بو گون آد گونوندور ، ییغیلیب هامی،
ییرمینجی یاشینا دولورسان ایندی.
گؤروشون بورویوب شاعر دونیامی،
شعیرده سنیندی، سؤزده سنیندی.

داغلار اوجا قویسون پاپاغین بو گون،
جوشسون بولاقلارین قاینار اوره‌یی.
مئشه‌لر زومزومه ائتسین سنینچون،
اوخشاسین کؤنلونو باهار کوله‌یی.

یاشیل مئشه‌لرین، سرت قایالارین-
سینه‌سی اوستونده گول آچدی ایزین.
قیش گونو جارچیسی اولدون باهارین،
صاباحا یؤنلدی اوره‌یین، گؤزون.

سئودا یوللاریندا توش اولدون غمه،
مین فیتنه تؤرتدی «قارا ملیک»لر.
بؤیوک گوناه اولموش سئوگی، سن دئمه!
سارای قانونلاری اولاندا ازبر.

دونه‌نین قادالی، بوگونون قانلی،
سول دؤشون اوستونده داغ واردی یئنه.
باشین فیرتینالی، کؤنلون دومانلی
نه حزین باخیرسان آنا وطنه؟!

ییرمینجی قیش کئچیر یاز حیاتیندان،
بو گون آد گونوندور، ییغیلیب هامی.
ائله بیل دایانیب، یئریمیر زامان
گؤروشون بورویوب شاعر دونیامی.

الی بوش دئییلم بو گونونده من،
اؤزومدن قورتاریب، من سن اولموشام.
سنین بولاغ کیمی صداقتیندن-
«آردینجا سورونن کؤلگن اولموشام.*»

۱۹ بهمن ۱۳۶۹

*: بیر ماهنی سؤزلریندن