاطیره‌لر،
آلدی کؤنلومو کدر.
گل سئوگیلیم!
قوی آلماسین کؤنلومو غوبار!
منی اؤزومه قایتار-
یاشیل دیله‌یین‌له
قیزیل اوره‌یین‌له!
تیر ۱۳۷۰- تهران
یک پاسخ
🌹🌹🌹حؤرمتلی و عزیز اوستادیما جان ساغلیغی آرزولاییرام .